MİLLİ OLİMPİYA KOMİTƏSİNDƏ GÖRÜŞLƏR
Aprelin 19-da Milli Olimpiya Komitəsinin prezidenti, Milli Məclisin deputatı İlham Əliyev Beynəlxalq Otüstü Xokkey Federasiyasının prezidenti xanım Eis Van Breda Vriyesmanın başçılıq etdiyi nümayəndə heyəti ilə görüşmüşdür.
İlham Əliyev qonaqları səmimiyyətlə salamladı, indi Azərbaycanda idmanın bütün növlərinin, o cümlədən otüstü xokkeyin inkişaf etdiyini və yaxın gələcəkdə xokkeyçilərimizin beynəlxalq yarışlarda yüksək nəticələr qazanacaqlarına ümidvar olduğunu bildirdi. Xanım Vriyesmanın bu səfərinin respublikamızda idmanın bu sahəsinin daha da inkişafına kömək edəcəyini vurğulayan İlham Əliyev dedi ki, son illər ölkəmizdə müxtəlif beynəlxalq yarışlar və tədbirlər - Avropa və dünya çempionatları, eyni zamanda Avropa Olimpiya Komitəsi İcraiyyə Komitəsinin toplantısı keçirilmişdir. Həmin tədbirdə cənab Jak Roqun Beynəlxalq Olimpiya Komitəsinin prezidenti vəzifəsinə namizədliyi irəli sürülmüşdü. O, iki dəfə Bakıda olmuş, yeni idman kompleksinin açılışında iştirak etmişdir.
Beynəlxalq Otüstü Xokkey Federasiyasının prezidenti xanım Eis Van Breda Vriyesman MOK-un rəhbərliyinin idmanın inkişafına göstərdiyi qayğısını yüksək qiymətləndirdi, Azərbaycan idmançılarının Avropa və dünya çempionatlarında, Olimpiya oyunlarında qazandıqları qələbələrdən də xəbərdar olduğunu bildirdi. Otüstü xokkeyin olimpiya idman növu olduğunu xatırladan qonaq gələcəkdə Azərbaycan atletlərinin olimpiya oyunlarında bu növdə də uğurla çıxış edəcəklərinə inandığını vurğuladı.
Azərbaycan Otüstü Xokkey Federasiyasının prezidenti Fazil Məmmədov bildirdi ki, otüstü xokkey üzrə respublika çempionatında 18 komanda mübarizə aparır, xokkeyçilərimiz beynəlxalq yarışlarda da iştirak edirlər. O, Bakıda dünya və Avropa standartlarına cavab verən otüstü xokkey stadionunun tikilməsinin nəzərdə tutulduğunu bildirdi.
Görüşün sonunda MOK-un prezidenti İlham Əliyev Beynəlxalq Otüstü Xokkey Federasiyasının prezidenti xanım Eis Van Breda Vriyesmana xatirə hədiyyələri təqdim etdi.
Xanım Eis Van Breda Vriyesman isə görüşdən xatirə olaraq İlham Əliyevə Federasiyanın xüsusi hədiyyəsini bağışladı.
Beynəlxalq Otüstü Xokkey Federasiyasının nümayəndələri Milli Olimpiya Komitəsinin prezidenti İlham Əliyev ilə xatirə şəkli çəkdirdilər.
X X X
Həmin gün Milli Olimpiya Komitəsinin prezidenti, Milli Məclisin deputatı İlham Əliyev Azərbaycanın veteran idmançıları - futbolçular Asif Əliyev, Yaşar Vahabzadə və həndbolçu Esmira Vahabzadə ilə görüşmüşdür.
İlham Əliyev müxtəlif beynəlxalq yarışlarda fərqlənən idmançılarla yanaşı, veteranlara da diqqət və qayğı göstərildiyini vurğuladı. O, Azərbaycanda idmanın inkişafında göstərdikləri xidmətə görə veteran idmançılara təşəkkürünü bildirdi, onlara gələcək işlərində uğurlar arzuladı.
MOK-un prezidenti İlham Əliyev dedi ki, mən bu vəzifədə çalışdığım dövrdə bütün idmançılara kömək göstərilir və veteran idmançılara xüsusi təqaüdlər verilir.
Futbola və həndbola maraq göstərdiyini söyləyən, “Neftçi” komandasının vaxtilə keçirdiyi görüşlər barədə danışan cənab İlham Əliyev veteran idmançıların problemlərinin həlli üçün müvafiq işlər görüldüyünü və bunun gələcəkdə də davam ediləcəyini vurğuladı.
Sonra MOK-un prezidenti Esmira Vahabzadəyə yeni mənzilin orderini təqdim etdi.
Həndbolçu Esmira Vahabzadə böyük idmanı tərk etmiş idmançıların problemləri ilə yaxından maraqlandığına görə İlham Əliyevə dərin minnətdarlıqlarını bildirdi. O, son illər ölkəmizdə beynəlxalq səviyyəli yarışların keçirilməsinin, müasir standartlara cavab verən idman obyektlərinin tikilməsinin və digər mühüm işlərin respublikamızda hökm sürən ictimai-siyasi sabitliyin təminatçısı Prezident Heydər Əliyevin rəhbərliyi altında həyata keçirilən məqsədyönlü siyasətin nəticəsi olduğunu vurğuladı.
Futbolçu Asif Əliyev peşəkar idmanda ciddi zədə aldığını xatırladaraq, məhz MOK-un Prezidenti İlham Əliyevin qayğısı nəticəsində Moskva şəhərində müalicə olunduğunu söylədi və buna görə təşəkkürünü bildirdi.
Sonra Asif Əliyev Azərbaycan Prezidenti Heydər Əliyevin “Neftçi” futbol klubunun üzvləri ilə 1980-ci ildə çəkdirdiyi fotoşəkli MOK-un rəhbərinə təqdim etdi.
X X X
MOK-un prezidenti, Milli Məclisin deputatı İlham Əliyev aprelin 19-da gənc şahmatçı, beynəlxalq qrosmeyster Teymur Rəcəbovun məşqçisi ilə də görüşmüşdür. Dünya çempionu Teymur Rəcəbovun gələcək planları ilə maraqlanan MOK-un prezidenti gələcək yarışlarda onlara uğurlar arzuladı.
Görüşlərdə gənclər, idman və turizm naziri Əbülfəz Qarayev və digər rəsmi şəxslər iştirak edirdilər.
Bölmənin digər xəbərləri
