MİLLİ OLİMPİYA KOMİTƏSİNDƏ GÖRÜŞ
Mayın 7-də Milli Olimpiya Komitəsində \MOK\ sərbəst güləş üzrə 45-ci Avropa çempionatında yüksək nəticələr göstərmiş idmançılar, onların məşqçiləri və Azərbaycan Güləş Federasiyasının rəhbərləri ilə görüş keçirilmişdir.
MOK-un prezidenti, Milli Məclisin deputatı İlham Əliyev görüşü açaraq idmançıları salamladı, Bakıda 45-ci Avropa çempionatının yüksək səviyyədə təşkil olunduğunu və bu mötəbər yarışda idmançılarımızın qazandıqları uğurları xalqımız üçün çox sevindirici hal kimi dəyərləndirdi. O, idmançıları və onların məşqçilərini təbrik etdi, Gənclər, İdman və Turizm Nazirliyinə, respublika Güləş Federasiyasına və çempionatın Təşkilat komitəsinə təşəkkürünü bildirdi.
Gələcək planlardan, qarşıdakı beynəlxalq yarışlarda komandamızın yüksək səviyyədə çıxış etməsi üçün MOK tərəfindən görüləcək işlərdən bəhs edən İlham Əliyev bildirdi ki, əsas məqsədimiz Afina yay olimpiya oyunlarına tam hazır olmaq, həmin dövrə qədər keçiriləcək dünya çempionatında, lisenziya turnirlərində komandamızın iştirakını təmin etməkdir.
Azərbaycan Güləş Federasiyasının prezidenti, baş nazirin birinci müavini Abbas Abbasov, güləş üzrə Azərbaycan yığma komandasının baş məşqçisi Yaqub Məmmədov idmançılara göstərdiyi diqqət və qayğıya görə İlham Əliyevə minnətdarlığını bildirdilər, son illər qazanılan uğurların Azərbaycan idmanının gələcək inkişafı üçün gözəl təməl yaratdığını, yeni idman komplekslərinin tikilməsinin idmanın kütləviliyi üçün əhəmiyyətini vurğuladılar.
Natiqlər sərbəst güləş üzrə 45-ci Avropa çempionatının ilk dəfə Bakıda keçirilməsini Prezident Heydər Əliyevin rəhbərliyi altında ölkəmizdə yaradılmış ictimai-siyasi sabitliyin nəticəsi kimi qiymətləndirdilər, 2003-cü ildə keçiriləcək dünya çempionatı və digər əhəmiyyətli yarışlara hazırlıqla bağlı fikrlərini açıqladılar.
Milli idman növlərindən olan güləşin ölkəmizdə əbədi yaşayacağını bildirən MOK-un prezidenti İlham Əliyev Azərbaycanda bəzi müxalifət qəzetlərində 45-ci çempionat haqqında heç bir məlumat getmədiyini xatırladaraq dedi ki, Türkiyənin “Qalatasaray” komandasına təbrik teleqramları vuranlar, - biz özümüz də “Qalatasaray”ın azarkeşləriyik, - bizim idmançıları təbrik etmirlər. Halbuki, hər bir ədalətli adam görür ki, Azərbaycanda idmanda, o cümlədən güləşdə böyük nəticələr, uğurlar var. Biz kiminsə xoşuna gəlmək, yaxud da özümüzə xal qazanmaq üçün çalışmırıq. Biz istəyirik ki, Azərbaycan xalqı, milləti qürur duysun, ölkəmizin bayrağı qaldırılanda hər bir əsl azərbaycanlı qürur hissi keçirsin.
Sidneydəki unudulmaz günləri yada salan, Azərbaycanda idman hərtərəfli inkişaf etdiyini vurğulayan Milli Olimpiya Komitəsinin prezidenti bildirdi ki, yeni müasir idman komplekslərinin tikilməsində məqsəd odur ki, ölkəmizin hər bir bölgəsində uşaqlar, yeniyetmələr idmanla məşğul olsunlar. İdmanla məşğul olan adam heç vaxt özündən zəifə əl qaldırmaz. İdmanla məşğul olan adam həm fiziki, həm də mənəvi cəhətdən yüksək keyfiyyətlərə malik olur. Biz istəyirik ki, Azərbaycanın gələcək nəsli sağlam olsun, onlarda vətənpərvərlik hissi güclü olsun. İdman bu baxımdan ən vacib vasitələrdən biridir.
Beynəxlalq Olimpiya Komitəsinin keçmiş prezidenti cənab Samarancla görüşləri, Azərbaycanda idmanın inkişafı sahəsində görülən işlər barədə onun fikirlərini və verdiyi tövsiyələri xatırladan İlham Əliyev dedi ki, biz Azərbaycan idmanının yüksəlişi üçün bundan sonra da əlimizdən gələni əsirgəməyəcəyik, hər bir gəncin idmanla məşğul olması üçün şərait yaradılacaqdır.
Görüşdə cəmiyyətdə idmançılara hörmətin artmasından, onların problemlərinin həlli istiqamətində görülən işlərdən də danışıldı, MOK tərəfindən ayrı-ayrı federasiyalara yardım göstərilməsi vurğulandı, eyni zamanda mövcud çətinliklərdən söhbət açıldı və bunların hazırlanacaq proqram çərçivəsində tədricən həll olunacağı bildirildi.
MOK-un prezidenti İlham Əliyev sonda idmançıların, məşqçilərin və fedeşrasiya rəhbərlərinin problemləri ilə maraqlandı, təkliflərini dinlədi və onlarla xatirə şəkli çəkdirdi.
Gənclər, idman və turizm naziri Əbülfəz Qarayev və digər rəsmi şəxslər görüşdə iştirak edirdilər.
Foto İlqar Cəfərovundur
Bölmənin digər xəbərləri
