İQTİSADİYYAT
Dəm qazından baş verən bədbəxt hadisələrin əsas səbəbi təhlükəsizlik qaydalarına düzgün riayət olunmamasıdır
Bakı, 14 dekabr (AZƏRTAC). Azərbaycan Respublikası Dövlət Neft Şirkətinin “Azəriqaz” İstehsalat Birliyində (İB) əməyin mühafizəsi, texniki təhlükəsizlik və təbii qazla əlaqədar baş verən bədbəxt hadisələrlə bağlı mətbuat konfransı keçirilmişdir.
AZƏRTAC xəbər verir ki, tədbirdə İB baş direktorunun əməyin mühafizəsi üzrə müavini Aydınbay Amanov bildirmişdir ki, qurum tərəfindən genişmiqyaslı qazlaşdırma işləri ilə yanaşı, mövcud qaz şəbəkələrinin təmirinə xüsusi diqqət yetirilməsi nəticəsində istehlakçıların fasiləsiz və təhlükəsiz olaraq təbii qazla təchizatı təmin edilmiş, xarici qaz kəmərlərindən, avadanlıq və qurğulardan qazın sızması ilə əlaqədar baş vermiş qəzaların sayı minimuma endirilmişdir. Lakin mənzildaxili qaz cihazları və xətləri, onların üzərindəki avadanlığa vaxtaşırı texniki baxışların keçirilməsi və profilaktiki xidmətlərin aparılmasına baxmayaraq, bəzi istehlakçılar tərəfindən təhlükəsizlik qaydalarına düzgün riayət edilməməsi, aidiyyəti təşkilatların balanslarında olan binalarda, eləcə də fərdi evlərdə tüstü bacaları və ventilyasiya kanallarının vaxtında təmizlənməməsi və ya təmir edilməməsi nəticəsində təbii qazdan istifadə zamanı arzuolunmaz hadisələr hələ də baş verməkdədir. Baş verən bu hadisələrin təxminən 95 faizi zəhərlənmə, qalan hissəsi isə yanğın və partlayış xarakterlidir. Yanma məhsullarının təsirindən zəhərlənmə hallarının qarşısının alınması üçün ilk növbədə yaşayış binalarında istilik sistemləri bərpa edilməli, layihə əsasında isti su ilə təchiz edilməsi nəzərdə tutulmuş binalara isti suyun verilməsi təmin edilməli və qazdan istifadə qaydaları düzgün icra edilməlidir.
Sonra abonentlər üçün məsləhətli olan xəbərdaredici cihazın nümayişi olmuşdur. Bu cihazın siqnal səsi verməsi ilə vətəndaşlar evdə baş verən hər hansı qaz sızması və ya tüstünün, dəm qazının olmasını vaxtında aşkar edə bilər və bununla da təhlükəsizliklərini təmin etmiş olarlar. Münasib qiymətə olan bu cihazı istənilən vətəndaş mağazalardan əldə edə bilər.
Azərbaycan Respublikası Yanğından Mühafizə Cəmiyyəti yanğın-texniki istehsalat mərkəzinin baş direktoru Aydın Nağıyev vurğulamışdır ki, rəhbərlik etdiyi mərkəz mənzil istismar sahələri ilə müqavilə bağlayaraq tüstü bacalarını təmizləyir. Hələ ki təmizləmə işləri müqavilə əsasında Azərbaycan Respublikası Dövlət Neft Şirkətinin və Dövlət Xəzər Dəniz Gəmiçiliyinin hesabında olan binalarda, Xətai və Nizami rayonundakı binalarda aparılır. Digər rayonlar isə maliyyə çatışmamazlığından bu işə hələ ki qoşulmamışlar. Qeyd edilmişdir ki, təmizlənmiş tüstü bacalarına hər altı aydan bir nəzarət olunur və abonentlərə akt təqdim edilir. Təmizləmə işləri fərdi evlərdə də həyata keçirilir və hansısa bədbəxt hadisə baş verərsə, bu zaman məsuliyyət mərkəzin üzərinə düşür.
Sonda qazdan təhlükəsiz istifadə ilə bağlı videoçarx nümayiş olunmuş və KİV nümayəndələrinin sualları cavablandırılmışdır.