RƏSMİ XRONİKA
LORD CANER: BİZ AZƏRBAYCANDAKI İNKİŞAFA VALEH OLMUŞUQ
AZƏRBAYCAN RESPUBLİKASININ BAŞ NAZİRİ İLHAM ƏLİYEV BÖYÜK BRİTANİYA PARLAMENTİNİN NÜMAYƏNDƏ HEYƏTİNİ QƏBUL ETMİŞDİR
İLHAM ƏLİYEV qonaqları səmimiyyətlə qarşılayaraq dedi:
-Hörmətli lord Caner, hörmətli dostlar, Böyük Britaniya parlamentinin üzvləri, sizi səmimi qəlbdən salamlayıram, “Azərbaycana xoş gəlmisiniz!” deyirəm.
Ölkələrimiz arasında mövcud olan münasibətlər çox yüksək səviyyədədir. Biz bir çox sahələrdə uğurlu əməkdaşlıq edirik. Xüsusilə neft və qaz sektorunda Britaniya şirkətlərinin Azərbaycana kapital qoyuluşunun həcmi çox yüksəkdir. Bu, bizi çox sevindirir. Böyük Britaniya şirkətləri Azərbaycan üçün, region üçün, bizim gələcəyimiz üçün çox mühüm layihələrdə aparıcı rol oynayırlar.
Siyasi məsələlərdə də münasibətlərimiz çox yüksək səviyyədədir. Azərbaycan Respublikası Prezidentinin Böyük Britaniyaya rəsmi səfərindən sonra bu münasibətlər yeni pilləyə qalxmışdır. Ümidvaram ki, həm siyasi, iqtisadi məsələlərdə, həm də iki ölkəni birləşdirən digər məsələlərdə əlaqələrimiz daha da inkişaf edəcəkdir. Biz bunu Avropa Şurasının sessiyalarında, komitələrində, komissiyalarında əyani şəkildə görürük. Böyük Britaniyanın nümayəndələri ilə çox uğurlu əməkdaşlıq edirik və deyə bilərəm ki, Azərbaycan, region üçün çox vacib olan məsələ - Ermənistan-Azərbaycan, Dağlıq Qarabağ münaqişəsi üzrə məruzəçi də məhz Böyük Britaniyanın nümayəndəsidir. O vaxt bir neçə namizəd irəli sürülmüşdü və məhz Azərbaycan nümayəndə heyətinin təkidi ilə Böyük Britaniya parlamentinin üzvü cənab Devid bu vəzifəyə təyin olunmuşdur. Baxmayaraq ki, ilkin mərhələdə Ermənistan nümayəndə heyəti buna etiraz etmişdi.
Bir sözlə, ölkələrimiz arasında olan münasibətlər bizi qane edir. Biz, sadəcə, bu münasibətlərin daha da gücləndirilməsini, genişləndirilməsini istəyirik. Beləliklə, iki ölkə bir-biri ilə daha yaxınlaşa bilər və əminəm ki, belə də olacaqdır.
Nümayəndə heyətinin rəhbəri, Dünya Yəhudilər Konqresinin vitse-prezidenti LORD CANER səmimi qəbula görə Baş nazirə təşəkkür edərək dedi:
-Cənab Baş nazir, Sizə çox minnətdarıq. Ölkənizdə bizi çox hərarətli və səmimi qarşılayıblar. Baş nazir vəzifəsinə yüksəlməyiniz münasibətilə Sizi təbrik etmək istəyirik. Yəqin bizim baş nazir də Sizə deyər, bu, heç də asan bir iş deyildir.
Biz Azərbaycan Prezidentinin ölkəmizə rəsmi səfərini çox yaxşı xatırlayırıq. Bu, həqiqətən çox uğurlu bir səfər idi. Sİzdən xahiş edirik ki, bizim salamlarımızı Prezident Heydər Əliyevə yetirəsiniz. Biz onun tezliklə sağalmasını və Vətənə dönməsini arzu edirik.
