Bakı, 7 aprel (AZƏRTAC). Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının xarici QHT-lər üçün qrant müsabiqəsi proqramına uyğun olaraq maliyyələşdirdiyi “Demokratik Siyasi İnstitutun dondurulmuş münaqişələrin həlli üçün perspektivləri və siyasi cəhdlər” layihəsi çərçivəsində aprelin 11-13-də Vilnüsdə beynəlxalq konfrans keçiriləcəkdir.

Şuradan AZƏRTAC-a bildirmişlər ki, Azərbaycan, Gürcüstan və Moldovanın ərazi bütövlüyünün pozulması və torpaqlarının işğalına həsr olunan konfransda postsovet məkanında dondurulmuş münaqişələrin mümkün həlli mexanizmləri və perspektivləri müzakirə ediləcəkdir. Toplantıda münaqişə zonalarında baş verən kütləvi qırğınların, həmçinin Xocalı soyqırımının da müzakirə olunması nəzərdə tutulur.

Konfransda Litvanın Xarici İşlər Nazirliyinin, QHT-lərin, elmi təsisatların nümayəndələrinin, Avropa Parlamentinin üzvlərinin, deputatların, diplomatik korpus və KİV təmsilçilərinin, münaqişələrin həlli üzrə tanınmış beynəlxalq ekspertlərin iştirakı nəzərdə tutulmuşdur.

Şura sədri, Milli Məclisin deputatı Azay Quliyev konfransda keçmiş Sovet məkanında mövcud olan analoji münaqişələr, o cümlədən Azərbaycanın ərazi bütövlüyünün pozulması faktı və münaqişənin beynəlxalq hüququn prinsiplərinə əsaslanan həlli variantları ilə bağlı təkliflərini bildirəcəkdir. O, həmçinin doğma yurdlarından köçkün düşmüş 1 milyondan artıq azərbaycanlının pozulmuş hüquqlarını və Ermənistan-Azərbaycan, Dağlıq Qarabağ münaqişəsi ilə bağlı ölkəmizin vətəndaş cəmiyyətinin mövqeyini səsləndirəcəkdir.