SİYASƏT
KOMİTƏNİN İCLASINDA PAYIZ SESSİYASINDA MÜZAKİRƏYƏ ÇIXARILACAQ QANUN LAYİHƏLƏRİ MÜZAKİRƏ OLUNMUŞDUR
Bakı, 10 sentyabr (AZƏRTAC). Sentyabrın 10-da Milli Məclisin sosial siyasət komitəsinin iclası keçirilmişdir.
Komitənin sədri Hadi Rəcəbli cari ilin yay sessiyasında görülmüş işlər, qarşıdakı payız sessiyası üçün qanunvericilik işləri planı barədə məlumat vemişdir. Ötən yay sessiyasında komitənin məhsuldar işlədiyini bildirən sədr, əsas diqqəti qarşıdan gələn payız sessiyasında müzakirəyə çıxarılması nəzərdə tutulan qanun layihələrinə yönəltmişdir.
Bildirilmişdir ki, sosial siyasət komitəsi Milli Məclisin növbəti sessiyasında əhalinin sosial müdafiəsinin gücləndirilməsi məsələləri ilə bağlı bir sıra qanun layhələri hazırlayıb parlamentin müzakirəsinə tövsiyə etməklə yanaşı, qanunvericilik təşəbbüsü qaydasında Milli Məclisə daxil olmuş bəzi mövcud məcəllə və qanunlara əlavələr və dəyişikliklər nəzərdə tutan sənədlər üzərində də işləri davam etdirir.
Hadi Rəcəbli demişdir ki, komitə payız sessiyasında “Azərbaycan Respublikasının İnzibati Xətalar Məcəlləsində dəyişiklik edilməsi haqqında”, “Prokurorluq haqqında”, “Prokurorluq orqanlarında qulluq keçmə haqqında”, “Əmək pensiyaları haqqında”, “Ətraf mühitin mühafizəsi haqqında”, “Xüsusi mühafizə olunan təbiət əraziləri və obyektləri haqqında”, “Təbii müalicə ehtiyatları, müalicə-sağlamlaşdırma yerləri və kurortlar haqqında” və digər qanunlara əlavələr və dəyişikliklərlə bağlı layihələri Milli Məclisin müzakirəsinə çıxarmağı planlaşdırır.
İclasda növbəti sessiyanın gündəliyinə təklif edilən “Əhalinin sağlamlığının qorunması məqsədi ilə Azərbaycan Respublikasının bəzi qanunvericilik aktlarına əlavələr və dəyişikliklər edilməsi haqqında” qanun layihəsi geniş müzakirə mövzusu olmuşdur.
Komitənin sədri H.Rəcəbli deputatlara layihə barədə məlumat verərək bildirmişdir ki, bu əlavələr və dəyişikliklərdə diqqəti cəlb edən əsas məqamlardan biri əhalinin sağlamlığı məsələsinə cavabdehlik daşıyan həkimlərin hər 5 ildən bir müəyyən səviyyədə əlavə təhsillə əhatə olunmaları, onların sonradan imtahan verərək müvafiq sertifikat almaları ilə bağlıdır. Bildirilmişdir ki, bu tələb təkcə ali təhsilli həkimlərə deyil, orta tibb işçilərinə və əczaçılara də şamil olunacaqdır.
Qanunvericilik təşəbbüsü qaydasında təklif edilən bu əlavə və dəyişiklik deputatlar arasında qızğın diskussiyaya səbəb olmuş və nəticədə layihə üzərində yenidən işlənməsi və qanunvericilik təşəbbüsü subyekti ilə məsləhətləşmədən sonra müzakirəyə çıxarılması qərara alınmışdır.
İclasda Milli Məclisin payız sessiyasının müzakirəsinə təklif olunan digər qanun layihələrinin komitənin qanunverilik işləri planına daxil edilməsi barədə qərar yekdilliklə təsdiq edilmişdir.