CƏMİYYƏT
Dövlət Agentliyinin sədri Birləşmiş Ərəb Əmirliklərində səfərdədir
Bakı, 30 mart, AZƏRTAC
Azərbaycan Respublikasının nümayəndə heyəti Dubay şəhərində keçirilən VIII Dünya Hökumətləri Sammitində iştirak edir. Nümayəndə heyətinin tərkibinə əmək və əhalinin sosial müdafiəsi naziri Sahil Babayev, ekologiya və təbii sərvətlər naziri Muxtar Babayev, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov daxildir.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İctimaiyyətlə əlaqələr şöbəsindən AZƏRTAC-a bildirilib ki, “Gələcək hökumətlərin proqnozlaşdırılması” şüarı altında keçirilən sammitin işində 4 mindən çox nümayəndə iştirak edir. Onların arasında dünyanın 140 ölkəsindən olan hökumət başçıları və nazirlər, görkəmli ictimai-siyasi xadimlər, alimlər və ekspertlər, həmçinin bir sıra aparıcı beynəlxalq təşkilatların nümayəndələri yer alıblar.
Sammit çərçivəsində dördüncü sənaye inqilabı dövründə hökumətlərin yeni çağırışlara adaptasiyası, süni intellekt, data analiz ilə bağlı bir sıra təqdimat, dəyirmi masa və seminarlar keçirilir.
Sammit çərçivəsində Dövlət Agentliyinin sədri Ülvi Mehdiyev Mərakeş Krallığının rəqəmsal keçid və idarəetmə islahatları üzrə naziri Ghita Mezzour ilə görüşüb. Görüş zamanı Mərakeş Krallığının müvafiq qurumu ilə 2018-ci ildə imzalanmış Anlaşma Memorandumunun implemenatasiyası çərçivəsində görülmüş işlər və planlaşdırılmış layihələr müzakirə olunub.
Nümayəndə heyətinin BƏƏ-yə səfəri davam edir.