CƏMİYYƏT
Latviya hakimlərinin konqresində CEPEJ-in prezidenti Ramin Qurbanov da iştirak edib
Bakı, 4 noyabr, AZƏRTAC
Latviyanın Siqulda şəhərində bu ölkə hakimlərinin konqresi keçirilib.
AZƏRTAC xəbər verir ki, Latviya Prezidenti Eqils Levitsin də qatıldığı konqresdə Avropa Şurası Ədalət Mühakiməsinin Səmərəliliyi üzrə Avropa Komissiyasının (CEPEJ) rəhbəri Ramin Qurbanov iştirak edib.
Latviya dövlətinin başçısı Eqils Levits konqresdə açılış nitqi ilə çıxış edərək tədbirin əhəmiyyətini vurğulayıb və hakimlərə tövsiyələrini verib.
CEPEJ tərəfindən Latviyanın məhkəmə sisteminin təkmilləşdirilməsi, bu sahədə elektron xidmətlərin yaradılması, vətəndaşların məhkəmələrə inamının artırılması, biznes mühitinin əlverişliliyinin yüksəldilməsi üçün məhkəmələrin daha əlçatan və şəffaf olması, mediasiya və hüquqi yardım sahələrində islahatların aparılması istiqamətində 2017-2019-cu illərdə beynəlxalq ekspertlərin cəlb olunması ilə Avropa standartlarına cavab verən geniş islahatlar aparılıb. Həmin islahatların müsbət nəticələri nəzərə alınaraq, CEPEJ-in rəhbəri Ramin Qurbanov Latviya Prezidenti tərəfindən qəbul olunub və görülmüş işlərə görə minnətdarlıq ifadə edilib.
Latviyanın bütün hakimlərinin iştirakı ilə hər il təntənəli şəkildə keçirilən hakimlərin builki yiğincağında, həmçinin Latviya Baş Nazirinin müavini, Ədliyyə naziri Janis Bordans, CEPEJ-in prezidenti Ramin Qurbanov və Latviya Ali Məhkəməsinin, habelə Məhkəmə Şurasının sədri İvars Biçkoviçs çıxış ediblər.
Çıxışlardan sonra ədalət mühakiməsinin səmərəliliyi və keyfiyyəti, hakim fəaliyyətinin qiymətləndirilməsi və intizam məsuliyyəti, onların təlimi və deontologiyası, vətəndaşların və sahibkarların ədliyyəyə əlçatımlığı məsələləri müzakirə olunub, habelə Latviya Məhkəmə Şurasına yeni üzvlərin seçkisi keçirilib.
Səfər çərçivəsində CEPEJ-in prezidenti Ramin Qurbanov Latviya Ali Məhkəməsi və Məhkəmə Şurasının sədri, habelə Ədliyyə naziri ilə 2020-2021-ci illərdə birgə reallaşdırılacaq yeni layihənin müzakirəsi üçün ikitərəfli görüşlər keçirib. Yeni layihənin başlanmasına dair Latviya ictimaiyyətini məlumatlandırmaq məqsədilə geniş mətbuat konfransı da təşkil olunub.