Kişinyov, 4 iyun (AZƏRTAC). MDB İcraiyyə Komitəsinin mətbuat xidmətindən bildirmişlər ki, MDB İqtisadi Şurasının 42-ci iclası iyunun 19-da Kişinyovda keçiriləcəkdir. Gündəliyə 14 məsələ daxil edilmişdir. İclasın iştirakçıları ən mühüm məsələlər sırasında MDB dövlətləri ərazisindən keçən beynəlxalq nəqliyyat dəhlizlərinin razılaşdırılması haqqında Saziş layihəsini nəzərdən keçirəcəklər. Bu mühüm sənədi MDB dövlətlərinin Əlaqələndirmə Nəqliyyat Müşavirəsi və Birlik dövlətlərinin dəmiryol nəqliyyatı Şurası MDB İcraiyyə Komitəsi ilə birlikdə müzakirəyə təqdim etmişlər.

Saziş layihəsi MDB dövlətlərinin 2020-ci ilədək olan dövr üçün nəqliyyat sahəsində Birliyin hökumət başçıları Şurasının 2008-ci il 14 noyabr tarixli qərarı ilə təsdiq edilmiş əməkdaşlığın Prioritet istiqamətlərinə müvafiq surətdə işlənib hazırlanmışdır. Sənəd normativ-hüquqi harmoniyalaşdırma, resurs və informasiya-loqistika təminat sistemləri əsasında MDB ölkələri ərazilərindən keçən beynəlxalq nəqliyyat dəhlizlərinin sahələrindən istifadə olunması və inkişafı məsələlərini nizamlayır.

Sazişin müddəalarının həyata keçirilməsi beynəlxalq nəqliyyat dəhlizlərinin fəaliyyəti üçün optimal nəqliyyat-iqtisadi şəraitin yaradılmasına, müxtəlif növ məhdudiyyətlərin aradan qaldırılmasına, Birlik dövlətləri ərazilərindən yüklərin və sərnişinlərin maneəsiz daşınması üçün əlverişli şərait yaradılmasına, əlavə tranzit axınlarının cəlb olunmasına kömək göstərəcəkdir.

MDB üzrə yüklərin hansı ölkəyə aid olunmasının müəyyənləşdirilməsi Qaydaları haqqında Saziş layihəsi barədə məsələ də çox vacibdir. Bununla əlaqədar, yaxın aylarda MDB-də həmin Qaydaların yeni redaksiyası tətbiq ediləcəkdir.

MDB dövlətlərinin milli elektroenergetika sistemlərinin dövlətlərarası istismarı xətti sahəsində Birlik dövlətlərinin əməkdaşlığı haqqında Saziş layihəsi hazırlanmış və MDB-nin Elektroenergetika Şurası və MDB İcraiyyə Komitəsi tərəfindən birlikdə gündəliyə daxil edilmişdir. Mövcud layihənin məqsədi MDB ölkələrinin dövlətlərarası elektrik ötürücü xətlərinin etibarlı və səmərəli işini təmin edən normativ-hüquqi bazanın yaradılmasıdır.

İqtisadi Şura MDB Hökumət Başçıları Şurasının 2008-ci il 14 noyabr tarixli qərarı ilə müəyyənləşdirilmiş 2020-ci ilədək olan dövr üçün Birlik dövlətlərinin innovasiya əməkdaşlığının Dövlətlərarası məqsədli proqramı layihəsinin işlənib hazırlanması üzrə İşçi qrupunun yaradılmasına dair məsələni nəzərdən keçirəcəkdir.

İclasda Birlik dövlətləri başçılarının 2003-cü ilin sentyabr ayında təsdiq etdikləri 2003-2010-cu illərdə MDB dövlətlərinin iqtisadi sahədə inkişafının və qarşılıqlı fəaliyyətinin səmərəliliyinin artırılmasına istiqamətlənmiş mühüm tədbirlərin həyata keçirilməsi Planının yerinə yetirilməsi gedişi ətraflı müzakirə ediləcəkdir.

MDB İqtisadi Şurası cari fəaliyyətlə əlaqədar bir sıra məsələləri də nəzərdən keçirəcək, növbəti iclasın vaxtını və keçiriləcəyi yeri müəyyənləşdirəcəkdir.