Bakı, 25 avqust, AZƏRTAC

Azərbaycanda COVID-19 pandemiyası ilə mübarizə tədbirləri dövlət başçımızın birbaşa diqqət mərkəzində, nəzarətində olan məsələdir. Vətəndaşlarımızın sağlamlığının hər şeydən üstün tutan dövlətimiz pandemiya təhlükəsinin yarandığı ilk günlərdən bu istiqamətdə ortaya qoyduğu real fəaliyyətini hər zaman nümayiş etdirib. Təsadüfi deyil ki, ölkəmizdə pandemiya ilə mübarizə tədbirləri beynəlxalq təşkilatlar və müxtəlif dövlətlər tərəfindən də yüksək qiymətləndirilməkdədir. Koronavirusla mübarizə istiqamətində verilən qərarlar zamanı yalnız ölkə vətəndaşlarının sağlamlığı düşünülüb. Dövlətin bütün resursları və imkanları da məhz bu məqsədlə səfərbər edilib, ölkə əhalisi ən yüksək səviyyədə sosial qayğı ilə təmin olunub.

Bunu AZƏRTAC-a açıqlamasında Azərbaycan Gənc Alim, Aspirant və Magistrlər Cəmiyyətinin sədri, Təhsil Nazirliyi yanında İctimai Şuranın məsul katibi İlqar Orucov söyləyib.

O bildirib ki, bu gün ölkəmizdə virusun lokallaşdırılması, yoluxmaların sayında azalmanın dinamikası da vətəndaşların dövlətlə həmrəyliyinin nəticəsində mümkün olub. Sadə vətəndaş dövlət başçısının timsalında həm sosial məsafənin gözlənilməsi, həm virusla mübarizədə tələb olunan qaydalara əməl edilməsi nümunəsini görərək daha məsuliyyətli davranır.

“Ölkə başçımız hər zaman məmurlara, dövlət işində yüksək vəzifə tutanlara xalqa xidmət etməyə, qanunlara riayət etməyə, vəzifələrinin onlara əlavə imtiyazlar vermədiyini xatırladır və bunu ciddi tələb edir. Amma görünən odur ki, bir qrup şəxs hələ də özlərini xüsusi imtiyaz sahibi kimi apararaq qanunlara, dövlətə, xalqa qarşı çıxırlar. Təəssüf doğuran budur ki, bu adamlar həm qanunverici orqanda, həm ölkəmizin hakim partiyasında təmsil olunan, insan hüquqlarının qorunmasına birbaşa cavabdeh olan şəxslərdir, ən yüksək elmi titulları daşıyan və davranışları ilə cəmiyyətə nümunə olmalı insanlardır. Bu insanlar qanunu bilə-bilə pozmaqla əslində qanunlara meydan oxumaq niyyətlərini ortaya qoyublar. İctimai qınaq onların təlqin etdikləri pis nümunəyə qarşı bu nümunəni aradan qaldırmaq üçün ən güclü vasitədir. Prezident İlham Əliyevin və birinci xanım Mehriban Əliyevanın karantin dövründə gördüyü işlərə dəstək olmaq bu adamların, ilk növbədə, vəzifə, digər tərəfdən mənəvi borclarıdır. Karantin qaydalarını pozan sadə vətəndaşa qarşı qanun hansı mövqeyi ortaya qoyursa, məmura qarşı da eyni münasibəti ortaya qoyur. Dövlət-vətəndaş münasibətlərində etimadın azalmasına gətirib çıxaran bu kimi zərərli hallara qarşı hamı mübarizə aparmalıdır”,- deyə İlqar Orucov bildirib.