Aprelin 15-də AŞPA Siyasi Məsələlər Komitəsinin Dağlıq Qarabağ münaqişəsi üzrə məruzəçisi Terri Devis Milli Elmlər Akademiyasında tanınmış tarixçi alimlərlə- akademiklər İqrar Əliyev, Cəmil Quliyev, Tofiq Köçərli, tarix elmləri doktorları Məşədixanım Nemətova, Fəridə Məmmədova və digərləri ilə görüşmüşdür.

MEA-nın prezidenti, akademik Mahmud Kərimov qonağı salamlayaraq demişdir ki, bu və ya digər məsələyə yanaşmada hər kəsin öz mövqeyi, öz fikri olur. Alimlər isə öz fikirlərində yalnız faktlara əsaslanırlar. Dağlıq Qarabağ məsələsinə gəldikdə isə, fakt ondan ibarətdir ki, Azərbaycanin ərazi bütövlüyü pozulub, torpaqlarının 20 faizi işğal olunub, bir milyon əhalisi doğma yurd-yuvasından didərgin düşüb. Bunlar faktdır. İşğal altındakı ərazilərdə qalmış qəbiristanlıqlarımız, maddi-mədəniyyət abidələrimiz, bundan əlavə, ermənilərin Azərbaycan torpaqlarına köçürülməsi haqqında arxivlərdəki sənədlər də faktdır. Faktlara müxtəlif münasibət bəslənilə bilər, ancaq onları heç vəchlə saxtalaşdırmaq olmaz. Biz bu gün müvəqqəti uduzmuş tərəf olsaq da, alimlərimiz heç vaxt faktları saxtalaşdırmayıblar.

M.Kərimov Terri Devis kimi obyektiv siyasətçinin Dağlıq Qarabağ münaqişəsi üzrə məruzəçi təyin olunmasının Azərbaycanda böyük ümid doğurduğunu qeyd etdikdən sonra demişdir: İnanırıq ki, bu ağrılı problemə obyektiv yanaşacaqsınız. Alimlərimiz sizi maraqlandıran suallara cavab verməyə hazırdırlar.

Terri Devis tarixçi alimlərlə görüşmək üçün yaradılmış imkana görə təşəkkürünü bildirmiş və onlara vacib suallarının olduğunu demişdir. Qonaq görüşün bu mərhələsinin jurnalistlər olmadan keçirilməsini arzulamışdır...

Görüşdən sonra Milli Məclis sədrinin müavini Ziyafət Əsgərov AZƏRTAC-ın müxbiri ilə söhbətində demişdir ki, Terri Devis ilk dəfədir Azərbaycanda olur. Elə ilk dəfədir ki, Avropa Şurası da bu məsələ ilə bağlı məruzəçi təyin edib. Alimlərlə görüş Terri Devisin öz təşəbbüsüdür, istəyir ki, problemin kökünə varsın, məsələnin tarixini alimlərdən eşitsin. Əlbəttə o, münaqişənin tarixini bilir. Söhbət ermənilərin Qarabağda məskunlaşmasından gedir. Cənab Devisi əsasən iki sual maraqlandırır: azərbaycanlılar Dağlıq Qarabağa qayıdandan sonra onların təhlükəsizliyi problemi necə həll olunacaq; ermənilər burada nə vaxtdan yaşayırlar?

Zənnimcə, qonaq maraqlandığı suallara ətraflı, elmi cəhətdən əsaslandırılmış cavablar aldı. Mən bu qənaətdəyəm ki, Terri Devis Azərbaycana protokol xatirinə gəlməyib. Onun obyektiv mövqe tutacağına inanıram.