Bakı, 19 noyabr, AZƏRTAC

İşğaldan azad edilmiş ərazilərə Böyük Qayıdışa dair I Dövlət Proqramı mahiyyət etibarilə dövlətimizin başçısının ərazilərimizin dirçəldilməsi ilə bağlı iradəsinin ifadəsi, Qarabağı və Şərqi Zəngəzuru cənnətə çevirməklə bağlı sözlərinin əməli təzahürü, bunu reallaşdırmağın praktiki planıdır. Həyata keçirilən genişmiqyaslı layihələr və dövlət proqramları Qarabağ və Şərqi Zəngəzur iqtisadi rayonlarının sürətlə dirçəlməsinə xidmət edir

Bunu AZƏRTAC-a açıqlamasında Milli Məclisin deputatı Aydın Hüseynov deyib.

O bildirib ki, Dövlət Proqramının prioritet istiqamətləri ərazilərin bərpası və əhalinin qayıdışına dair baxışı və qarşıya qoyduğu hədəflərdir. Bu hədəflərə təhlükəsizlik, müasir yaşayış məntəqələrinin salınması, əhalinin dayanıqlı məskunlaşması, əhatəli və qabaqcıl standartlara cavab verən infrastrukturun qurulması, ərazilərin iqtisadi inkişafının dəstəklənməsi, ekoloji təmiz mühitin təmin edilməsi aiddir. Həddindən çox əhatəli, daha praqmatik və daha hədəfyönümlü olan yenidənqurma və inkişaf proqramının ölkənin öz daxili imkanları hesabına icra edilməsi isə bir çox ölkələr üçün əlçatmaz bir təcrübədir.

“2023-cü il üçün dövlət büdcəsi xərcləri və gəlirləri baxımından müstəqillik tariximizin ən böyük büdcəsidir. Qlobal müstəvidə baş verən iqtisadi təlatümlərə və böhranlara baxmayaraq, Azərbaycanda hər il davamlı olaraq büdcədə artım olur. Bu fakt özü Azərbaycanın iqtisadi dayanıqlığının göstəricisidir. Builki artım da nəzərəçarpacaq səviyyədədir. Ümumilikdə, 2023-cü il üçün dövlət büdcəsi bütün sahələr üzrə dayanaqlı inkişafın təmin olunmasını özündə ehtiva edir. Bu da işğaldan azad edilmiş ərazilərə Böyük Qayıdışa dair I Dövlət Proqramının uğurla həyata keçirilməsinə imkan verəcək”, - deyə deputat bildirib.

A.Hüseynovun sözlərinə görə, dayanıqlı icmaların yaradılması, sahibkarlıq fəaliyyəti üçün əlverişli mexanizmlər, gələcəkdə məşğulluğun təmin edilməsi kimi kompleks məqsədlər tədbirlər planında önəmli yer tutur. Dördillik müddətdə icraçı qurumların hesabatlılığının üç mərhələ üzrə - ilkin, aralıq və yekun nəticələr üzrə qiymətləndirilməsi diqqətəlayiqdir. Dövlət Proqramının Tədbirlər Planı 25 fərqli fəaliyyət istiqaməti üzrə ərazilərə Böyük Qayıdışla bağlı bütün mümkün aspektləri - yaşayış məntəqələrinin tikintisindən başlayaraq, məşğulluğun təmin edilməsi, bərk məişət tullantılarının idarə edilməsi sisteminədək ən müxtəlif tədbirləri əhatə edir.

Dövlət Proqramında nəzərdə tutulan tədbirlər hədəf göstəricilərinə uyğun olaraq 2026-cı ilədək həyata keçiriləcək. Həmin vaxtadək Qarabağ və Şərqi Zəngəzurda infrastruktur, iqtisadiyyat yenidən qurulacaq, sosial inkişaf, ətraf mühitin tarazlı inkişafı təmin ediləcək. Ərazilər minalardan və partlamamış hərbi sursatdan təmizlənəcək, ərazilərdə şəhər, qəsəbə və kənd yaşayış məntəqələrinin tikintisi və hamı üçün əlçatan, etibarlı, keyfiyyətli və dayanıqlı infrastruktur qurulacaq. Həmçinin yaşayış üçün rahat şərait yaradılması məqsədilə nəqliyyat-yol, rabitə, su, qaz, elektrik, istilik təmin olunacaq, o cümlədən həssas əhali qruplarının sosial müdafiəsi gücləndiriləcək. “Ağıllı şəhər”, “Ağıllı kənd” və “Yaşıl enerji zonası” konsepsiyaları öz həllini tapmaqla, ölkədə mənzil fondunun həcmi artırılacaq. Bir sözlə, Qarabağ və Şərqi Zəngəzur 2026-cı ilədək insanlarımızın firavan, təhlükəsiz yaşayacağı bir məkana çevriləcək”, - deyə Aydın Hüseynov inamını ifadə edib.