Sizin kimi biz də əlaqələrimizin inkişafından çox məmnunuq. Böyük Britaniya ilə Azərbaycan arasında əlaqələr bütün sahələrdə sürətlə inkişaf edir. Bizim sözlərimizi xüsusilə sənaye sahəsində çalışanlar daha çox təsdiq edərlər. Dünən biz bp şirkətinin nümayəndələri ilə görüş keçirdik. Onlar burada neft sənayesinin inkişafında iştirak etməkdən çox məmnundurlar. Çox şadıq ki, bu görüşdə bizi Böyük Britaniyanın səfiri müşayiət edir. Eyni zamanda, Sizin ölkənin Birləşmiş Krallıqdakı səfiri haqqında da xoş sözlər demək istəyirəm. O, Azərbaycanın mənafeyi üçün çox yaxşı fəaliyyət göstərir və mənim yaxın dostuma çevrilmişdir.
Cənab Baş nazir, biz Sizə Lordlar və İcmalar palatalarının hədiyyələrini təqdim etmək istəyirik.
Lord Canerdən hədiyyələri qəbul edən Baş nazir İLHAM ƏLIYEV dedi:
-Hədiyyələrə görə sizə təşəkkür edirəm, çox sağ olun. Bunlar mənim üçün çox əzizdir. Hesab edirəm ki, sizin Azərbaycana səfəriniz ölkələrimizi daha da yaxınlaşdıracaqdır.
Siz çox düzgün qeyd etdiniz ki, bp şirkəti ilə Azərbaycan arasında artıq 10 ilə yaxındır davam edən əməkdaşlıq bizim üçün çox vacibdir və bir çox məsələlərdə ölkəmizin iqtisadi gələcəyini təmin edəcəkdir.
Azərbaycan xarici sərmayələr üçün açıq bir ölkədir. Bu, bizim Prezidentin siyasətidir, onun tərəfindən həyata keçirilən neft strategiyasının tərkib hissəsidir. Yəqin siz də bilirsiniz ki, bizim ölkədə xarici vətəndaşlar özlərini çox sərbəst, rahat hiss edirlər, onların işləməsi və yaşaması üçün çox gözəl şərait vardır. Xalqımız çox qonaqpərvərdir və xarici ölkələrin vətəndaşlarına böyük hörmətlə yanaşır.
Mən bilirəm ki, sizin proqramınızda bölgələrə səfərlər də nəzərdə tutulmuşdur. Əminəm ki, bu səfərlər də nümayəndə heyətinizin üzvləri üçün çox maraqlı olacaqdır. Biz istəyirik ki, Azərbaycan hərtərəfli inkişaf etsin. Əlbəttə, sərmayələrin gəldiyi əsas yer Bakıdır, neft sənayesidir. Ancaq biz çox maraqlıyıq ki, Azərbaycanın hər bir bölgəsi inkişaf etsin, ölkəmizin hər bir vətəndaşı aparılan böyük işlərin nəticəsini hiss etsin. Əminəm ki, bu, belə də olacaqdır.
Səfər zamanı Azərbaycanda böyük inkişafın şahidi olduqlarını vurğulayan LORD CANER dedi:
-Cənab Baş nazir! Siz bildirdiniz ki, ölkənizin hər bir vətəndaşının həyata keçirilən böyük işlərdən bəhrələnməsini istəyirsiniz. Deməliyəm ki, burada olduğumuz müddətdə biz, həqiqətən, ölkənizdəki inkişafa valeh olmuşuq. Eyni zamanda, Azərbaycanda mövcud olan tolerantlıqdan da çox məmnun qalmışıq, bu, bizi çox valeh etdi. Nümayəndə heyətimizin üzvləri ilk yəhudi məktəbinin açılışında iştirak etdilər. Burada biz gördük ki, həqiqətən, ölkənizdə dinlər arasında əməkdaşlıq mövcuddur. Baxmayaraq ki, Azərbaycanda əhalinin əksəriyyətini müsəlmanlar təşkil edirlər. İstərdim ki, bütün ölkələr bu məsələdə Sizdən nümunə götürsünlər və müxtəlif dinlər bir-birinə qarşı bu dərəcədə dözümlü olsunlar. Əgər belə olarsa, onda biz dünyanı daha da gözəlləşdirərik və həyat asan olar.
