Bakı, 16 mart, AZƏRTAC

Azərbaycan təbiətin ona bəxş etdiyi bütün imkanlarından səmərəli istifadə edən ölkələrdən biridir. Dövlətimizin başçısının uzaqgörən siyasəti Azərbaycanın iqtisadi gücünü artıraraq tam müstəqilliyə nail olmasına imkan verib. Bu gün Azərbaycan özünün neft və qaz resursları ilə Avropanın, o cümlədən dünyanın enerji təhlükəsizliyinə töhfə verir.

Bu sözləri AZƏRTAC-a açıqlamasında Milli Məclisin deputatı Azər Badamov ifadə edib.

Deputat bildirib ki, Azərbaycan təkcə neft-qaz istehsalı və ixracı ilə kifayətlənmir, həm də elektrik enerjisinin böyük ixracatçısına çevrilməkdədir. “Biz artıq dörd qonşu ölkəyə elektrik enerjisi ixrac edirik. 20-25 il əvvələ qayıtsaq görərik ki, o vaxt Azərbaycan elektrik enerjisini idxal edirdi. Amma Prezident İlham Əliyevin qeyri-neft iqtisadiyyatının şaxələndirilməsi siyasəti Azərbaycanı qısa zamanda elektrik enerjisi idxalından azad edib və ixracatçı ölkəyə çevirib. Son illər ölkəmizdə 35-dən çox elektrik stansiyası yenidən qurularaq istismara verilib. Bu da ölkəmizin enerji istehsalı gücünü kifayət qədər artırıb. İndi isə qarşımızda yeni hədəflər dayanır. Bu hədəflər 2030-cu ilə qədər elektrik enerjisi istehsalının 30 faizini bərpaolunan mənbələr hesabına əldə etmək və Avropaya elektrik enerjisini ixrac etməkdir”, - deyə A.Badamov əlavə edib.

O vurğulayıb ki, bərpaolunan enerji mənbələrinin genişləndirilməsi üçün Azərbaycanın kifayət qədər böyük imkanları var. Təbii ki, ölkəmizin iqlimi, dənizə birbaşa çıxışı və işğaldan azad edilmiş ərazilərin bərpaolunan enerji resursu gücünün 10 min meqavata yaxın olması bu sahədə əməlli işlərin həyata keçirilməsinə imkan verir. Eyni zamanda, Azərbaycanın dayanıqlı iqtisadiyyatı, optimal investisiya mühitinin formalaşması, xarici investisiyalara dövlət zəmanəti, ölkənin xarici dövlət borcunun aşağı həddə - cəmi 7,4 milyard dollar olması və valyuta ehtiyatlarının xarici dövlət borcunu 8 dəfədən çox üstələməsi respublikamızın bu sahədə əməli addımlar atmasına imkan verir. Bütün bu parametrləri nəzərə alaraq deyə bilərik ki, Azərbaycan bu gün xarici sərmayədarlar üçün cəlbedici ölkəyə çevrilib.

Azər Badamovun sözlərinə görə, bərpaolunan enerji sahəsində işğaldan azad olunmuş ərazilərimizdə 30 su elektrik stansiyası fəaliyyət göstərirdi ki, ermənilər torpaqlarımızı tərk edəndə bu stansiyaları vəhşicəsinə dağıdıblar. Azərbaycan həmin stansiyaları sürətlə bərpa edir. Təkcə 2021-ci ildə işğaldan azad olunmuş ərazilərimizdə generasiya gücü 20 meqavat olan 4 su elektrik stansiyasının fəaliyyəti bərpa edilib. Bu il isə generasiya gücü 27 meqavat olan 5 su elektrik stansiyasının yenidən qurularaq istismara verilməsi nəzərdə tutulur. Təkcə Kəlbəcər və Laçında belə stansiyaların sayının 30-dan çox olacağı planlaşdırılıb. Həm də bu ərazilərin günəş və külək potensialından səmərəli istifadə edilməklə bərpaolunan enerji sahələri yaradılacaq.

“Bərpaolunan enerji sahələrinin yaradılması istiqamətində işlərə artıq başlanılıb. Bu ilin ilk üç ayında Səudiyyə Ərəbistanını təmsil edən “ACWA Power” şirkəti ilə 240 meqavat gücündə Külək Elektrik Stansiyasının təməli qoyuldu. Həmçinin fevralda “Azərenerji” tərəfindən inşa edilmiş 385 meqavat gücündə elektrik stansiyasının açılışı oldu. Martın 15-də isə Birləşmiş Ərəb Əmirliklərinin “Masdar” şirkəti tərəfindən Azərbaycanda inşa ediləcək 230 meqavat gücündə Qaradağ Günəş Elektrik Stansiyasının təməli qoyuldu. Cəmi üç ayda 850 meqavat yeni generasiya gücü istehsalı sahələrinin təməlinin qoyulması və ya istismara verilməsi böyük əhəmiyyət kəsb edir. Sirr deyil ki, bu gün dünya qaynar qazan kimi qaynayır. Müharibələr, tətbiq olunmuş sanksiyalar ölkələrin iqtisadiyyatlarını məhvə doğru aparır”, - deyə deputat diqqətə çatdırıb.

A.Badamov bildirib ki, bu gün yeni investisiyalar yatıran və qeyri-neft sektorunda yeni istehsal sahələrin açılışını edən ölkələr çox azdır. Belə qarışıq bir zamanda Azərbaycanın öz yoluna inamla, müstəqil şəkildə davam etməsinə dövlətimizin başçısının siyasətinin ölkəmizdə yaratdığı siyasi və iqtisadi sabitlik, beynəlxalq ictimaiyyətlə qurduğumuz möhkəm və etibarlı münasibətlər sayəsində nail oluruq. Bu ilin iki ayında Azərbaycanın makroiqtisadi göstəricilərinə baxanda görürük ki, ölkəmizdə ümumi daxili məhsul 6,1 faiz, qeyri neft sektoru 10,1 faiz, qeyri-neft sənayesi 21 faiz artıb. Bu göstəricilər postpandemiya dövründə və qarışıq dünya fonunda əldə edilib.

“Prezident İlham Əliyevin rəhbərliyi ilə ölkəmizdə vaxtında aparılmağa başlanılan dərin islahatlar, sənayeləşmə siyasəti, biznes mühitinin yaxşılaşdırılması və xarici sərmayənin cəlb edilməsi istiqamətində vaxtında atılan addımlar bu gün özünün əməlli nəticələrini verməkdədir. Hesab edirəm ki, yaxın gələcəkdə qeyri-neft iqtisadiyyatımıza yeni xarici investisiyaların da cəlb olunacağına şahidlik edəcəyik. Bu gün Azərbaycan “nərdivanın inkişaf pillələri”ni uğurla qalxmaqdadır. Yaxın gələcəkdə biz bunun əməli nəticələrini güclənmiş, işğaldan azad olunmuş ərazilərini bərpa edərək qaçqın və köçkünlərinin öz doğma yurdlarına qayıtdığı, əhalisinin sosial rifahının kifayət qədər yüksəldiyi Azərbaycanda görəcəyik”, - deyə Azər Badamov fikirlərini yekunlaşdırıb.