Bakı, 16 sentyabr, AZƏRTAC

Tarif Şurasının yeni qərarı dərman vasitələrinin tənzimlənmiş qiymətlərdən aşağı qiymətə alınmasına imkan verəcək.

Bunu AZƏRTAC-a açıqlamasında “Əczaçılar Klubu” İctimai Birliyinin sədri Şövqi Bunyatov bildirib. O qeyd edib ki, bu dəyişiklik dərman vasitələrinə əlçatanlığın təmin olunması, çeşidlərin çoxaldılması, keyfiyyətə nəzarətin artırılması və onların daha aşağı qiymətə satılması məqsədi daşıyır. Onun sözlərinə görə, ölkədə dərman çatışmazlığının səbəblərindən biri qiymət siyasətidir. Bu səbəbdən Tarif Şurasının müvafiq qərarları ilə dərman vasitələri üçün vahid qiymət tətbiq olunurdu və bütün apteklərdə dərman vasitələri həmin vahid qiymətə satılırdı. Bu hal vətəndaşlarda dərman sektoruna, əczaçılara olan münasibəti müsbət mənada yenidən formalaşdırdı. Məsələn, qərara görə, hər hansı bir dərman vasitəsinin qiyməti 5 manat olaraq təsdiqlənərdisə, bu, vahid qiymət hesab olunurdu və bütün apteklərdə 5 manata satılmalı idi. Ş.Bunyatov əlavə edib ki, Tarif Şurasının yeni qərarını əvvəlkilərin məntiqi davamı kimi də hesab etmək olar. Dövrün tələbinə uyğun olaraq verilən yeni qərara görə, təsdiqlənmiş satış qiymətləri yuxarı hədd hesab olunur. Yəni, təyin olunmuş məsələn, 5 manat həmin dərman vasitəsinin maksimal qiyməti sayılır və apteklər onu 5 manatdan aşağı qiymətə də sata bilərlər.

İctimai Birliyin sədri bildirib ki, ən başlıcası yeni qərar bu sahədə daha əlverişli rəqabət mühitinin yaradılmasına və əhali tərəfindən dərman vasitələrinin tənzimlənmiş qiymətlərdən aşağı qiymətə alınmasına imkan verəcək, dərman vasitələrinə əlçatanlığın yaxşılaşdırılmasını təmin edəcək. Sadələşdirmə ölkəmizə dərman idxalını stimullaşdıracaq və əhalinin dərmanlarla təchizatını yaxşılaşdıracaq. Maksimum 4 ay ərzində dərman vasitələrinin qeydiyyatının aparılması apteklərdə dərman təminatında yaranan “pəncərələr”in qarşısını alacaq.

Şövqi Bunyatov əlavə edib ki, hazırda ölkəmizdə yerli istehsalla bağlı önəmli işlər görülməkdədir. Ümumilikdə əczaçılıq məhsullarına tələbatın yerli istehsal hesabına ödənilməsi ilə idxaldan asılılığın azaldılması, istehsalın lokallaşdırılması məqsədilə yeni müəssisələr yaradılır, eləcə də qanunvericilik təkmilləşdirilir. Məhz əczaçılıq sənayesinin inkişaf etdirilməsi məqsədilə Prezident İlham Əliyevin Sərəncamı ilə Pirallahı Sənaye Parkı yaradılıb. Ümumi ərazisi 30 hektar olan Pirallahı Sənaye Parkında hazırda 6 sahibkarlıq subyekti rezident kimi qeydiyyatdan keçib ki, bunlardan da ikisi artıq fəaliyyət göstərir. Bununla yanaşı, Azərbaycanda elektron reseptlərin tətbiqi gözlənilir. Bu, əhaliyə təyin olunan dərman vasitələrinə nəzarətin gücləndirilməsinə və bioloji fəallığa malik qida əlavələrinin reseptə yazılmasının qarşısının alınmasına müsbət təsir göstərəcək. Reseptə dərman vasitəsinin adının deyil, təsiredici maddənin (beynəlxalq patentləşdirilməmiş ad) yazılması tələbi əhalinin müxtəlif ticarət adlarından lüzumsuz asılılığının azaldılmasına və daha uyğun qiymətə dərman vasitəsi seçmək imkanını artıracaq. Yəni, artıq konkret dərman yox, onun tərkibi yazılacaq, bu da xəstəyə eyni tərkibli çoxsaylı dərmanlar arasında istəyinə və büdcəsinə uyğun olanı almaq imkanı verəcək.

Elektron reseptin tətbiqi Azərbaycanın əczaçılıq sektorunun inkişafına böyük təkan verə bilər. Baş tutacaq bu tətbiqin mükəmməl işləməsi üçün əczaçıların maariflənməsi də vacib məsələlərdən biridir.