SİYASƏT
MƏZAHİR PƏNAHOV: İNDİKİ PREZİDENT SEÇKİLƏRİ AZƏRBAYCANIN TARİXİNDƏ FƏXR ETMƏLİ HADİSƏ KİMİ QALACAQDIR
AZƏRTAC xəbər verir ki, Mərkəzi Seçki Komissiyasının sədri Məzahir Pənahov oktyabrın 16-da Seçkilər İnformasiya Mərkəzində prezident seçkiləri ilə bağlı açıqlama vermişdir.
MSK-nın sədri demişdir:
- Bu seçkilər Azərbaycanın tarixində çox əhəmiyyətli, fəxr etməli hadisə kimi yadda qalacaqdır. Azərbaycan seçiciləri çox fəal idilər və seçkilər geniş aşkarlıq şəraitində keçirildi. Beynəlxalq, yerli müşahidəçilər və kütləvi informasiya vasitələrinin nümayəndələri seçkilərin şəffaflığına, aşkarlığına nəzarət edirdilər və müntəzəm olaraq həm Azərbaycan ictimaiyyətinə, həm də beynəlxalq ictimaiyyətə məlumatlar çatdırırdılar. Onların sayı olduqca çox idi və MSK buna sevinir. Çünki onlar yaxşı mənada bizim köməkçilərimizə çevrilmişdilər.
Azərbaycan seçiciləri çox yüksək fəallıq göstərdilər, çünki səsvermədə iştirakın 75,64 faiz olması istənilən ölkə üçün fəxr etməli faktdır.
Mərkəzi Seçki Komissiyasına səsvermənin nəticələri ilə bağlı indiyə qədər heç bir rəsmi müraciət daxil olmamışdır. Gəldiyimiz ümumi qənaət bundan ibarətdir ki, seçkilər çox demokratik şəraitdə, azad, şəffaf və ədalətli keçirilmişdir.
Dairə seçki komissiyalarından 5359 məntəqənin 96 faizdən çoxunun protokolları daxil olmuş, Mərkəzi Seçki Komissiyasının internet saytında yerləşdirilmişdir. Həmin protokollara əsasən, bütün namizədlərin lehinə 3 milyon 541 min 365 səs verilmişdir. Ayrılıqda hər namizədə verilmiş səslərin sayı isə belədir:
Əliyev İlham Heydər oğlu - lehinə 3 milyon 139 min 243 səs verilmiş və 88,64 faizlə birinci yerdədir.
Ağazadə İqbal Fehruz oğlu - lehinə 101 min 759 səs verilmiş və 2,87 faizlə ikinci yerdədir.
Mustafayev Fazil Qəzənfər oğlu - lehinə 88 min 494 səs verilmiş və 2,50 faizlə üçüncü yerdədir.
Həsənquliyev Qüdrət Müzəffər oğlu - lehinə 81 min 452 səs verilmiş və 2,30 faizlə dördüncü yerdədir.
Əlibəyli Qulamhüseyn Surxay oğlu - lehinə 79 min 587 səs verilmiş və 2,25 faizlə beşinci yerdədir.
Əliyev Fuad Ağası oğlu - lehinə 27 min 675 səs verilmiş və 0,78 faizlə altıncı yerdədir.
Hacıyev Hafiz Ələmdar oğlu - lehinə 23 min 155 səs verilmiş və 0,65 faizlə yeddinci yerdədir.
Azərbaycandan kənarda təşkil olunmuş və ucqar kəndlərdəki seçki məntəqələrinin protokolları hələlik alınmamışdır. 5359 məntəqənin hamısından protokollar alındıqdan sonra Mərkəzi Seçki Komissiyası ilkin nəticələri Azərbaycan ictimaiyyətinə çatdıracaqdır.