İQTİSADİYYAT
İş stajları barədə məlumatların toplanmasının yekunlaşması pensiya təyinatının tam avtomatlaşdırılmasına imkan verəcəkdir
Bakı, 14 mart (AZƏRTAC). Hazırda Dövlət Sosial Müdafiə Fondunun mərkəzi məlumat bazasında ölkə əhalisinin 40 faizi, yəni 1 milyon 272 min nəfər pensiyaçı və fərdi hesab açılmış 2 milyon 390 min nəfər sığortaolunan barədə müvafiq məlumatlar toplanmışdır.
AZƏRTAC xəbər verir ki, bunu Dövlət Sosial Müdafiə Fondunun sədri Səlim Müslümov “Heydər Əliyev 90: İqtisadi modernləşdirmə” mövzusunda konfransdakı çıxışında bildirmişdir.
S.Müslümov qeyd etmişdir ki, 2011-ci ilin dördüncü rübündən məcburi dövlət sosial sığorta haqları üzrə hesabatların və məlumatların sığortaedənlər tərəfindən elektron formada təqdim olunmasına başlanılmış, cari il martın 1-nə elektron ərizə ilə müraciət etməklə qeydiyyatdan keçmiş 19 min 257 sığortaedən kod, parol və şifrə ilə təmin edilmişdir.
Fondun 36 yerli orqanının Kütləvi Ödənişlər üzrə Mərkəzləşdirilmiş İnformasiya Sisteminə (KÖMİS) qoşulması nəticəsində sığortaedənlərin məcburi dövlət sosial sığorta haqları üzrə ödənişlərinin real vaxt rejimində qəbulu üçün 300 min sığortaedən haqqında məlumat KÖMİS sisteminə inteqrasiya edilmiş, 2012-ci ilin son 6 ayı və cari ilin 2 ayı ərzində bu sistem vasitəsilə 10,1 milyon manat məcburi dövlət sosial sığorta haqqı daxil olmuşdur.
S.Müslümov demişdir ki, hazırda pensiya təyinatının avtomatlaşdırılması üzərində işləyirik. Pensiyaların sığorta hissəsinin 2006-cı ildən sonrakı dövr üzrə formalaşan məbləği fərdi uçot məlumatları əsasında təyin olunur. 2006-cı ildən əvvəlki dövrə aid iş stajları barədə məlumatların toplanması isə davam etdirilir. Bu prosesin yekunlaşdırılması pensiya təyinatının tam avtomatlaşdırılmasına imkan verəcəkdir.
Pensiya ödənişi aparılan pensiyaçıların 99 faizinin pensiyasının avtomatlaşdırılmış qaydada plastik kartlarla ödənilməsi təmin olunduğunu deyən S.Müslümov, bu məqsədlə respublikanın müxtəlif şəhər və rayonlarında 673 əlavə bankomatın quraşdırıldığını vurğulamışdır.