Moskvanın turizm potensialı Azərbaycanda tanıdılıb
Bakı, 21 iyul, Məmməd Məmmədli, AZƏRTAC
Moskva Şəhəri Turizm Komitəsi iyulun 21-də “Four Seasons Hotel Baku”da Moskvanın turizm potensialını Azərbaycanda təqdim edib.
AZƏRTAC xəbər verir ki, tədbirdə 20-yə yaxın yerli şirkət, o cümlədən DMC, otel və istirahət məkanlarının nümayəndələri iştirak ediblər.
Tədbirdə Moskvanın turizm imkanlarının təqdimatı keçirilib, həmçinin bu şəhərin mədəni irs, təbiət, macəra, kulinariya və digər özəllikləri nümayiş olunub.
Moskva Şəhəri Turizm Komitəsinin nümayəndəsi Maqomed Mezhiyev təmsil etdiyi qurumun ölkələr arasında əsasən turizm sahəsində əlaqələrin qurulmasına xidmət etdiyini söyləyib: “Biz dəyişən mühitdə yaşayırıq. Buna görə də hər bir turisti təhlükəsizlik, kafe, restoran və təşkil olunan tədbirlər, festivallar barədə yığcam məlumat maraqlandırır. Moskvada turistlər üçün heç bir məhdudiyyət qoyulmur. Turist üçün yalnız gəlməzdən 72 saat öncə PCR testinin verilməsi tələb olunur”.
O, Moskvada 4 hava limanı, çoxlu sayda 4-5 ulduzlu otellərin fəaliyyət göstərdiyini söyləyib və bildirib ki, turistlər burada yüksək xidmətdən yararlana bilərlər. Moskvanın təzadlı bir şəhər olduğunu vurğulayan Maqomed Mezhiyev bildirib ki, bu şəhəri ziyarət edən turist hər dəfə yeni məkanlar kəşf edəcək. Qeyd edib ki, şəhərdə 50-dən çox teatr, “Puşkin Muzeyi”, “Tretyakov Qalereyası” kimi tanınmış muzeylərlə yanaşı, “Qaraj” Müasir İncəsənət Muzeyi, Moskva Fotoqrafiya Evi də fəaliyyət göstərir.
Qastronomiya turizmindən danışan Maqomed Mezhiyev bildirib ki, Moskva şəhərində 12 mindən çox restoran, 5 mindən çox bar fəaliyyət göstərir. Qeyd edib ki, 2 restoran ikili mişlen ulduzu, 1 restoran isə 1 mişlen ulduzu qazanıb. Bildirib ki, Moskva restoranlarında halal qida da verilir.
Moskvanın cəlbedici bir şəhər olduğunu deyən Maqomed Mezhiyev bildirib ki, Beqovoy küçəsində “Aviator evi” turistlərin ən çox ziyarət etdiyi məkanlardan biri sayılır. Bundan əlavə, “Qorki” parkında yerləşən buz meydançasında konki sürmək, “Ermitaj” bağında çiçəklər arasında 8 mart, Beynəlxalq Qadınlar Gününü qeyd etmək olar. Yaz aylarında şəhər müxtəlif güllərin ətrinə bürünür. İnsanlar parklarda gəzir, Moskvanı olduğu kimi hiss edirlər.
Maqomed Mezhiyev, həmçinin qurumun yeni turizm məhsullarından danışıb. O, yerli turizm şirkətlərinə “RUSSPASS” sistemi haqqında məlumat verib. Bildirib ki, bu sistem vasitəsilə turistlər metro, avtobus və təyyarə biletləri əldə edərək ölkə daxilində öz səfərlərini planlaya bilərlər.
Sonra yerli turizm şirkətləri ilə “B2B” görüşləri keçirilib.
Təqdimatdan sonra jurnalistlərə müsahibə verən Moskvanın Turizm və Otelçiliyin İnkişafı üzrə Layihə Ofisinin nümayəndəsi Yuliya Syundyukova statistik göstəricilərə nəzər salıb. Bildirib ki, Rusiya azərbaycanlı turistlərin Türkiyədən sonra ən çox ziyarət etdiyi ölkələrdən biridir. Qeyd edib ki, son illər ölkədə populyarlaşan qastroturizm azərbaycanlıları daha çox özünə cəlb edir. Bildirib ki, buna paralel olaraq komitə uşaq turizminin inkişafı üçün də çalışır. Uşaqlar bu günün potensial turistləri olduğu üçün onların asudə vaxtlarını təşkil etmək komitənin qarşısına qoyduğu vəzifələrdən biridir.
Qeyd edək ki, Moskva Şəhəri Turizm Komitəsi Moskvanı dünyada turizm məkanı kimi tanıdan rəsmi təşkilatdır. Təşkilat yerli və beynəlxalq ziyarətçi axınını artırmaq üçün və yerli turizm sənayesini, o cümlədən regionları, turizm məkanlarını, otel şəbəkələrini, bar və restoranları, turizm şirkətlərini tanıtmaq üçün çalışır.
Bölmənin digər xəbərləri
