Abu-Dabi, 20 dekabr, AZƏRTAC

Birləşmiş Ərəb Əmirliklərinin “Etihad Airways” aviaşirkəti 2018-ci il martın 2-dən Abu-Dabi-Bakı aviareysini həyata keçirməyə başlayacaq.

AZƏRTAC xəbər verir ki, bu məlumatı “Etihad Airways”ın vitse-prezidenti Amer Xan dekabrın 20-də Azərbaycanın Birləşmiş Ərəb Əmirliklərindəki səfiri Daşqın Şikarovla keçirdiyi görüşdə deyib.

O bildirib ki, əsasən uzunməsafəli uçuşlara üstünlük verən “Etihad Airways”ın bu reysin açılması barədə qərarı səfirliyin təşəbbüsü və çoxsaylı səyləri nəticəsində mümkün olub. Bu yaxınlarda Bakıya səfər etdiyini və onun gözəlliyinə valeh olduğunu, şəhər və insanların onda çox xoş təəssürat yaratdığını söyləyən Amer Xan reyslərin başlanmasına qədər görüləcək işlər, şirkətin rəsmilərinin Bakıya çoxsaylı səfərlərinin planlaşdırıldığı barədə məlumat verib.

Səfir qeyd olunan reysin açılması ilə bağlı görülmüş işlər və keçirilmiş görüşləri xatırladıb, şirkətin bu istiqamətə marağının artmasını sevindirici hal kimi dəyərləndirib. O, “Etihad Airways”ın Bakıya uçuşları ilə bağlı səfirliyin göstərə biləcəyi konsulluq və digər məsələlər üzrə verə biləcəyi dəstəkdən danışıb.

D.Şikarov dünyanın ən yaxşı beş hava yolları şirkətlərindən olan “Etihad Airways” şirkətinin Bakıya birbaşa reyslərə başlamasının qürur hissi yaratdığını bildirib, bu reyslərin sayının artacağına əminliyini ifadə edib. O, Azərbaycan rəhbərliyinin uğurlu siyasəti nəticəsində ölkənin inkişaf etdiyini, Bakı ilə yanaşı ölkənin bir çox görməli yerlərinin olduğunu, “Fly Dubai” şirkətinin Qəbələyə də uçuşlar həyata keçirdiyini, BƏƏ-dən olan turistlərin Azərbaycanın müxtəlif yerlərində istirahət etdiyini bildirib. Səfir Azərbaycanın Naxçıvan Muxtar Respublikasının xüsusi gözəlliyə malik olduğunu, burada zəngin və əsrarəngiz təbiətlə yanaşı çoxlu tarixi abidələrin, Quranda adı keçən Əshabi -Kəf mağarasının, Duzdağ, Batabat gölü kimi təbiət möcüzələrinin mövcudluğunu vurğulayaraq, gələcəkdə “Etihad Airways”ın Naxçıvana da uçuşların həyata keçirilməsini nəzərdən keçirməsini təklif edib, Naxçıvanın zəngin potensialını nəzərə alaraq bu reyslərin BƏƏ turistləri tərəfindən böyük maraqla qarşılanacağına əminliyini diqqətə çatdırıb.

D.Şikarov Azərbaycanın Dubay əmirliyi ilə iqtisadi və turizm əlaqələrinin inkişaf etdiyini, lakin Abu-Dabi əmirliyində istər qeyd olunan, istərsə də mədəni, təhsil və səhiyyə sahələrində əməkdaşlıq üçün potensialın yüksək olduğunu, səfirliyin Abu-Dabi ilə əlaqələrin inkişafına xüsusi diqqət ayırdığını bildirərək birbaşa uçuşların bu sahədə görülən tədbirlərə xüsusi töhfə verəcəyini və yeni imkanlar yaradacağını da vurğulayıb.

Görüşdə Abu-Dabi-Bakı reyslərinin açılması ilə bağlı əlavə tədbirlər, ilk reysin həyata keçiriləcəyi gün Abu-Dabi və Bakıda keçiriləcək mərasimlər və bununla əlaqədar digər məsələlər müzakirə olunub.

Asya Hacızadə

AZƏRTAC-ın xüsusi müxbiri

Abu-Dabi