CƏMİYYƏT
Hərbi Qənimətlər Parkında “2K11 Kruq” zenit-raket kompleksinin nümayişi Azərbaycan Ordusunun qəhrəmanlıq və şücaətinin bir nümunəsidir VİDEO
![](/files/galleryphoto/2024/2/1200x630/w_1617184400882382940876_1200x630.jpg)
![](/files/galleryphoto/2024/2/1200x630/w_161718440088380471851_1200x630.jpg)
![](/files/galleryphoto/2024/2/1200x630/w_1617184400886390464498_1200x630.jpg)
![](/files/galleryphoto/2024/2/1200x630/w_1617184400885789417423_1200x630.jpg)
![](/files/galleryphoto/2024/2/1200x630/w_1617184400883274050417_1200x630.jpg)
Bakı, 15 iyun, Göyçək Mahmudlu, AZƏRTAC
“2K11 Kruq” zenit-raket kompleksi 10 ilə yaxındır ki, Azərbaycan Ordusunun istismarından çıxarılıb
15 İyun - Milli Qurtuluş Günündə Müdafiə Nazirliyinin təşkilatçılığı ilə Hərbi Qənimətlər Parkına mediatur təşkil edilib.
Media nümayəndələri Xocalı rayonunda aşkar olunan Ermənistan silahlı qüvvələrinə məxsus "2K11 Kruq" zenit-raket kompleksi ilə tanış olublar.
Jurnalistlərə həmin hava hücumundan müdafiə (HHM) sisteminin təyinatı, taktiki-texniki xüsusiyyətləri, eləcə də Vətən müharibəsindən öncə Ermənistan silahlı qüvvələri tərəfindən hansı məqsədlərlə istifadə olunması barədə ətraflı məlumat verilib.
Antiterror əməliyyatının iştirakçısı, Azərbaycan Ordusunun zabiti, mayor Tural Şükürov AZƏRTAC-a müsahibəsində deyib: “Ötən ilin sentyabrında həyata keçirilən lokal xarakterli antiterror tədbirlərindən sonra Xocalı rayonu ərazisində aşkarlanmış “2K11 Kruq” zenit-raket kompleksinin tərkibinə daxil olan “1S32” raket tuşlama stansiyası, iki ədəd "2P24" buraxıcı qurğusu Bakı şəhərində “Hərbi Qənimətlər Parkı”nda yerləşdirilib. Kompleksə baxış keçirilərkən işlək vəziyyətdə olduğu müəyyən edilib.
Kompleks Ermənistan silahlı qüvvələri tərəfindən İkinci Qarabağ müharibəsində və ondan əvvəlki dönəmdə hava hücumundan müdafiə üzrə döyüş növbəsinə cəlb olunub. İkinci Qarabağ müharibəsində hava hücumu vasitələrimizə həmin kompleks tərəfindən zərər vurulmasına imkanı verilməyib. Kompleksin “1S32” raket tuşlama stansiyası 105 kilometrə qədər hədəflərin aşkarlanması və iki ədəd “2P24” buraxıcı qurğu üzərində yerləşdirilmiş “3M82 tipli raketlərin hədəfə yönəldilməsi, buraxılması, idarə olunması və məsafə üzrə 7 kilometrdən 50 kilometrədək, hündürlük üzrə 250 metrdən 23,5 kilometrədək məhvetmə zonasının daxilində olan hava hədəflərinin məhv edilməsi üçün təyin olunub. Kompleksin özəlliyi yüksək keçidlilik və tez bir zamanda yerdəyişmə qabiliyyətinə malik olmasıdır. Bunun səbəbi tırtıl üzərində yerləşdirilməsidir. Nəticədə relyef formasından asılı olmayaraq daha əlverişli nöqtələrdə mövqelənərək döyüş fəaliyyətini aparmağa, tez bir zamanda atəş tapşırığını yerinə yetirərək yerdəyişmə etməyə malikdir. Həmin tip kompleksləri aşkarlayıb yerindəcə məhv etmək bu baxımdan çətinlik yaradır. Azərbaycan Ordusunda da həmin komplekslərdən istifadə olunub. Hazırda daha müasir və effektiv hava hücumlarından mühafizə komplekslərimiz olduğu üçün həmin kompleks 10 ilə yaxındır ki, Azərbaycan Ordusundan istismardan çıxarılıb. İstismara yararlı olmasına baxmayaraq, ondan istifadə edilərək hava məkanının qorunmasına ehtiyac yoxdur. Ona görə də bu kompleks Hərbi Qənimətlər Parkında nümayiş üçün yerləşdirilib”.
