Bakı, 20 dekabr, Leyla Qurbanova, AZƏRTAC

Başa çatmaqda olan 2019-cu il Azərbaycan kikboksçuları üçün çox uğurlu olub. Bu il idmançılarımız iştirak etdikləri dünya, Avropa çempionatlarında, dünya kuboklarında, peşəkarlar arasında keçirilmiş beynəlxalq turnirlərdə parlaq nailiyyətlər əldə ediblər. Yığmamız bu günlərdə keçirilmiş və ilin sonuncu yarışı olan, Duysburqda ulu öndər Heydər Əliyevin xatirəsinə həsr edilən peşəkar turnirdə də böyük qələbəyə imza atıb. Azərbaycan komandası Almaniya kikboksçularını 5:1 hesabı ilə məğlub edərək turnirin qalibi olub.

Bu sözləri AZƏRTAC-a məxsusi müsahibəsində Azərbaycan Kikboksinq Federasiyasının vitse-prezidenti Güloğlan Cabbarov deyib.

Komandamız dünya çempionatlarını

böyük qələbə ilə başa vurub

Cari ildə kikboksinqin müxtəlif versiyaları üzrə təşkil edilmiş dünya çempionatlarında komandamızın böyük qələbələr qazandıqlarını vurğulayan G.Cabbarov deyib: “Bosniya və Herseqovinanın paytaxtı Sarayevoda kikboksinqin WAKO versiyası üzrə dünya çempionatında Azərbaycan komandası da iştirak edib. Dünyanın ən güclü kikboksçularının yarışdığı dünya çempionatlarında son illər idmançılarımız böyük qələbələr qazanırlar. Builki dünya çempionatına tam heyətlə qatılan yığmamız Vətənə doqquz medalla qayıdıb. Kikboksçularımızdan Eduard Məmmədov və Ramal Aslanov bütün rəqiblərini məğlub edərək qızıl medal qazanıblar. Antalyada dünya çempionatında isə Eduard Məmmədov qızıl medal qazanıb.

Gənclər arasında yarışlarda qızlarımız da uğurla çıxış ediblər

Federasiyanın vitse-prezidenti gənc kikboksçuların bu il əldə etdikləri uğurlardan söhbət açıb. Qeyd edib ki, onların arasında qızlarımız da fərqləniblər: “İdmançılarımız ilin əvvəlindən başlayaraq iştirak etdikləri turnirlərdə yüksək potensial nümayiş etdiriblər. Komandamız ilin ilk yarışı olan Avropa kubokunda uğurla iştirak edib. Bu yarışlarda gənclərimizdən Qəşəm Məmmədov, Elcan Atakişiyev və digərlərinin nailiyyətlərini xüsusi vurğulamaq istəyirəm. Eləcə də qızlarımızdan Lalə Mikayılovanın uğurla çıxış etməsi qızlar arasında bu idman növünə olan maraqdan irəli gəlir. Qızlarımız yığmada kişilərlə bərabər məşq edir, təcrübələrini artırır. “Qarabağ”, “Dinamo”, “Neftçi” və digər idman klublarında bu idman növü üzrə istedadlı qızlarımız yetişirlər. Bunların arasında Həmidə Mirzəliyeva, Lalə Mikayılova, Nərminə Ağayeva, Ozlem Həsənova, Nurcan Hüseynova beynəlxalq arenalarda keçirilən yarışlarda bir sıra nailiyyətlər qazanıblar.

Dünya kubokları, qitə çempionatı və beynəlxalq turnirlərdə

kikboksçularımızın nəticələri ürəkaçandır

Bu ilin ilk nüfuzlu yarışlarından biri olan, Budapeştdə keçirilmiş dünya kubokuna 16 idmançı ilə qatılan yığmamız yüksək nəticə göstərərək 3 qızıl, 4 gümüş, 4 bürünc medal qazanıb. Aprelin 16-19-da təşkil edilən yarışda Vüsal Kazımov, Amin Quliyev, Nicat Ələkbərli qızıl medal qazanıblar. Daha bir dünya kuboku isə sentyabrın 24-29-da Rusiyanın Anapa şəhərində təşkil edilib. Bu nüfuzlu yarışda komandamızın qazandığı qızıl medalların sayı 8-ə çatıb. Anapada qızıl medalları komandamızın aktivinə Nihat Tağızadə, Elcan Tanrıverdiyev, Anar Məmmədov, Amin Quliyev, Arzuman Qədimov, Əlihüseyn Əliyev, Kənan Cəfərli, Qəşəm Məmmədov yazdırıblar. Kikboksçularımızın Avropa çempionatında nəticələri də təqdirəlayiqdir. Belə ki, Macarıstanın Györ şəhərində keçirilən kikboksinqin WAKO versiyası üzrə qitə çempionatında Azərbaycan komandası 12 medal qazanıb. Bunlardan 5-i qızıl, 2-si gümüş və 5-i bürünc medaldır. Ənənəvi olaraq hər il təşkil edilən “Wizard Open” turnirində AKF-nin “Sərhədçi” komandası bu il də uğurları ilə diqqəti cəlb edib. Güloğlan Cabbarovun rəhbərliyi altında yarışlarda iştirak edən yığma üzvləri - Elcan Əlikişiyev, Elşad Şahbazov, Elməddin Baxşəliyev Vətənə qızıl medalla qayıdıblar. G.Cabbarov “Sərhədçi” klubunun prezidenti Cavid İsmayılova dəstəyə görə minnətdarlığını bildirib. O, əldə edilən nailiyyətlərdə kikboksinqin inkişafı istiqamətində həyata keçirilən tədbirlərin mühüm rolu olduğunu qeyd edib.

