Bakı, 7 avqust (AZƏRTAC). İyul ayında Bakı Banklararası Valyuta Birjasının elektron hərraclar sisteminin (BEHS) valyuta bölməsində hərracların ümumi həcmi 50.974 milyon manat, yaxud 65.000 milyon dollar təşkil etmişdir. Hərraclarda cəmi 11 bank iştirak etmişdir. Hesabat ayında 46 hərrac sessiyası keçirilmiş və 29 əqd qeydə alınmışdır.

Birjanın informasiya-təhlil şöbəsindən AZƏRTAC-a bildirmişlər ki, USD/AZN_TOD aləti üzrə hərracların həcmi 46.262 milyon manat və 59.000 dollar, SWAP_USD/AZN_TOD_1WEEK aləti üzrə dövriyyə 4.712.400 milyon manat, yaxud 6.0 milyon dollar təşkil etmişdir. Bu zaman ABŞ dollarının manata nisbətdə orta məzənnəsi 1 dollar üçün 0,7854 AZN təşkil etmişdir.

İyul ayında valyuta bölməsində hərracların həcmi iyun ayı ilə müqayisədə 13.937 milyon manat və ya 38 faiz artmışdır.

Birjanın elektron hərraclar sistemində USD/AZN aləti üzrə orta gündəlik dövriyyə iyul ayında təqribən 2,826 milyon dollara çatmış, hər əqdin orta həcmi 2,241 milyon dollar təşkil etmişdir.

Qeyd edək ki, milli valyutanın USD/AZN_TOD aləti üzrə birja məzənnəsi hesabat ayında 0,05 faiz azalaraq, 1 dollar üçün 0,7831 AZN-dən 0,7835 AZN-ə düşmüşdür.

İyul ayının yekunlarına görə, EHBS sistemi çərçivəsində fəaliyyət göstərən Mütəşəkkil Banklararası Kredit Bazarında hərracların ümumi həcmi 2 milyon manat təşkil etmişdir.

Market-meyker bankların sifarişləri əsasında 90 günlük BakiBOR kreditləri üçün hesablanan orta aylıq faiz dərəcəsi manatla illik 10,25 faiz, ABŞ dolları üzrə isə 11,24 faiz təşkil etmişdir. BakIBID üzrə 90 günlük faiz dərəcəsi manatla illik 4,38 faiz, ABŞ dolları üzrə 4,23 faiz təşkil etmişdir.