İQTİSADİYYAT
Mingəçevirin su-kanalizasiya sistemi yenidən qurulur
Mingəçevir, 1 dekabr (AZƏRTAC). Mingəçevir şəhərinin su-kanalizasiya sisteminin yenidən qurulması işləri sürətlə davam etdirilir.
AZƏRTAC xəbər verir ki, bu işlərin icrasına iki ay əvvəl başlanılmış və bugünədək “Energetiklər” və “Sağ sahil” yaşayış massivlərində 4 kilometr su və 4 kilometr kanalizasiya xətti çəkilmişdir. Mingəçevir su anbarından yeni inşa ediləcək sutəmizləyici qurğunun yerləşəcəyi əraziyədək 1.470 metr uzunluğunda 820 millimetrlik borularla magistral su xəttinin çəkilişi davam etdirilir. İçməli və çirkab suları təmizləyəcək qurğuların inşasına isə gələn həftə başlanılacaqdır. Sutkada 30 min kubmetr su təmizləmək gücünə malik olacaq qurğuya su Mingəçevir su anbarından ötürüləcəkdir. Öz axını ilə qurğuya daxil olan su təmizləndikdən sonra şəhərə paylanacaqdır. Şəhərin içməli su ilə təminatı üçün 225 kilometr uzunluğunda yeni boru xətti çəkiləcəkdir. Kanalizasiya sularının ötürülməsi üçün 6 nasos stansiyası və təmizlənməsi üçün çirkab su təmizləyən qurğu, 220 kilometr uzunluğunda kanalizasiya xətti, qurğuların təmiri bazası, şəhər su-kanal idarəsi üçün yeni inzibati bina inşa ediləcək, mənzillərdə sayğaclar quraşdırılacaqdır. Bu layihə çərçivəsində tikinti işlərini “Azərsu” ASC-nin sifarişi ilə “Hidrolotus” MMC həyata keçirir.
Xatırladaq ki, şəhərin mövcud su-kanalizasiya sistemi ötən əsrin 50-60-ci illərində inşa edilmiş və 30-40 min əhali üçün nəzərdə tutulmuşdur. Hazırda şəhərdə 120 min nəfər yaşayır və yeni quraşdırılacaq su-kanalizasiya sistemi 200 min əhali üçün nəzərdə tutulmuşdur. İşlər başa çatandan sonra əhali 24 saat ərzində fasiləsiz içməli su ilə təmin olunacaqdır.