Bakı, 17 iyun (AZƏRTAC). Azərbaycan Respublikası Prezidentinin 2008-ci il 25 avqust tarixli Sərəncamı ilə təsdiq edilmiş “2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı”na uyğun olaraq İqtisadi İnkişaf Nazirliyinin Sahibkarlığa Kömək Milli Fondu bu ilin aprel ayında müasir standartlara cavab verən ətlik istiqamətli quşçuluq (o cümlədən damazlıq broyler) təsərrüfatlarının yaradılması və ya müasir texnologiyaların tətbiqi ilə yenidən qurulması üzrə investisiya layihələrinin güzəştli qaydada maliyyələşdirilməsi məqsədi ilə sahibkarlıq subyektlərindən təkliflərin qəbulunu elan etmişdir.

2010-cu il iyunun 16-dək sahibkarlıq subyektləri tərəfindən 12 təklif (Abşeron iqtisadi rayonu üzrə 6, Aran iqtisadi rayonu üzrə 3, Dağlıq Şirvan iqtisadi rayonu üzrə 1, Gəncə-Qazax iqtisadi rayonu üzrə 1, Şəki-Zaqatala iqtisadi rayonu üzrə 1 təklif) daxil olmuşdur.

İyunun 17-də SKMF-ə təqdim edilmiş təklif zərfləri sahibkarların, müvəkkil kredit təşkilatlarının və kütləvi informasiya vasitələrinin iştirakı ilə açılmışdır.

SKMF-in icraçı direktoru Şirzad Abdullayev sahibkarlıq subyektlərinin investisiya təkliflərinin “Azərbaycan Respublikası Sahibkarlığa Kömək Milli Fondunun vəsaitlərinin istifadəsi Qaydaları”na uyğun olaraq araşdırılacağını və iyulun 2-də güzəştli qaydada maliyyələşdiriləcək layihələrin sahibkarların və KİV nümayəndələrinin iştirakı ilə elan ediləcəyini bildirmişdir. Qeyd etmişdir ki, investisiya layihələrinin ən azı 30 faizi sahibkarların vəsaiti, qalan hissəsi isə Sahibkarlığa Kömək Milli Fondunun güzəştli kreditləri hesabına maliyyələşdiriləcəkdir. Bununla belə, investisiya layihələrinin reallaşdırılmasında Azərbaycan İnvestisiya Şirkəti və onun törəmə şirkətlərinin payçı qismində iştirakı da mümkündür. Bu istiqamətdə tədbirlərin gələcəkdə də davam etdiriləcəyini qeyd edən Ş.Abdullayev həyata keçiriləcək layihələrin regionların inkişafında əhəmiyyətli olacağını vurğulamışdır.

######