Dünyanın ən məşhur kikboksçuları arasında

azərbaycanlı idmançılar xüsusilə fərqlənirlər

Azərbaycanın ən tanınmış idmançılarından biri olan Eduard Məmmədov dünyanın çox güclü kikboksçularından biridir. G.Cabbarov builki nailiyyətlər sırasında E.Məmmədovun nəticələrini xüsusilə vurğulayıb: “Dəfələrlə Avropa və dünya çempionu olmuş “Ağ canavar” ləqəbli E.Məmmədov 2019-cu ildə ayrı-ayrı versiyalar üzrə iki dəfə dünya çempionu titulunu qazandı. Bütün dünya E.Məmmədovu ən güclü kikboksçulardan biri kimi tanıyır. Onun veteranlar arasında bu idman növünü davam etdirməsi kikboksinqə sevgisindən irəli gəlir. İnanıram ki, idmançımız veteranlar arasında dünyanın ən güclüsü adına dəfələrlə sahib olacaq. Eduard Məmmədovun yetirmələri də artıq beynəlxalq arenalarda öz sözlərini deməyə başlayıblar. Onun tələbəsi olan gənc kikboksçumuz Amin Quliyev artıq dünyanın ən güclüləri sırasına daxil olub”.

Federasiya rəsmisi daha bir güclü kikboksçumuz - "Lord" ləqəbli Ramal Aslanovun da bu il böyük uğurlara imza atdığını bildirib: “Azərbaycanlı kikboksçu R. Aslanovun Çində keçirilən beynəlxalq yarışda əldə etdiyi nəticələr təqdirəlayiqdir. İyirmi yeddi yaşlı idmançı Su Liu adlı yerli kikboksçunu məğlubiyyətə uğradıb. Həmin turnirdə FF döyüş təşkilatının ən güclüləri yarışırdı. R.Aslanov 2016-cı ildə Çində Qran-Prinin qalibi olaraq ən güclü 8 idmançı arasında birinci yeri tutmuşdu”.

Federasiya kikboksinqin inkişafı istiqamətində

geniş tədbirlər həyata keçirir

Güloğlan Cabbarov federasiyanın kikboksinqin inkişafı istiqamətində geniş tədbirlərin həyata keçirildiyini bildirib: “Son illər kikboksinqin inkişafı istiqamətində böyük işlər görülüb. Federasiyanın prezidenti Adil Əliyevin rəhbərliyi altında həyata keçirilən tədbirlər sayəsində kikboksçuların öz potensiallarından maksimum istifadə etmələri üçün geniş imkanlar yaranıb. Ötən illər olduğu kimi, 2019-cu ildə də ölkədaxili turnirlərdə kütləviliyin təmin edilməsinə xüsusi diqqət göstərilib. Yarışların paytaxt Bakı ilə yanaşı, həm də bölgələrdə təşkili bu idman növlərinin coğrafiyasının daha da genişləndirilməsinə xidmət edir. Ağcabədidə 28 May - Respublika Gününə həsr olunmuş Azərbaycan kubokunda 300-ə yaxın idmançı mübarizə aparıb. Bu ilin mayında keçirilmiş “VII Zirvə Beynəlxalq Uşaq Oyunları”nda Azərbaycanın bölgələrini və paytaxtını təmsil edən 30 klub və cəmiyyətlərdən idmançılar 8 çəki dərəcəsi üzrə mübarizə aparıblar. Eyni zamanda, ümummilli lider Heydər Əliyevin anadan olmasının 96-cı ildönümünə həsr olunmuş "Heydər Əliyev Kuboku" uğrunda yeniyetmələr və kadetlər arasında keçirilən kikboksinq üzrə Naxçıvan Muxtar Respublika açıq turnirində İran İslam Respublikasının və Rusiya Federasiyasının komandalar ilə yanaşı, Bakı şəhəri, "Neftçi,, "Teyd", "Qarabağ", "Zirvə", "Alliqator", "Ağsu", "Ağcabədi" və Naxçıvan Muxtar Respublikasının komandaları da mübarizə aparıblar”.

Vitse-prezident federasiyada məşqçi və hakimlərin hazırlığının da xüsusilə diqqət mərkəzində olduğunu bildirib: “Hakim və məşqçilərin daha da təkmilləşməsi üçün seminar və təlimlərin təşkili xüsusilə diqqət mərkəzindədir. Bu il hakimlərdən Aydın Ağabəyov B klass hakimlik dərəcəsini alıb. Mütəxəssis buna Bosniya və Herseqovinanın paytaxtı Sarayevoda keçirilən kikboksinqin WAKO versiyası üzrə dünya çempionatı zamanı nail olub. Bundan başqa federasiyanın iki hakimi-beynəlxalq dərəcəli hakim Elnur Əliyev və Məhəmməd Babayev WAKO hakimlik akademiyasını qızıl medalla başa vuraraq dünyanın 23 ən yaxşı hakimi sırasında oldular. Məhəmməd Babayev "C" kateqoriyali Beynəlxalq dərəcəli hakim adına layiq görülüb.

Milli komandamız artıq gələn il keçiriləcək yarışlara hazırlığa başlayıb. Belə ki, 2020-ci ilin əvvəlki aylarında uşaq, yeniyetmə, gənclər və böyüklər arasında Azərbaycan çempionatları keçiriləcək. Bu yarışlar kütləvi xarakter daşıyır və hər birində 1000-ə yaxın idmançı mübarizə aparır. İnanırıq ki, kikboksçularımız 2020-ci ildə də Azərbaycanın idman şərəfini layiqincə qoruyacaqlar”.