İsmayıllı rayonuna infotur başa çatmışdır
Bakı, 6 avqust (AZƏRTAC). Mədəniyyət və Turizm Nazirliyinin dəstəyi, “Millennium Tourism & Congress DMC” turizm şirkətinin təşkilatçılığı ilə İsmayıllı rayonuna ikigünlük infotur başa çatmışdır.
AZƏRTAC xəbər verir ki, reklam xarakteri daşıyan turun təşkili bu regiondakı “Qırx otaq əfsanəsi” və “Fit dağının əfsanəsi” turizm marşrutlarının populyarlaşması ilə bağlı olmuşdur.
İnfoturda Mədəniyyət və Turizm Nazirliyinin, turizm şirkətlərinin əməkdaşları və KİV nümayəndələri iştirak etmişlər.
İnfoturun gedişində iştirakçılar etnoqrafik cəhətdən məşhur olan Basqal və Lahıc qəsəbələrinə getmiş, həmçinin Buzxana, Qırxotaq abidələrinə, Fit və Niyal dağlarındakı qalaların qalıqlarına tamaşa etmişlər.
İştirakçılara regionda turist xidmətinin keyfiyyətinin yaxşılaşdırılması və onun səviyyəsinin müasir standartlara çatdırılmasına dair məlumatlar verilmişdir.
Bildirilmişdir ki, İsmayıllıda turistlərin rayon haqqında, onun tarixi keçmişi haqqında geniş təsəvvür yaradılmasına xidmət göstərən Heydər Əliyev Mərkəzi, 2 tarix-diyarşünaslıq muzeyi fəaliyyət göstərir.
Diqqətə çatdırılmışdır ki, Lahıc qəsəbəsində 108, Basqal qəsəbəsində isə 23 tarixi abidə mühafizə olunur. Bütövlükdə rayon üzrə 233 tarixi və mədəniyyət abidəsi qorunub saxlanılır.
İnfotur çərçivəsində iştirakçılar İsmayıllı rayonunun mədəni-tarixi abidələri ilə tanış olmuşlar.
Bölmənin digər xəbərləri
