SİYASƏT
MİLLİ MƏCLİS “NORMATİV HÜQUQİ AKTLAR HAQQINDA” KONSTİTUSİYA QANUNUNU İKİNCİ OXUNUŞDA QƏBUL ETMİŞDİR
Bakı, 27 aprel (AZƏRTAC). Aprelin 27-də Milli Məclisin növbəti iclası keçirilmişdir. Əvvəlcə deputatlar gündəliyə və digər məsələlərə dair rəy və təkliflərini bildirmişlər. Milli Məclisin sədri Oqtay Əsədov deputatların qaldırdıqları problemlərə münasibət bildirmişdir.
Sonra gündəlikdəki qanun layihələri müzakirə olunmuşdur. O.Əsədov “Zakir Bəkir oğlu Qaralovun Azərbaycan Respublikasının Baş prokuroru vəzifəsinə təyin edilməsinə razılıq verilməsi haqqında” qərar layihəsi barədə məlumat vermişdir. Milli Məclisin sədri bildirmişdir ki, Z.Qaralov prokurorluq sistemində bütün mərhələləri keçərək böyük təcrübə toplamışdır. Ötən on ildə isə respublikamızın Baş prokuroru kimi səmərəli fəaliyyət göstərmişdir. İnanıram ki, Zakir Qaralov növbəti illərdə də öz təcrübəsini səmərəli fəaliyyətə, Azərbaycan prokurorluğunun inkişafına yönəldəcəkdir.
Sonra Milli Məclisin hüquq siyasəti və dövlət quruculuğu komitəsinin sədri Əli Hüseynov məsələ ilə bağlı ətraflı məlumat vermişdir. O bildirmişdir ki, ötən on ildə respublikamızın prokurorluq orqanlarında ciddi islahatlar həyata keçirilmişdir. Ölkəmizdə ilk dəfə məhz prokurorluq orqanlarında şəffaf yolla işə qəbul həyata keçirilmişdir. Bu gün prokurorluq orqanlarında çalışanların 40 faizi yeni kadrlardır. Prokurorluq orqanlarının korrupsiya ilə mübarizə sahəsində əzmkarlığı cəmiyyət tərəfindən yüksək qiymətləndirilir. Hazırda prokurorluqla digər hüquq-mühafizə orqanları arasında səmərəli əməkdaşlıq mövcuddur. Prokurorluq orqanları öz fəaliyyətlərində dövlətçilik və hüquq prinsiplərini əsas götürürlər.
Çıxış edən deputatlar Zakir Qaralovun hüquq mühafizə, prokurorluq orqanlarındakı fəaliyyətini müsbət dəyərləndirmiş, onun yenidən Baş prokuror vəzifəsinə təyin olunması məsələsini məqsədəmüvafiq hesab etmişlər.
Milli Məclisdə çıxış edən Zakir Qaralov respublikamızın Baş prokuroru kimi məsul vəzifəyə yenidən namizədliyinin irəli sürülməsinə görə Prezident İlham Əliyevə təşəkkürünü bildirmişdir. Z.Qaralov ölkənin ali qanunverici orqanı kimi Milli Məclisin rəhbərliyinə və deputatlara onun namizədliyini müdafiə etdiklərinə və ötən illər ərzində uğurlu birgə əməkdaşlığa görə minnətdarlıq etmişdir. O qeyd etmişdir ki, həqiqətən ötən illər ərzində Milli Məclis və Azərbaycan prokurorluğu arasında əməkdaşlıq çox uğurlu olmuşdur.
Milli Məclisdə prokurorluğun fəaliyyətini tənzimləyən bir sıra mühüm qanunlar qəbul edilmişdir. Ona görə prokurorluğun qanunvericilik təşəbbüsündən istifadə etməyə ehtiyac olmamışdır. Bu gün Azərbaycan prokurorluğunun qazandığı uğurlarda onun mükəmməl hüquqi bazasının olması mühüm rol oynayır.
Sonra prokurorluq sistemində həyata keçirilən islahatlar, korrupsiya ilə mübarizə sahəsində görülən işlər və digər məsələlər barəsində məlumat verən Zakir Qaralov çıxışının sonunda qeyd etdi ki, Azərbaycan prokurorluğu bundan sonra da dövlətçiliyimizin maraqlarının müdafiəsi, insan və vətəndaş hüquq və azadlıqlarının etibarlı qorunması və cinayətkarlığa qarşı mübarizə işində əzmkarlıqla fəaliyyət göstərəcəkdir.
Sonra səsvermə olmuşdur. Milli Məclis 103 səs lehinə olmaqla Zakir Qaralovun yenidən Baş prokuror təyin olunmasına razılıq vermişdir.
İclasda “Xəzər dənizinin Azərbaycan sektorunda Bahar yatağının və Qum-Dəniz yatağının daxil olduğu blokun kəşfiyyatı, bərpası, işlənməsi və hasilatın pay bölgüsü haqqında Azərbaycan Respublikası Dövlət Neft Şirkəti, Bahar Enerci Limited və ARDNŞ-in Ortaq Neft Şirkəti arasında Sazişin qəbul və təsdiq edilməsi, həyata keçirilməsinə icazə verilməsi barədə” qanun layihəsi müzakirəyə çıxarılmışdır. Milli Məclis sədrinin müavini, parlamentin təbii ehtiyatlar, energetika və ekologiya komitəsinin sədri Valeh Ələsgərov layihə barədə geniş məlumat vermişdir. Qeyd olunmuşdur ki, 2009-cu il dekabrın 22-də bağlanmış sazişə əsasən Bahar Enerci Limitedin payı 80 faiz, Ortaq Neft Şirkətinin payı 20 faizdir. Blokda kəşfiyyat işləri üç il müddətinə həyata keçiriləcəkdir. Sazişə əsasən ilk beş ildə mühəndis-texniki işçilərin 70 faizini, fəhlələrin 90 faizini azərbaycanlılar təşkil edəcəkdir. Beş ildən sonra isə mühəndis-texniki işçilərin 90 faizini, fəhlələrin isə 95 faizini azərbaycanlılar təşkil etməlidir.
Geniş müzakirələrdən sonra Saziş layihəsi səs çoxluğu ilə təsdiq edilmişdir.
İş gününün sonunda “Normativ hüquqi aktlar haqqında” Konstitusiya Qanununun layihəsi ikinci oxunuşda müzakirə olunmuşdur. Bildirilmişdir ki, bu Qanun normativ hüquqi aktların hazırlanması, rəsmiləşdirilməsi, qəbul edilməsi, dərc olunması, qüvvəsi, şərhi və sistemləşdirilməsi qaydalarını müəyyən edəcəkdir. Müzakirələrdən sonra qanun layihəsi ikinci oxunuşda qəbul olunmuşdur.
Bununla da Milli Məclisin iclası başa çatmışdır.