Füzuli, 8 avqust, Tahir Ağaməmmədov, AZƏRTAC

Məmur-vətəndaş münasibətləri sağlam əsaslar üzərində qurulmalıdır. Dövlət qurumlarının nümayəndələri xalqla bir yerdə olmalı, vətəndaşların müraciətlərinə, problemlərinin həllinə qayğı ilə yanaşmalıdırlar.

AZƏRTAC-ın bölgə müxbiri xəbər verir ki, bu fikirlər Horadiz şəhərindəki Muğam Mərkəzində məmur-vətəndaş münasibətlərinə həsr olunan müşavirədə səsləndirilib.

Füzuli Rayon İcra Hakimiyyətinin başçısı Alı Alıyev rayonun hüquq-mühafizə orqanlarının, idarə, müəssisə və təşkilatlarının, digər xidmət sahələri rəhbərlərinin, yerli icra hakimiyyəti orqanlarının, bələdiyyə sədrlərinin iştirak etdiyi müşavirədə əhalinin problemlərinin həlli, sosial rifahının yaxşılaşdırılması istiqamətində həyata keçirilən tədbirlərdən, rayonun işğaldan azad edilmiş ərazilərində aparılan geniş quruculuq və abadlıq işlərindən danışıb. Bildirib ki, Prezident İlham Əliyevin əhalinin problemlərinin öyrənilməsi, həll edilməsi, vətəndaş-məmur münasibətlərində şəffaflığın təmin edilməsi barədə tapşırıqları Füzuli rayonunda daim diqqət mərkəzində saxlanılır. Rayonun yaşayış məntəqələrində mütəmadi olaraq vətəndaşlarla görüşlər keçirilir, onların təklif və qayğıları həll edilir. 2018-ci ilin birinci yarısında müəyyən olunmuş qrafik əsasında rayon ərazisində və məcburi köçkünlərin sıx məskunlaşdığı digər şəhər və rayonlarda 20 səyyar qəbul keçirilib. Səyyar qəbullarda 758-dən çox, rayon icra hakimiyyətində isə 1547 vətəndaşın müraciəti dinlənilib.

Müşavirədə rayon prokuroru, polis şöbəsinin rəisi, mərkəzi xəstəxananın baş həkimi, Dövlət Sosial Müdafiə Fondunun rayon şöbəsinin müdiri, qaz, elektrik, su və digər xidmət təşkilatlarının rəhbərləri çıxış ediblər.

Bildirilib ki, hər bir dövlət məmuru vətəndaşlara qayğı ilə yanaşmalı, kobudluğa yol verməməli, xalqa, dövlətə ləyaqətlə xidmət etməlidir.

Müşavirədə iş adamları, sahibkarlar da dinlənilib. Diqqətə çatdırılıb ki, dövlət başçısının respublikada sahibkarlığın inkişaf etdirilməsi, sahibkarlar üçün yerlərdə şərait yaradılması barədə tapşırıqları Füzuli rayonunda uğurla icra olunur. Sahibkarlar üçün yaradılan şəraitin nəticəsidir ki, iş adamları rayonda kənd təsərrüfatı, kiçik emal müəssisələri yaradaraq məhsul bolluğu yaradır, yeni iş yerləri açır, fəaliyyətlərini genişləndirir, rayonun iqtisadiyyatının möhkəmlənməsində yaxından iştirak edirlər. Rayonda 2700 hektarda aqropark, taxılçılıq və toxumçuluq təsərrüfatları, 10 hektar ərazidə istixana kompleksi, Zobucuq qəsəbəsində kənd təsərrüfatı məhsullarının satışı yarmarkası və digər obyektlər yaradılıb.

Tədbirdə barama istehsalında fərqlənənlərə mükafatlar təqdim olunub.

Sonda Füzuli rayonunun sosial-iqtisadi inkişafını əks etdirən videoçarx nümayiş etdirilib.