İstanbul, 18 aprel, AZƏRTAC

Aprelin 18-də İstanbulda Dünya Azərbaycanlıları Konqresinın (DAK) XIII qurultayı keçirilib.

Türk dünyasının müxtəlif bölgələrində şəhid olmuş insanların xatirəsinin bir dəqiqəlik sükutla anılması, Azərbaycanın və Türkiyənin dövlət himnlərinin oxunması ilə başlayan qurultayda 25 ölkədən, o cümlədən ABŞ, Avstraliya, Almaniya, İsveçrə, Türkiyə, Rusiya, Ukrayna, Gürcüstan, Polşa, Çexiya, İraqdan 152 nümayəndə və qonaq iştirak edib.

Qurultayda Türkiyənin hakim AKP və digər partiyalarının rəsmiləri, Türkiyə Böyük Millət Məclisinin deputatları, QHT rəhbərləri, Azərbaycan diaspor təşkilatlarının təmsilçiləri, tanınmış ictimai-siyasi xadimlər, alimlər, ziyalılar iştirak ediblər.

Əvvəlcə DAK-ın həmsədrləri Sabir Rüstəmxanlı və Firudin Pərviz Nianın hesabat məruzələri dinlənilib.

Təşkilatın fəaliyyəti barədə məlumat verən məruzəçilər Avropa Parlamentinin əsassız “erməni soyqırımı” ilə bağlı qətnaməsini kəskin tənqid ediblər. Diqqətə çatdırılıb ki, XIX əsrin sonlarından başlayaraq terror və silahlı qiyamlarla Osmanlı dövlətində, o cümlədən indiki İran və Azərbaycan Respublikası ərazilərində müsəlman və türk əhaliyə qarşı amansız qırğınlar törədən ermənilər zaman-zaman öz cinayətlərini gizlətmək üçün havadarlarının dəstəyindən istifadə ediblər.

DAK-ın həmsədri Sabir Rüstəmxanlı deyib: “Yüz ildən bəri Qərb ölkələrinin Türkiyəyə təsir mexanizmi kimi istifadə etdikləri “erməni soyqırımı” iddiası bu gün öz pik nöqtəsinə çatıb. Həqiqətdən qorxan, tarixin əsl simasını görmək istəməyənlər Türkiyə ilə təzyiq və ultimatum dili ilə danışırlar. Demokratiyadan dəm vuran ölkələrin çoxunun siması belədir. Qurultay üçün biz İstanbulu ona görə seçdik ki, sözdə “erməni soyqırımı” şousu ərəfəsində Türkiyənin yanında olaq. Zatən, biz hər zaman bərabərik, lakin indi bu birliyə daha çox ehtiyac var. Çünki bir millətik. Eyni taleni yaşayırıq. Çirkab türkə atılırsa, onun bir hissəsi bizə yapışır. Çünki Xocalı soyqırımının səbəbi orada yaşayanların Azərbaycan türkü olması idi. Bu gün dünyanın Ermənistanın işğalçılığına göz yummasının, ona “Azərbaycanı tərk et” deyilməməsinin, münaqişənin guya həlli adı altında 25 ildən bəri dondurulmasının səbəbi də bizim türk olmağımızdır. Bu səbəbdən bizim birlikdən başqa çarəmiz yoxdur”.

Sabir Rüstəmxanlı deyib ki, dünya soyqırımı iddiasının yalan olduğunu bilir, lakin Türkiyənin “gəlin arxivlərimizi açaq, sənədləri araşdıraq” çağırışını eşitməzliyə vurur. Halbuki əsl soyqırımını ermənilər Azərbaycan türklərinə qarşı törədiblər. 1918-ci ildə Bakı, Şamaxı, Quba qırğınları törədildi, on minlərlə insan vəhşicəsinə öldürüldü. Təkcə Xocalı faciəsi erməni vəhşiliyinin sübutu üçün yetərlidir. Dünya Xocalı soyqırımını tanımalıdır və tanıyacaq.

Sonra təşkilati məsələlərə baxılıb. Sabir Rüstəmxanlı və Firudin Pərviz Nian yenidən Dünya Azərbaycanlıları Konqresinın həmsədrləri seçiliblər.

Qurultay uydurma “erməni soyqırımı” ilə bağlı bəyanat qəbul edib.

Bəyanatda saxta “erməni məsələsi” və uydurma “erməni soyqırımı” anlayışlarının siyasi gündəmə gətirilməsinə münasibət bildirilir. Qədim Azərbaycan torpaqlarında yaradılan Ermənistan dövlətinin təcavüzkar siyasətinə dair faktların yer aldığı bəyanatda Birinci Dünya müharibəsi dövründə ermənilərin Osmanlı dövlətinə qarşı silahlı cinayətlərindən, çoxsaylı xəyanətlərindən bəhs edilir. Qeyd olunur ki, bütün bu həqiqətlər avropalı tarixçilərə yaxşı məlumdur. Lakin siyasi maraqlardan ortaya çıxan ikili standartlar nəticəsində saxta “erməni soyqırımı” mövzusu ilə Türkiyəyə qarşı təzyiqlər davam etdirilir. Bəyanatda, həmçinin Ermənistan tərəfindən Azərbaycan xalqına qarşı törədilmiş Xocalı soyqırımı barədə həqiqətlər xatırlanır.

Dünya Azərbaycanlıları Konqresi bəyan edir ki, saxta “erməni soyqırımı” mövzusu adı altında Avropada qəbul olunan siyasi qərarlara qarşı sərt mübarizəyə keçəcək.

Sabir Şahtaxtı

AZƏRTAC-ın xüsusi müxbiri

İstanbul