Bakı, 28 noyabr (AZƏRTAC). Azərbaycan Milli Elmlər Akademiyasının İnformasiya Texnologiyaları İnstitutunda dissertasiya şurasının iclası keçirilmişdir.

İnstitutdan AZƏRTAC-a verilən məlumata görə, dissertasiya şurasının həmsədri, professor Ələkbər Əliyev iclasın “Sistemli analiz, idarəetmə və informasiyanın işlənməsi” ixtisası üzrə texnika üzrə fəlsəfə doktoru elmi dərəcəsi almaq iddiasında olan Səadət Bünyatova və Qalib Həmidovun dissertasiya işlərinin müdafiəsinə həsr olunduğunu bildirmişdir.

S.Bünyatova “Elektron poçtda spamla mübarizə metod və alqoritmlərinin işlənməsi” mövzusunda dissertasiya işini təqdim etmişdir. O, spam-texnologiyalarının inkişaf mərhələləri, təsnifatı, müasir vəziyyəti haqqında məlumat vermişdir. Bildirmişdir ki, dissertasiya işində spam probleminin müasir elmi-nəzəri vəziyyəti araşdırılmış, spamla mübarizə mexanizmlərinin müqayisəli təhlili verilmiş, spam texnologiyaların əsas növləri təyin olunmuşdur.

Q.Həmidov “İnformasiya emalı sistemlərində çoxxidmətli korporativ şəbəkələrin effektivliyinin yüksəldilməsi metodları” mövzusunda dissertasiya işi haqqında məlumat vermişdir. İşin məqsədi, mövzunun aktuallığı, müdafiəyə çıxarılan əsas müddəalar, elmi işin praktiki əhəmiyyəti haqqında danışmışdır. Dissertasiya işinin nəticələrini açıqlayan Q.Həmidov informasiya emalı sistemlərində çoxxidmətli korporativ şəbəkələrin və onların texniki təminatının müasir vəziyyəti və inkişaf perspektivlərinin təhlil olunduğunu, elmi yeniliklərin əldə edildiyini söyləmişdir.

Sonra iddiaçılar dissertasiya şurası üzvlərinin suallarını cavablandırmışlar.

Hər iki iş üzrə elmi rəhbər, AMEA-nın müxbir üzvü Rasim Əliquliyev dissertasiya işlərinin həm elmi, həm də nəzəri cəhətdən dərindən araşdırıldığını, müvafiq strukturlarda təcrübədən keçirildiyini və iddiaçının texnika üzrə fəlsəfə doktoru adı almağa layiq olduğunu bildirmişdir.

Mövzulara dair rəylər nəzərə çarpdırılmış, opponentlər tərəfindən iddiaçılara irad və təkliflər bildirilmişdir.

Müzakirələrdə iştirak edən texnika elmləri doktorları Məhəmməd Əhmədov, Vidadi Musayev və başqaları dissertasiya işlərinin aktuallığını önə çəkərək, alınmış elmi nəticələri yüksək qiymətləndirmişlər. Hər iki iddiaçının dissertasiya işində qarşıya qoyulmuş məqsədlərə çatmaq üçün əsaslı tədqiqat aparıldığını, elmi yeniliklərin əldə edildiyini və onların müvafiq praktiki layihələrdə tətbiq olunduğunu söyləmişlər.

İddiaçıların yekun sözləri dinlənildikdən sonra gizli səsvermə keçirilmiş və dissertasiya şurasının üzvləri tərəfindən hər iki iddiaçıya texnika üzrə fəlsəfə doktoru elmi dərəcəsinin verilməsi ilə əlaqədar Azərbaycan Respublikasının Prezidenti yanında Ali Attestasiya Komissiyasının qarşısında vəsatət qaldırılması təklif edilmişdir.