DÜNYA
NASA Malayziya Hava Yollarına məxsus itmiş təyyarəni kosmosdan çəkilmiş fotoşəkillər vasitəsilə axtarır
Kuala-Lumpur, 23 mart (AZƏRTAC). Malayziya Hava Yollarına məxsus itmiş təyyarənin axtarışlarına NASA-nın kosmik laboratoriyası da qoşulmuşdur. Kosmosdan çəkilmiş fotoşəkillər əsasında mərkəzin mütəxəssisləri Hind okeanının cənub hissəsini təhlil etməklə məşğuldurlar. Bu axtarışlara Yeri tədqiq edən EO-1 süni peyki və Beynəlxalq Kosmik Mərkəzdəki xüsusi İSERV kameraları cəlb edilmişdir.
Eyni zamanda, təyyarənin itməsinə Avstraliyaya məxsus təyyarənin pilotunun verdiyi məlumat da aydınlıq gətirə bilər. Hind okeanının üzərindən uçan həmin pilot suyun üzərində kəmərləri olan altlıq gördüyünü bildirmişdir. Ola bilər ki, bu altlıq itmiş təyyarənin yük hissəsindən düşmüşdür. Lakin mütəxəssislərin bildirdiyinə görə, belə altlıqlar yükdaşıyan gəmilərdə də istifadə olunur. Hazırda okeanın həmin hissəsinə Çin gəmiləri göndərilmişdir. Bu gəmilərin əraziyə martın 25-də çatacağı gözlənilir. Həmin ərazidə axtarışlara Yaponiya hərbi-hava qüvvələrinə məxsus təyyarələrin qoşulduğu da bildirilir.
Bundan əlavə, “Frans Press” agentliyinin verdiyi məlumata görə, Fransaya məxsus süni peyk Hind okeanının cənubunda su üzərində naməlum obyekt müəyyən etmişdir. Süni peyk tərəfindən çəkilmiş fotoşəkillər Avstraliyanın hökumət orqanlarına təhvil verilmişdir.
Xəbər verdiyimiz kimi, martın 8-də Kuala-Lumpurdan Pekinə uçan Malayziya Hava Yolları şirkətinə məxsus “Boeing 777” sərnişin təyyarəsi heç bir təhlükə siqnalı vermədən radarların ekranlarından itmişdir. Təyyarənin göyərtəsində 227 sərnişin və 12 heyət üzvü olmuşdur. Hadisədən on beş gün keçməsinə baxmayaraq, hələ də təyyarənin heç bir izi tapılmamışdır.
Vüqar Ağayev
AZƏRTAC-ın xüsusi müxbiri
Kuala-Lumpur