DAŞKƏNDDƏ NOVRUZ BAYRAMI QEYD OLUNMUŞDUR

22.03.2006 [17:16]
Çap et
A⁺ A^-

AZƏRTAC-ın xüsusi müxbiri xəbər verir ki, ölkəmizin Özbəkistandakı səfirliyi Azərbaycan Mədəniyyət Mərkəzləri Assosiasiyası ilə birgə, paytaxtdakı Heydər Əliyev adına Mədəniyyət Mərkəzində Novruz bayramını geniş qeyd etmişlər.

Səfirlik adından ümummilli liderimiz Heydər Əliyevin Mədəniyyət Mərkəzinin qarşısındakı abidəsi önünə əklil və tər çiçək dəstələri qoyulmuş, Azərbaycan Prezidenti İlham Əliyevin Novruz bayramı münasibəti ilə xalqa təbriki oxunmuşdur.

Səfir Namiq Abbasov şənliyə toplaşanları təbrik etmiş, bu bayramın həyatımızda və məişətimizdəki rolundan danışmışdır. Bildirmişdir ki, Novruz bayramı qədimdən bolluq, paklıq və xoşbəxtlik rəmzi olmuşdur.

Sonra mədəniyyət ustaları muğam, xalq mahnıları və təsniflərimizi, “Azəri” uşaq rəqs ansamblının üzvləri isə gözəl rəqslərimizi ifa etmişlər.