X X X
Sonda Baş nazir İlham Əliyev qonaqları maraqlandıran suallara cavab verdi.
Qəbulda Prezidentin İcra Aparatının xarici əlaqələr şöbəsinin müdiri Novruz Məmmədov, Milli Məclisin beynəlxalq münasibətlər və parlamentlərarası əlaqələr daimi komissiyasının sədri Səməd Seyidov, Böyük Britaniyanın Azərbaycandakı səfiri Endryu Taker, Azərbaycanın Böyük Britaniyadakı səfiri Rəfael İbrahimov, digər rəsmi şəxslər iştirak edirdilər.
***
AZƏRBAYCAN RESPUBLİKASININ BAŞ NAZİRİ CƏNAB İLHAM ƏLİYEVƏ
Hörmətli İlham Heydər oğlu!
Məsul vəzifəyə - Baş nazir vəzifəsinə təyin olunmağınız münasibətilə Sizi səmimi qəlbdən, ürəkdən təbrik edirəm. Biz Azərbaycan Respublikası prezidentinin növbəti seçkilərinə Sizin namizədliyinizin irəli sürülməsinə də şadıq.
Siz daha yaxşı həyat şəraiti yaratmaq xəttini ardıcıl surətdə aparan, öz həmvətənlərinə, sözün əsl mənasında, qayğı göstərən, yaradıcı və qurucular olan siyasətçilər və rəhbərlər kateqoriyasını təmsil edirsiniz. Azərbaycan xalqının rifahı naminə uğurlu fəaliyyətiniz mahaçqalalılara yaxşı məlumdur.
Dağıstanlılarla azərbaycanlıların talelərində oxşar cəhətlər olduqca çoxdur. Bizi bərəkətli Qafqaz torpağında birgə yaşayışın çoxəsrlik tarixi birləşdirir və bu, prinsipcə yeni tarixi reallıqların, mədəni-ideoloji və siyasi meyllərin, qardaş xalqlarımızın və dövlətlərimizin gələcəkdə qarşılıqlı münasibətlərinin və əməkdaşlığının inkişafının dərk edildiyinə inam yaradır.
Sizə möhkəm cansağlığı, xoşbəxtlik, həyatda və Azərbaycan Respublikasının bütün vətəndaşlarının rifahı naminə fəaliyyətinizdə yeni-yeni uğurlar arzulayıram. Əminik ki, Siz Azərbaycan Respublikasının Prezidenti Heydər Əliyevin layiqli davamçısı olacaqsınız.
Sizə əmin-amanlıq və firavanlıq diləyirik!
Səid Əmirov
Mahaçqala Şəhər İcra Hakimiyyətinin
başçısı, Dağıstan Yerli Hakimiyyətlər İttifaqının sədri
Mahaçqala, 29 avqust 2003-cü il.
***
AZƏRBAYCAN RESPUBLİKASININ BAŞ NAZİRİ CƏNAB İLHAM ƏLİYEVƏ
Çox hörmətli İlham Heydər oğlu!
Azərbaycanın Baş naziri vəzifəsinə yüksək təyinatınız münasibətilə çoxminli əmək kollektivlərimizin adından və şəxsən öz adımdan ən səmimi təbrikləri qəbul edin.
Birgə işlədiyimiz illəri xatırlayaraq və Sizin məqsədyönlüyünüzə, sevimli işə həvəslə yanaşmağınıza, peşəkarlığınıza, tükənməz enerjinizə və fitri istedadınıza bələd olaraq, inamla deyə bilərəm ki, Azərbaycan xalqının seçimi son dərəcə uğurludur.
Sizə indiyədək qazandığınız nailiyyətləri yeni, məsul vəzifədə böyük uğurla davam etdirməyi, xoşbəxtlik, cansağlığı, bütün Azərbaycan xalqına əmin-amanlıq və tərəqqi arzulayıram.
Həmişə səmimiyyətlə Sizin,
Sergey Kovanda
“Şimal-Şərqi Alyans” səhmdar kommersiya
bankı Direktorlar şurasının sədri
Moskva, 22 avqust 2003-cü il.