1997-ci ilin martında dövlətinizin başçısı Heydər Əliyevin Ukraynaya ilk rəsmi səfəri oldu. O vaxt mən Kiyev Şəhəri İcra Hakimiyyəti başçısının müavini idim. Heydər Əliyev həmin tarixi səfər çərçivəsində Kiyev meriyasına da gəldi. Lakin mənim Heydər Əliyev ilə şəxsi tanışlığım Bələdiyyə İdarəsinin Sütunlu salonunda oldu. Burada Ukrayna paytaxtının meri Aleksandr Omelçenko Azərbaycan dövlətinin başçısına şəhərin fəxri qonağı Fərmanını və qəhrəman şəhər Kiyevin rəmzi açarını təqdim etdi. Heydər Əliyeviçin Fəxri qonaqlar kitabımıza necə səmimi sözlər yazdığı indiyədək yadımdadır...

Bir neçə il sonra, 2001-ci ilin sentyabrında mənə Ukrayna nümayəndə heyətinin tərkibində Bakıya gəlmək nəsib oldu. Biz Azərbaycan paytaxtına GUÖAM-ın üzvü olan ölkələrin qadınlarının I Forumunda iştirak etməyə gəlmişdik.

Məlum olduğu kimi, GUÖAM çərçivəsində qadın təşkilatı yaradılması təşəbbüsü də Azərbaycan Prezidenti Heydər Əliyevə məxsusdur. Zənnimcə, bu, qadın və ailə problemlərinə, cəmiyyətdə qadınların rolunun artırılmasına, onlara kişilərlə hüquq bərabərliyi statusu verilməsi məsələsinə dövlət başçısının xüsusi diqqət yetirməsinin daha bir bariz təzahürüdür.

Bakıya səfərimiz çərçivəsində GUÖAM qadınları I Forumu iştirakçılarının Heydər Əliyev ilə unudulmaz görüşü oldu. Düşünürdüm ki, görüş qısa olacaq, necə deyərlər, protokol xarakteri daşıyacaqdır. Lakin mühüm, aktual mövzularda söhbət düz iki saat çəkdi. Heydər Əliyev görüş iştirakçılarının hər birinə söz verdi, onları diqqətlə dinlədi. Heydər Əliyevin ünsiyyətdə sadəliyi, xeyirxahlığı və incə yumor hissi bizim hamımızı ruhlandırdı və biz öz planlarımız, layihələrimiz barədə fikirlərimizi onunla bölüşdük.

Heydər Əlirza oğlu, özü demişkən, ən fəal və həmrəy diaspor kimi tanıdığı Ukraynadakı Azərbaycan diasporu ilə münasibətlərimiz barədə mənə sual verdi. Mən ona Ukrayna Azərbaycanlıları Konqresi ilə birgə layihələri uğurla həyata keçirməyə imkan verən səmimi tərəfdaşlıq münasibətlərimizdən danışdım.

O tarixi söhbətdən özümüz üçün xeyli yeni və mühüm nəticələr əxz etdik. Azərbaycanın başlıca problemi - Dağlıq Qarabağ münaqişəsi, Heydər Əliyevin uzunsürən bu münaqişənin sülh yolu ədalətli həlli üçün göstərdiyi səylər barədə ətraflı məlumat aldıq.

Yalnız çadır düşərgələrində yaşayan azərbaycanlı qaçqın-köçkünlərin faciəsi ilə şəxsən tanış olduqdan sonra, biz evsiz-eşiksiz qalmış bu binəsiblər barədə danışarkən Prezidentin gözlərinin nə üçün kədərlə dolduğunu anladıq.

Bizim Prezidentlə görüşümüzü elə həmin axşam Azərbaycan televiziyasının birinci kanalı ilə tam göstərdilər. Onda mən anladım ki, Prezident təkcə özü bizimlə tanış olmurdu, həm də bütün Azərbaycanı GUÖAM-a daxil olan ölkələrin elçiləri ilə tanış edirdi. Odur ki, haraya getsək, hətta çadır düşərgələrində belə bizi tanıyır və salamlayırdılar. Bu, hakimiyyətin açıqlığından, onun şəffaflığından, xalqın marağını ölkənin problemlərinə cəlb etmək istəyindən xəbər verirdi.

Heydər Əliyevlə tanış olandan sonra mən onun xalq arasında nə üçün belə böyük nüfuz sahibi olmasının, belə sevilməsinin səbəbini anladım. Çünki o, Azərbaycan millətinin xeyirxahlıq, ürək genişliyi, mərdlik, qadınlara hörmət, güclü haqq-ədalət hissi, xəyanətə və saxtakarlığa nifrət kimi ən yaxşı xüsusiyyətlərini özündə təcəssüm etdirən dahi şəxsiyyətdir.

Onun xanımı və ömür-gün dostu Zərifə Əziz qızına bəslədiyi riqqətli münasibət məndə xüsusi hörmət hissi doğurur. Heydər Əliyev ona bütün ömrü boyu sadiq qalmışdır.

Belə insan heç vaxt, heç bir şəraitdə nə xidmət etdiyi işə, nə xalqına, nə də ölkəsinə xəyanət etməz!

Mən Ukraynanın böyük dostu Prezident Heydər Əliyevə Azərbaycan millətinin firavanlığı və xoşbəxtliyi, Azərbaycanın tərəqqisi, müstəqil dövlətlərimizin xalqları arasında qardaşlıq münasibətlərinin daha da inkişafı naminə uzun ömür arzulayıram.

Söhbəti yazdı: Zeynal Ağazadə

AZƏRTAC-ın xüsusi müxbiri

Kiyev