"Caspian European Club" 16-cı "CEO Lunch Baku" keçirib

Bakı, 19 oktyabr, AZƏRTAC

Azərbaycan Yazıçılar İttifaqının katibi, Azərbaycan PEN- Klubunun prezidenti, Xalq yazıçısı Çingiz Abdullayev və Azərbaycan Respublikasının Alternativ və Bərpa Olunan Enerji Mənbələri üzrə Dövlət Agentliyinin (ABOEM) sədr müavini Cəmil Məlikov "Caspian European Club" tərəfindən təşkil olunmuş "CEO Lunch Baku"da iştirak ediblər.

"Caspian European Club"dan AZƏRTAC-a bildiriblər ki, yaradıcılığı və planları barədə danışan Çingiz Abdullayev kitab və təhsilin şəxsiyyətin formalaşmasındakı mühüm rolunu qeyd edib. Yazıçı iştirakçıları maraqlandıran sualları cavablandırıb və "Caspian European Club"un üzvlərinə fəaliyyətlərində uğurlar arzulayıb.

Çingiz Abdullayevə Klubun fəxri üzvlük sertifikatı təqdim olunub.

Cəmil Məlikov deyib ki, ümumi enerji istehsalında ABOEM hesabına enerji istehsalının payının artırılması istiqamətində dövlət agentliyi həyata keçirdiyi layihələr və normativ hüquqi bazanın inkişafı sahəsində 2013-cü ildən başlayaraq 2017-ci ilə qədər ABOEM hesabına enerji istehsalının miqdarını 6,4 faizdən 9,8 faizə qədər artımını təmin edib. "Azərbaycanın ümumi potensialının müəyyənləşdirilməsi və sistemləşdirilməsi nəticəsində uzunmüddətli strateji baxış çərçivəsində ABOEM hesabına qoyuluş güclərinin 3 pilləli enerji modeli əsasında artması nəzərdən keçirilib", - deyə C.Məlikov qeyd edib.

Cəmil Məlikova "Caspian European Club"un fəxri üzvlük sertifikatını təqdim edən "Caspian European Club"un sədrinin birinci müavini və baş icraçı direktoru Telman Əliyev "CEO Lunch Baku"da fəal iştirakına, həmçinin tədbir zamanı "Caspian European Club"un üzvlərinin səsləndirdikləri təklif və xahişlərə göstərilən diqqətə görə ona minnətdarlığını bildirib. O qeyd edib ki, "CEO Lunch Baku" çərçivəsində şirkətlər onları maraqlandıran suallara cavab tapıb, bu sahədə əməkdaşlığın yollarını müzakirə ediblər.

Telman Əliyev tədbirdə iştirak edən qonaqları 2018-ci ilin noyabrında Tbilisidə Gürcüstan və Azərbaycan hökumətlərinin, "Caspian European Club"un dəstəyi ilə keçiriləcək VIII Beynəlxalq "Caspian Energy Forum Kvemo Kartli"nin təşkili ilə bağlı planlar barədə məlumat verib.

"Caspian European Club"a daxil olan və burada iştirakını davam etdirən şirkətlərə sertifikatlar təqdim olunub.

"CEO Lunch Baku"da 80-dən artıq şirkət və təşkilat iştirak edib.

Sıralarında dünyanın 70 ölkəsindən olan 5 mindən artıq şirkət və təşkilatı birləşdirən "Caspian European Club" Xəzər-Qara dəniz regionunda fəaliyyət göstərən nəhəng neft-qaz şirkətlərinin dəstəyi və "Caspian Energy International Media Group"un fəal iştirakı ilə 2002-ci ilin iyununda yaradılıb.

2016-cı il dekabrın 24-də "Caspian American Club", 2018-ci il yanvarın 26-da "Caspian Asian Club" təsis olunub. Hər iki təşkilat 2 il ərzində "Caspian European Club"un idarə heyətinin üzvləri tərəfindən idarə olunacaq. "Caspian European Club"a daxil olan bütün şirkətlər avtomatik qaydada "Caspian American Club" və "Caspian Asian Club"un, "Caspian American Club" və "Caspian Asian Club"a daxil olanlar isə "Caspian European Club"un üzvü hesab olunurlar.