Tokio, 15 noyabr, AZƏRTAC

Noyabrın 14-dən 15-nə keçən gecə Tokioda Yaponiya İmperatoru Naruhitonun taxta çıxması ilə əlaqədar “Daycosay” (Böyük minnətdarlıq) yekun mərasimi başlayıb.

AZƏRTAC xəbər verir ki, mərasimin ilk günündə Baş Nazir Şinzo Abe də daxil olmaqla, 700-dək qonaq iştirak edib. Dekabrın əvvəllərinədək davam edəcək mərasim zamanı İmperator Yaponiya xalqının rifahı, sülh və bol məhsul üçün dualar edəcək.

Qeyd edək ki, “Daycosay” İmperator taxtdan imtina etdikdən sonra onun vəliəhdinin taxta çıxmasına həsr edilən mühüm mərasimlərdən biri hesab edilir. Mərasimin əsas hissəsi olan “Daycoku-no-qi” ayini İmperator sarayının ərazisindəki Şərq bağlarında xüsusi quraşdırılmış kompleksdə icra edilir. İmperator evinin mistik ayini hesab edilən bu mərasimin tarixi Nara dövrünə (710-794-cü illər) gedib çıxır.

Mərasimin birinci hissəsi noyabrın 14-də yerli vaxtla saat 18:30-da İmperatorun kompleksin Yuki zalına daxil olması ilə başlayıb. Mərasimin maraqlı cəhəti ondan ibarətdir ki, axşam qaranlıq düşdükdən sonra icra edilən bütün ayinlər zamanı elektrik enerjisindən istifadə etmək olmaz.

İmperator burada Günəş İlahəsi “Amaterasu-omikami”nin və digər Allahların şərəfinə yeni düyü məhsulunu və ərzaqları ianə kimi təqdim edib.

Həmin düyü tısbağa çanağında müəyyən edilən seçim yolu ilə Yaponiyanın iki prefekturasında məxsusi olaraq bu mərasim üçün yetişdirilib. Yaponiyanın şərqindəki Toçiqi və qərbindəki Kioto prefekturalarında yetişdirilən həmin düyü İmperator sarayına gətirilərək burada ondan məxsusi sake çəkilib və ianə üçün ayrılıb.

Allahlar qarşısında təzim edən İmperator qədim yapon dilində tərtib edilmiş müraciəti oxuyaraq, ölkəsinə sülh və bol məhsul göndərilməsi üçün dualar edib. Bundan sonra isə özü də yeni düyü məhsulu və digər qidalardan qəbul edib.

Çoxqatlı ağ kimono geyinmiş İmperatriçə Masako da Yuki zalının yaxınlığında Allahlara dualar edib. Mərasimdə qədim paltarlar geymiş şahzadə-vəliəhd Akişino və İmperator evinin digər üzvləri iştirak ediblər.

Mərasimin ikinci mühüm hissəsi üçün nəzərdə tutulan Suki zalına saat 00:30-da daxil olan İmperator digər ayinləri icra edib.

Həmin ayin başa çatdıqdan sonra İmperator Suki zalını tərk edib.

“Daycoku-no-qi” ayininin böyük banketləri özündə birləşdirən hissələri isə şənbə və bazar günləri keçiriləcək.

İmperatorun taxta çıxması ilə əlaqədar olan bütün bu mərasimlər dekabrın 4-də Naruhitonun İmperator sarayındakı müqəddəslərə ehtiramını ifadə etməsi ilə başa çatacaq.

Vüqar Ağayev

AZƏRTAC-ın xüsusi müxbiri

Tokio