MƏDƏNİYYƏT
“Dostluğun sehri” beynəlxalq rəsm müsabiqəsinin qalibləri mükafatlandırılıb
Bakı, 12 sentyabr, AZƏRTAC
Azərbaycan Respublikasının Təhsil Nazirliyi və 3 saylı Uşaq-Gənclər İnkişaf Mərkəzinin təşkilatçılığı ilə keçirilən “Dostluğun sehri” IV Beynəlxalq rəsm müsabiqəsinin Birləşmiş Ərəb Əmirliklərindən (BƏƏ) olan qalibləri Əbu-Dabidə mükafatlandırılıb.
AZƏRTAC xəbər verir ki, Azərbaycanın BƏƏ-dəki səfirliyində keçirilən mükafatlandırma mərasimində qalib şagirdlərlə yanaşı, onların valideynləri, BƏƏ-nin Təhsil və Bilik İdarəsinin (ADEK) nümayəndələri, “Lubna Bent Hubab” və “Gems Modern Academy” məktəblərinin rəhbərliyi, müəllim heyəti və media nümayəndələri iştirak ediblər.
Tədbiri açan Azərbaycanın BƏƏ-dəki səfiri Mahir Əliyev diqqətə çatdırıb ki, artıq 6 ildir “Dostluğun sehri” beynəlxalq rəsm müsabiqəsi keçirilir. Müsabiqə pandemiya ilə əlaqədar 2020-ci ildə təxirə salınsa da 2021-ci ildə yenidən keçirilib. IV Beynəlxalq rəsm müsabiqəsində 18 ölkədən 1558 uşaq iştirak edib. Peşəkar rəssam və mütəxəssislərdən ibarət münsiflər heyəti tərəfindən 2022-ci il martın 14-də qaliblər elan olunub, 37 iş birinci, 29 iş ikinci, 28 iş üçüncü yerə layiq görülüb.
BƏƏ-də müxtəlif məktəblərdən 45 uşaq iştirak edib və 2 məktəbdən 5 nəfər qalib olub. İki nəfər birinci, üç nəfər isə üçüncü yerə layiq görülüb.
Səfirin sözlərinə görə, Azərbaycan tərəfindən BƏƏ-də keçirilən beynəlxalq müsabiqələrə hər zaman böyük maraq olub. BƏƏ-də keçirilən idman, mədəniyyət və digər müxtəlif sahələrdə beynəlxalq müsabiqələrdə Azərbaycan tərəfi də iştirak edib və bir çox uğurlar qazanıb. Bu, ölkələrimiz arasında bütün sahələrdə əməkdaşlığın yüksək səviyyədə olduğunun göstəricisidir.
Diplomat qeyd edib ki, Azərbaycan Prezidenti İlham Əliyev ölkəmizlə BƏƏ arasındakı münasibətlərə xüsusi önəm verir. Prezident İlham Əliyevin BƏƏ Prezidenti Şeyx Mohammed bin Zayed Al Nəhyan ilə şəxsi dostluq əlaqələri də bu münasibətlərin inkişafına müsbət təsir göstərir.
“Lubna Bent Hubab” məktəbinin direktoru Einas Alsereidi Azərbaycan səfirliyinə bu gözəl tədbirin təşkilatçılığına görə təşəkkürünü bildirib, bu cür müsabiqələrin beynəlxalq səviyyədə mədəniyyətin və incəsənətin daha da inkişafına müsbət təsir etdiyini vurğulayıb.
“Gems Modern Academy” məktəbinin incəsənət departamentinin rəhbəri Jignyasa Patel “Dostluğun sehri” beynəlxalq rəsm müsabiqəsinin təşkilatçılarına və Azərbaycan səfirliyinə qonaqpərvərliyə görə minnətdarlığını ifadə edib.
Daha sonra qaliblər mükafatlandırılıb, səfir tərəfindən onlara medallar diplomlar və səfirlik tərəfindən hazırlanmış xatirə hədiyyələri təqdim edilib.
Tədbir çərçivəsində Azərbaycan haqqında Bakı Media Mərkəzi tərəfindən hazırlanmış videoçarx nümayiş etdirilib.
Sonda xatirə şəkilləri çəkdirilib, tədbir iştirakçıları çay süfrəsinə dəvət edilib.