Bakı, 21 noyabr, AZƏRTAC 

Noyabrın 21-də Azərbaycan Milli Elmlər Akademiyasının (AMEA) Rəyasət Heyətində İctimai Elmlər Bölməsinin büro iclası keçirilib.

AMEA-dan AZƏRTAC-a bildiriblər ki, bölmənin akademik-katibi, akademik Nərgiz Axundova iştirakçılara gündəlikdəki məsələlər barədə məlumat verib. Prezident İlham Əliyevin AMEA-nın İqtisadiyyat İnstitutunun 60 illik yubileyi münasibətilə bu elmi müəssisənin bir qrup əməkdaşına fəxri adların verilməsi haqqında müvafiq Sərəncam imzaladığını xatırladan akademik bildirib ki, həmin alimlər bölmənin fəxri fərmanlarına da layiq görülüblər.

Sonra N.Axundova institutun əməkdaşlarına fəxri fərmanları təqdim edib. Həmçinin elmi fəaliyyətində əldə etdiyi uğurlu nəticələrə görə AMEA-nın Hüquq və İnsan Haqları İnstitutunun şöbə müdiri, hüquq elmləri doktoru Ramin Qurbanov da bölmənin fəxri fərmanı ilə təltif olunub.

Tədbirdə AMEA-nın Hüquq və İnsan Haqları İnstitutunun Gənc Alimlər və Mütəxəssislər Şurasının sədri, hüquq elmləri doktoru Ayxan Rüstəmzadə “AMEA-nın Hüquq və İnsan Haqları İnstitutunda hüquqi islahatlar ilə bağlı aparılan işlər və bu sahənin inkişafında atılan addımlar” mövzusunda məruzə ilə çıxış edib. Alim ölkə başçısının 2016-cı il 26 may tarixli Sərəncamına əsasən AMEA-nın İnsan Hüquqları üzrə Elmi Tədqiqat İnstitutunun Hüquq və İnsan Haqları İnstitutu adlandırıldığını xatırladıb. Qeyd edib ki, AMEA-nın Rəyasət Heyətinin qərarı ilə institutda hüquq elminin yaradıcılığı, eləcə də nəzəri və praktiki problemləri ilə məşğul olan bir sıra şöbələr yaradılıb.

Bildirilib ki, institut Azərbaycan Respublikası Prezidenti Administrasiyası, Milli Məclis, Ədliyyə Nazirliyi, Daxili İşlər Nazirliyi, Baş Prokurorluq, Təhsil Nazirliyi, Xarici İşlər Nazirliyi, habelə BMT, Avropa Şurası, NATO, ATƏT-in Demokratik Təsisatlar və İnsan Hüquqları Bürosu kimi dövlət qurumları və beynəlxalq təşkilatlarla, bir sıra xarici ölkələrin müvafiq elmi-tədqiqat müəssisələri, dövlət və qeyri-hökumət təşkilatları ilə əməkdaşlıq edir. İnstitutun elmi fəaliyyətlə yanaşı, beynəlxalq əlaqələrini də genişləndirdiyini söyləyən məruzəçi qurumun ölkənin elmi-mədəni və ictimai-siyasi həyatında fəal iştirak etdiyini, 1999-2018-ci illərdə 250-dək seminar, treninq və konfrans keçirdiyini diqqətə çatdırıb.

A.Rüstəmzadə son illər institutda həyata keçirilən bir sıra mühüm layihə və tədbirlər haqqında geniş məlumat verib, ölkə və beynəlxalq səviyyədə insan hüquqlarının müdafiəsi ilə əlaqədar qarşıdakı məqsədlərə çatmaq üçün əməkdaşların daha səylə çalışacaqlarını bildirib.

Məruzə dinlənildikdən sonra müzakirə aparılıb.

Sonra elmi-təşkilati və kadr məsələlərinə baxılıb, müvafiq qərarlar qəbul edilib.