Bakı, 7 iyun, AZƏRTAC

Azərbaycan Respublikası Dini Qurumlarla İş üzrə Dövlət Komitəsi Milli Mətbuat Günü münasibətilə jurnalistlər arasında “Media və dini təhlükəsizlik” mövzusunda yazı müsabiqəsi elan edir.

Komitədən AZƏRTAC-a bildirilib ki, müsabiqənin qalibi 1000 manatla, ikinci yerin sahibləri (2 nəfər) 800 manatla, üçüncü yer (3 nəfər) 600 manatla mükafatlandırılacaq, 9 nəfərə isə həvəsləndirici mükafat kimi 200 manat veriləcək.

Müsabiqəyə təqdim olunmuş yazılarda aşağıdakı parametrlərə üstünlük veriləcək:

- Mövzunu dolğun əhatə etmə səviyyəsi;

- Faktlardan istifadə xüsusiyyətləri və araşdırmanın keyfiyyəti;

- İfadə vasitələrinin zənginliyi;

- Maarifləndiricilik xüsusiyyəti;

- Oxucu üçün informasiyalılıq dərəcəsi;

- Müsabiqəyə iyunun 7-dən iyulun 7-dək qəzet, jurnal və informasiya agentliklərində, həmçinin xəbər saytlarında yayımlanan yazılar buraxılacaq;

- Müsabiqə üçün dil məhdudiyyəti nəzərdə tutulmur;

- Yazılar 9-11 min işarədən (1 A3 formatlı qəzet vərəqindən) çox olmamalıdır.

Yazıda Azərbaycan Respublikası Dini Qurumlarla İş üzrə Dövlət Komitəsinin Milli Mətbuat Günü münasibətilə jurnalistlər arasında “Media və dini təhlükəsizlik” mövzusunda keçirdiyi müsabiqəyə təqdim olunur” qeydi olmalıdır.

Müsabiqə üçün təqdim ediləcək material müəllifin çalışdığı KİV-də yayımlanmaya da bilər.

Müsabiqə üçün yazıların təqdimatı 2 yolla aparılır - şəxsən və elektron qaydada.

Yazılar şəxsən təqdim edilərkən təqdimat zərfində yer almalıdır:

- Yazı təqdim edən şəxsin konkret kütləvi informasiya vasitəsində işlədiyini təsdiqləyən sənədin surəti (çalışdığı media qurumu varsa);

- Yazı təqdim edən şəxsin şəxsiyyət vəsiqəsinin surəti;

- Yazı təqdim edən şəxsin əlaqə vasitələri - ev və iş telefonu, mobil telefonu;

- Müsabiqə üçün verilmiş yazının getdiyi qəzet və jurnalın 1 nüsxəsi;

- Materialın yazılı formada A4 formatlı kağız vərəqində 3 nüsxəsi (nüsxələrdə müəllifinin adı göstərilməməlidir);

- Diskdə materialın elektron forması (Times New Roman şriftində, müəllifin adı qeyd olunmaqla);

- Yazı elektron media resursunda yayımlanıbsa, diskdə yazının linki göstərilməlidir.

Yazılar elektron qaydada təqdim edilərkən aşağıdakılar nəzərə alınmalıdır:

- Müsabiqəyə yazılar [email protected] elektron ünvanına göndərilməlidir;

- Təqdimatda yer almalıdır;

- Müsabiqə yazısı ("Word" faylında, imzasız);

- Müsabiqə yazısının yayımlandığı qəzetin, jurnalın nüsxəsi (PDF, JPG, yaxud "Word" faylında);

- Yazı elektron media resursunda yayımlanıbsa, bunu təsdiqləyən "link";

- Yazı müəllifinin şəxsiyyət vəsiqəsi, iş vəsiqəsi və ya əmək kitabçasından müəllifin KİV-də çalışdığını təsdiqləyən çıxarış (PDF, JPG, yaxud "Word" faylında);

- Yazı müəllifinin əlaqə vasitələri (PDF, JPG, yaxud "Word" faylında) əlavə olunmalıdır.

Müsabiqə üçün yazılar şəxsən, eləcə də elektron poçt vasitəsilə iyunun 7-dən iyulun 7-dək həftənin iş günləri saat 11.00-dan 17.00-dək Bakı şəhəri, Əhməd Cavad küçəsi 16 ünvanında qəbul ediləcək.

Qeyd: Təqdimat prosesində müsabiqə şərtlərinin hər hansı birinin yerinə yetirilməməsi qaydaların pozulması kimi qiymətləndiriləcək və yazı qəbul edilməyəcək.

Əlaqə: (012) 437 31 15.