RƏSMİ XRONİKA
NATO-YA VƏ DİGƏR AVRATLANTİK STRUKTURLARA İNTEQRASİYA AZƏRBAYCANIN SİYASƏTİNİN ƏSAS İSTİQAMƏTLƏRİNDƏN BİRİDİR
AZƏRBAYCAN PREZİDENTİ İLHAM ƏLİYEVİN BELÇİKA KRALLIĞINA İŞGÜZAR SƏFƏRİ
AZƏRBAYCAN PREZİDENTİ İLHAM ƏLİYEVİN NATO-NUN BAŞ KATİBİ YAAP DE HOOP SXEFFER İLƏ GÖRÜŞÜ
Dövlətimizin başçısını binanın önündə NATO-nun baş katibi Yaap de Hoop Sxeffer böyük hörmət və ehtiramla qarşıladı.
Azərbaycan Prezidenti İlham Əliyev və NATO-nun baş katibi Yaap de Hoop Sxeffer NATO-nun bayrağı önündə xatirə şəkli çəkdirdilər.
Sonra Prezident İlham Əliyev ilə NATO-nun Baş katibi Yaap de Hoop Sxeffer arasında təkbətək görüş oldu.
Dövlətimizin başçısı NATO ilə əməkdaşlığın uğurla inkişaf etdiyini, “Fərdi tərəfdaşlığın fəaliyyət planı” çərçivəsində görülən işləri bunun yaxşı nümunəsi kimi səciyyələndirdi. Azərbaycan rəhbəri NATO ilə əməkdaşlığın bundan sonra daha da genişlənəcəyinə əminliyini söylədi.
Prezident İlham Əliyev bir daha təsdiqlədi ki, NATO-ya, Avropa Birliyinə və digər Avratlantik strukturlara inteqrasiya Azərbaycanın siyasətinin əsas istiqamətlərindən biridir. Dövlətimizin başçısı iqtisadiyyat, enerji sahələrində əməkdaşlıq məsələlərinə də toxunaraq dedi ki, NATO enerji təhlükəsizliyi ilə birbaşa məşğul olan təşkilat olmasa da, bu məsələyə də mühüm diqqət yetirir. Azərbaycan sülhməramlıları NATO hərbçiləri ilə birlikdə Əfqanıstanda, Kosovoda və İraqda sabitliyin qorunmasında, sülhyaratma əməliyyatlarında fəal iştirak edir. Azərbaycan Prezidenti özünün indiki səfərinin əməkdaşlığın genişlənməsi baxımından çox böyük əhəmiyyət kəsb etdiyini bildirdi.
Baş katib Yaap de Hoop Sxeffer “Fərdi tərəfdaşlığın fəaliyyət planı” çərçivəsində Azərbaycanla əməkdaşlığı NATO adından yüksək qiymətləndirdi. O, əməkdaşlığın daha da genişlənəcəyinə əmin olduğunu bildirərək dedi ki, NATO-nun rəhbərliyi də bunda maraqlıdır. NATO-nun yüksək vəzifəli nümayəndələrinin Azərbaycana səfərləri bunu bir daha təsdiqləyir.
Görüşdə Ermənistan-Azərbaycan, Dağlıq Qarabağ münaqişəsi barədə də söhbət getdi.
Hazırda Praqa prosesi çərçivəsində aparılan danışıqlar barədə məlumat verən Prezident İlham Əliyev Azərbaycanın mövqeyini bir daha açıqlayaraq dedi ki, münaqişə sərhədlərin toxunulmazlığı, ərazi bütövlüyü prinsipi əsasında həll oluna bilər.
Görüşdə Azərbaycanın Avropa Birliyi ilə əməkdaşlığı, enerji təhlükəsizliyi, regional məsələlər və qarşılıqlı maraq doğuran digər mövzular da müzakirə olundu.
X X X
Sonra Prezident İlham Əliyev Şimali Atlantika Şurasında çıxış etdi. Daha sonra NATO-ya üzv dövlətlərin Şuradakı daimi nümayəndələri, səfirləri ilə müzakirələr aparıldı.
X X X
Görüşdən sonra Prezident İlham Əliyev və NATO-nun baş katibi Yaap de Hoop Sxeffer birgə mətbuat konfransı keçirərək, bəyanatlarla çıxış etdilər.
Yaap de Hoop Sxeffer dedi ki, NATO-nun qərargahında Azərbaycan Prezidenti ilə görüşmək bir neçə səbəbdən bizim üçün çox mühümdür. Birinci səbəb odur ki, NATO-nun üzvü olan dövlətlər Azərbaycanın müxtəlif sahələrdə təşkilatla əməkdaşlığını yüksək qiymətləndirir. İkinci səbəb isə Azərbaycanın regiondakı rolu ilə bağlıdır. Bu regionda sabitlik baxımından risklər mövcuddur, Azərbaycan regionda daha əhəmiyyətli rol oynamağa başlayır.
Prezident İlham Əliyevin Şimali Atlantika Şurasındakı müzakirələrdə çox açıq və səmərəli şəkildə iştirak etdiyini bildirən cənab Sxeffer bildirdi ki, əsas etibarilə “Fərdi tərəfdaşlığın fəaliyyət planı” çərçivəsində əlaqələrimizdən danışdıq.
Azərbaycan hərbçilərinin Əfqanıstan və Kosovoda sülhyaratma əməliyyatlarındakı rolunun bizim üçün böyük əhəmiyyəti var. Bu o deməkdir ki, Azərbaycan artıq təhlükəsizliyi yayan dövlətlərdən biridir.
Prezident İlham Əliyev bəyanatında vurğuladı ki, həyata keçirdiyimiz “Fərdi tərəfdaşlığın fəaliyyət planı”, sadəcə, müdafiə sahəsini deyil, iqtisadi, siyasi islahatlar sahəsini də əhatə edir və bu çərçivədə əməkdaşlıq genişlənməkdədir. NATO ilə münasibətlərdə yeni mərhələnin açıldığını bildirən dövlətimizin başçısı dedi ki, biz baş katiblə görüşdə ikitərəfli münasibətlərimizi, regional təhlükəsizliklə bağlı məsələləri müzakirə etdik. Şimali Atlantika Şurasında isə planlarımız, ideyalarımız barədə səfirlərlə müzakirələr keçirildi. Azərbaycan regionda daha təhlükəsiz vəziyyətin qorunub saxlanmasına, Kosovo və Əfqanıstanda sülhməramlı əməliyyatların həyata keçirilməsinə kömək göstərməkdə davam edəcəkdir.
Sonra jurnalistlərin suallarına cavab verildi.
Cənab Sxeffer enerji təhlükəsizliyi və Cənubi Qafqazdakı münaqişələrin həllində NATO-nun rolu barədə suallara cavabında dedi ki, Azərbaycanın neft və qaz sənayesi sahələrində əhəmiyyəti getdikcə daha da artmaqdadır. NATO enerji məsələlərinə birbaşa müdaxilə etməsə də, bunun coğrafi, siyasi aspektinin bizim üçün böyük əhəmiyyəti var.
Münaqişənin həllinə gəldikdə isə bununla bağlı NATO-nun rəhbər tutduğu mövqe var. Bu da, regionun bütün dövlətlərinin ərazi bütövlüyünə hörmət bəslənməsidir. Müzakirələrimizdə Dağlıq Qarabağ məsələsi də geniş müzakirə olundu, xüsusilə Şimali Atlantika Şurasındakı müzakirələrdə Prezident İlham Əliyev bununla bağlı öz mövqeyini geniş şəkildə açıqladı.