DÜNYA
COVID-19-un yaratdığı böhran: 2022-ci ildə Ukraynada hansı iqtisadi risklər ola bilər?
Kiyev, 12 yanvar, AZƏRTAC
Koronavirusun dünya iqtisadiyyatında yaratdığı böhran Ukraynadan da yan keçməyib. 2021-ci ildə Ukraynada inflyasiya hökumətin proqnozunu aşaraq 10 faiz oldu. Baxmayaraq ki, Ukrayna Milli Bankı makroproqnozda ötən ilin inflyasiyasının 7 faiz civarında olacağını açıqlasa da, mövcud inflyasiya 2017-ci ildən bəri istehlak qiymətlərinin artımı üçün rekord göstəricidir.
AZƏRTAC xəbər verir ki, Ukraynada 2021-ci ildə ərzaq məhsullarının qiyməti 13,3 faiz artıb. Ən çox günəbaxan yağı - 38,8 faiz, şəkər - 28,3 faiz, yumurta - 19 faiz, çörək - 18,7 faiz bahalaşıb. Alkoqol və tütün məmulatlarının qiyməti təxminən 10 faiz artıb. 2021-ci ildə qiymət artımı iqtisadiyyata COVID-19 böhranının təsiri kimi qiymətləndirildiyindən Beynəlxalq Valyuta Fondu tərəfindən iqtisadiyyatın və əhalinin dəstəklənməsi üçün dünya ölkələrinə 16 trilyon dollara yaxın vəsait ayrılıb. Onu da xatırladaq ki, ötən il ABŞ-da və Avropa İttifaqı ölkələrində rekord inflyasiya qeydə alınıb.
Bir sözlə ötən il Ukraynada inflyasiya hökumətin gözləntilərindən kənar olub. Bu, özünü enerji qiymətlərində də göstərib.
Bəs 2022-ci ildə Ukraynada inflyasiya riski nə dərəcədədir? Yerli ekspertlər hesab edir ki, bu il inflyasiya dərəcələrinin azalacağını gözləmək üçün heç bir səbəb yoxdur. Dünya bazarlarından alınan məlumatlar göstərir ki, ərzaq məhsulları üzrə kifayət qədər yüksək inflyasiya riskləri tendensiyası qalmaqdadır. Nəzərə alsaq ki, idxal olunan ərzaq məhsulları ukraynalıların istehlak səbətinin az qala yarısını təşkil edir, 2022-ci ildə də inflyasiyanın təsiri kifayət qədər ciddi ola bilər.
Ancaq Ukrayna hökuməti nikbin proqnozlar verir. Ukrayna Milli Bankı ümid edir ki, ilin sonuna qədər hədəfləmə siyasəti inflyasiyanı müəyyən edilmiş çərçivəyə qaytaracaq. Bundan başqa ərzaq məhsullarının bahalaşması ilə əlaqədar hakimiyyət aztəminatlı vətəndaşlar üçün sosial yardım variantlarını nəzərdən keçirir. Çox güman ki, hamı üçün qiymət tənzimlənməsindən daha çox ünvanlı yardıma diqqət yetiriləcək. Birbaşa subsidiyaların verilməsi, bəzi mallar üçün ƏDV-nin ləğvi müzakirə olunan variantlar sırasındadır.
Bütün hallarda, verilən açıqlamalarda Ukrayna əhalisinin bu il də inflyasiya sürprizlərinə hazır olmasına çağırışlar mövcuddur.
Emil Hüseynli
AZƏRTAC-ın xüsusi müxbiri
Kiyev