Bakı, 14 iyul, AZƏRTAC

Qoşulmama Hərəkatının Xarici işlər nazirlərinin aralıq konfransında Prezident İlham Əliyevin çıxışından bir daha aydın oldu ki, bütün ölkələrin suverenliyi və ərazi bütövlüyünə hörmət, ən əsası, ölkələrin daxili işlərinə qarışmamaq və digər prinsipləri təşviq edən tarixi “Bandunq prinsipləri” Azərbaycanın xarici siyasətinin prioritetləri ilə tam uyğundur.

Bunu AZƏRTAC-a açıqlamasında Milli Məclisin deputatı Könül Nurullayeva deyib.

Deputat bildirib ki, Qoşulmama Hərəkatının təməlində də sülh, multilateralizm və qlobal həmrəyliyin möhkəmləndirilməsi dayanır. On il əvvəl dünyanın ikinci ən böyük təsisatına - Qoşulmama Hərəkatına üzv olan Azərbaycan çox qısa müddətdə böyük etimad qazandı. 2016-cı ildə bütün üzv dövlətlərin yekdil qərarı ilə 2019-2022-ci illər üçün Qoşulmama Hərəkatına sədr olması isə Prezident İlham Əliyevin həyata keçirdiyi uğurlu xarici siyasətin növbəti təzahürü idi. Bu nüfuzlu təsisata sədrliyi dövrü üçün Azərbaycan hərtərəfli qlobal fəaliyyət planı hazırladı. Lakin COVID-19 pandemiyasının dünyanı bürüməsi beynəlxalq platformaların da gündəmini dəyişdi. Azərbaycan yeni yaranmış vəziyyətə çevik reaksiya verməklə yanaşı, pandemiyaya qarşı qlobal səylərin səfərbər edilməsi istiqamətində də beynəlxalq miqyasda səmərəli təşəbbüslər irəli sürdü. Təsadüfi deyil ki, Azərbaycanın Ümumdünya Səhiyyə Təşkilatına könüllü şəkildə ayırdığı 10 milyon ABŞ dollarının yarısı məhz Qoşulmama Hərəkatının üzv dövlətləri üçün nəzərdə tutulurdu.

Deputatın sözlərinə görə, Azərbaycan qlobal liderlik rolunu üzərinə götürərək pandemiyaya qarşı mübarizədə beynəlxalq həmrəyliyi və əməkdaşlığı təbliğ edən ilk ölkə oldu. 2020-ci il mayın 4-də Qoşulmama Hərəkatının Təmas Qrupu formatında Zirvə görüşündə Prezident İlham Əliyevin BMT Baş Assambleyasının koronavirusa qarşı dövlət və hökumət başçıları səviyyəsində xüsusi sessiyasının çağırılması təşəbbüsü 150-dən artıq ölkə tərəfindən dəstəkləndi. Bu təşəbbüsə qarşı çıxan yeganə ölkə Ermənistan isə bu yanaşmasına görə rəsmən rüsvay oldu.

2020-ci il dekabrın 3-4-də BMT Baş Assambleyasının 31-ci xüsusi sessiyasının keçirilməsi isə Azərbaycanın pandemiyaya qarşı mübarizədə oynadığı aparıcı rolun və Prezident İlham Əliyevin qlobal liderliyinin bariz nümunəsi kimi dəyərləndirilməlidir. Bütün təşəbbüslər kimi, Azərbaycanın Qoşulmama Hərəkatı tərəfindən COVID-19-dan sonra qlobal bərpaya dair BMT-nin Yüksək Səviyyəli Panelinin yaradılmasına dair təşəbbüsü də müsbət qarşılandı.

“Bu, Qoşulmama Hərəkatının sədri olan Azərbaycanın fəal surətdə çoxtərəfli diplomatiyanı və multilateralizmi təşviq etməsinin dünya birliyi tərəfindən təqdir edilməsidir. Bu, eyni zamanda, ölkəmizin dünya miqyasında daim artan nüfuzunun göstəricisidir. Ümumiyyətlə, Azərbaycanın sədrliyi dövründə Qoşulmama Hərəkatında xüsusi fəallıq müşahidə olunur. Təsadüfi deyil ki, tarixdə ilk dəfə Avropa İttifaqının rəhbərlərinin Qoşulmama Hərəkatının onlayn Zirvə toplantısında iştirakı təmin olundu. Paralel olaraq, sahəvi nazirliklər səviyyəsində görüşlərin intensivləşməsi, Qoşulmama Hərəkatı üzrə gənclərin institusional şəbəkəsinin yaradılması istiqamətində işə başlanılması da Azərbaycanın gərgin diplomatik fəaliyyətinin nəticəsidir. Bir sözlə, Azərbaycan üzv olduğu bütün təşkilatlarda etimad qazanaraq beynəlxalq münasibətlər sistemində mövqeyini daha da möhkəmləndirir”, - deyə K.Nurullayeva bildirib.