Mayor Əsgər Məmmədovun sözlərinə görə, “2K11 Kruq” zenit-raket kompleksinin təyinatı 105 kilometr məsafədə uçan hava hədəflərinin aşkarlanması, tanınması, tapılması, izlənilməsi və onları 50 kilometrdən içəriyə doğru buraxılmaması üçün məhv edilməsidir. Qeyd olunub ki, kompleks tırtıl üzərində yerləşdiyi üçün yüksək manevretmə imkanına malikdir. Səfərdən-döyüşə, döyüşdən-səfərə gəlmək imkanları yüksək olduğu üçün ön bölmələrin hava hücumundan müdafiəsini təşkil etmək üçün nəzərdə tutulub.
Hərbi Qənimətlər Parkında nümayiş etdirilən “2K11 Kruq” zenit-raket kompleksi işlək vəziyyətdədir
Hərbi ekspert Ramil Məmmədli Ermənistanın vaxtilə işğal etdiyi Qarabağ və ətraf rayonlarda hava hücumundan müdafiə sistemini maksimum şəkildə gücləndirdiyini, müxtəlif təyinatlı hava hücumundan müdafiə sistemi ilə ərazinin müdafiəsini və mühafizəsini təşkil etdiyini diqqətə çatdırıb. Bildirilib ki, işğal dövründə Ermənistan silahlı qüvvələri Azərbaycan Ordusunun müxtəlif təyinatlı döyüş aviasiya vasitələrinə təhdidlər yaradır və onların sıradan çıxarılması üçün müxtəlif tədbirlər həyata keçirirdilər. Vətən müharibəsi dövründə Azərbaycan Ordusunun bölmələri düşmənin dərinliyində müxtəlif təyinatlı əməliyyatlar həyata keçirdilər. Həmin əməliyyatlar nəticəsində düşmən ordusu darmadağın edildi və işğal altında olan ərazilər azad olundu. Vətən müharibəsindən sonrakı dövrlərdə ərazinin dərinliklərində çoxlu sayda müxtəlif təyinatlı texnikalar qalmışdı. Həmin texnikalar mərhələli şəkildə aşkarlanırdı. Relyef dağlıq ərazi olduğundan burada müxtəlif sığınacaqlar, gizli yerlərin mövcudluğunu və orada həmin texnikaların gizlədilməsinin mümkün olduğunu bilirdik. Azərbaycan Ordusunun bölmələri də hava hücumundan müdafiə sisteminə aid olan zenit raket kompleksini aşkar etdilər.
“Müasir döyüşün aparılması qaydaları köklü şəkildə dəyişdirilib və bu gün biz buna bölgəyə yaxın olan ərazilərdə gedən müharibələrdə də şahid oluruq. Pilotsuz uçuş aparatlarından (PUA) istifadə edilməsi təcrübəsi daha da artıb və bir-birinin ardınca bütün ölkələr dronlardan istifadə edilməsi və onların öz ordularının arsenalına daxil edilməsi prosesini genişləndirirlər. Azərbaycan Ordusu da Vətən müharibəsi dövründə PUA-dan ən yüksək şəkildə istifadə edən və effektiv nəticələr əldə edən hərbi əməliyyatlar apardı. Bu tipli zenit raket kompleksləri də məhz PUA, yəni aşağı məsafədə uçuş həyata keçirən döyüş aviasiya vasitələrinin, ümumiyyətlə hərbi təyinatlı aviasiya vasitələrinin zərərsizləşdirilməsi, onların sıradan çıxarılması üçün istifadə olunur. Ermənistan ordusunun da məqsədi Azərbaycan Ordusunun müharibədə istifadə etdiyi pilotsuz uçuş aparatlarını sıradan çıxarmaq idi . Həmin cəhdlər effektsiz oldu və Ermənistan tərəfi öz istəyinə nail ola bilmədi. Ermənistan ordusu antiterror tədbirlərinə qədər də həmin texnikanın çıxarılmasına nail ola bilmədi. Bu da Azərbaycan Ordusunun effektiv sürətli hərbi əməliyyat keçirməsinin sayəsində idi. Bu gün Azərbaycanın Hərbi Qənimətlər Parkında - yəni Qələbəni özündə əks etdirən məkanda biz “2K11 Kruq” zenit-raket kompleksini görürük. Bu, əslində Azərbaycan Ordusunun, Azərbaycan əsgərinin qəhrəmanlıq və şücaətinin bir nümunəsidir.
Hazırda işğaldan azad edilmiş ərazilərdə axtarış işləri davam etdirilir. Müharibədən bir neçə il keçməsinə baxmayaraq, bu kimi texnikalar silah və sursatlar mərhələli şəkildə aşkarlanır və zərərsizləşdirilir. Burada nümayiş etdirilən “2K11 Kruq” zenit-raket kompleksi işlək vəziyyətdədir. Həmin kompleksə kiçik bir müdaxilə edilərsə, müəyyən təmir modelləşdirmə işləri həyata keçirilərsə, yüksək səviyyədə döyüş aparmaq qabiliyyətindədir”, - deyə hərbi ekspert bildirib.