DÜNYA
Gürcüstan parlamentinə seçkilərdə qalib gəlmiş siyasi blokun lideri hökumətin yeni tərkibini elan etmişdir
Tbilisi, 8 oktyabr (AZƏRTAC). Gürcüstan parlamentinə oktyabrın 1-də keçirilmiş seçkilərdə qalib gəlmiş “Bidzina İvanişvili-Gürcü arzusu” siyasi blokunun lideri Bidzina İvanişvili yeni hökumətin tərkibinə namizədlərin adlarını elan etmişdir.
Blokun lideri Baş nazir vəzifəsinə özünün, parlamentin sədri vəzifəsinə isə David Usupaşvilinin namizədliklərini irəli sürmüşdür. Müdafiə naziri və Baş nazirin müavini vəzifəsinə İrakli Alasania, bölgələrin inkişafı və infrastruktur naziri, Baş nazirin müavini Kaxa Kaladze, daxili işlər naziri İrakli Qaribaşvili, xarici işlər naziri Maya Pancikidze, cəzaçəkmə, probasiya və hüquq yardımı naziri Sozar Subari, ədliyyə naziri Tea Culukiani, kənd təsərrüfatı naziri David Kirvalidze, mədəniyyət və abidələrin mühafizəsi naziri Quram Odisaria, əmək, səhiyyə və sosial müdafiə naziri Amiran Qamkrelidze, idman və gənclərlə iş naziri Levan Kipiani, reinteqrasiya məsələləri üzrə Dövlət naziri Paata Zakareişvili, Avropa və Avratlantikaya inteqrasiya məsələləri üzrə Dövlət naziri Aleksi Petriaşvili, diaspor məsələləri üzrə Dövlət naziri vəzifəsinə Konstantin Surquladzenin namizədlikləri təqdim olunmuşdur.
Qalan 7 nazirin namizədlikləri hələlik elan olunmamışdır.
İslam Əliyev
AZƏRTAC-ın xüsusi müxbiri
Tbilisi