Naxçıvan, 5 avqust (AZƏRTAC). Avqustun 5-də Naxçıvan Muxtar Respublikası Vəkillər Kollegiyasının binası istifadəyə verilmişdir.

Mərasimdə iştirak edən Naxçıvan Muxtar Respublikası Ali Məclisinin sədri Vasif Talıbov rəmzi açılışı bildirən lenti kəsmişdir.

Naxçıvan Muxtar Respublikası Vəkillər Kollegiyasının sədri Tural Hüseynov çıxış edərək muxtar respublikada vəkillər kollegiyasına göstərilən dövlət qayğısının yüksək səviyyədə olduğunu qeyd etmiş, inzibati binanın istifadəyə verilməsi münasibətilə kollegiyanın üzvləri adından minnətdarlığını bildirmişdir. Qeyd olunmuşdur ki, 3 ildən artıqdır fəaliyyət göstərən vəkillər kollegiyası qısa zaman ərzində təşkilatlanma mərhələsini başa vurmuşdur. Hazırda vəkillər kollegiyasının 14 üzvü vardır. Ötən dövr ərzində Kollegiyanın Rəyasət Heyətində çalışan işçilərin əməkhaqları artırılmış, əhaliyə keyfiyyətli hüquqi yardımın göstərilməsi istiqamətində mühüm tədbirlər həyata keçirilmişdir. Vəkillər kollegiyasında ixtisaslı, öz peşəsinə vicdanla yanaşan kadrların üstünlük təşkil etməsi daim diqqət mərkəzində saxlanmışdır.

Naxçıvan Muxtar Respublikası Ali Məhkəməsinin sədri Ramiz Süleymanov və Vəkillər Kollegiyasının İntizam Komissiyasının sədri Arif Ağayev çıxış edərək inzibati binanın istifadəyə verilməsinin muxtar respublikada vəkillik institutunun daha da inkişafı üçün yaradılmış şəraitin, göstərilən diqqətin nəticəsi olduğunu bildirmişlər. Naxçıvan Muxtar Respublikası Ali Məclisinin sədri Vasif Talıbov binanın istifadəyə verilməsi münasibətilə vəkillər kollegiyasının üzvlərini təbrik edərək demişdir: Ulu öndərimizin rəhbərliyi ilə qəbul olunan Azərbaycan Respublikasının Konstitusiyası bu gün ən mütərəqqi konstitusiyalardan biridir. Konstitusiyamızın 7-ci maddəsinin birinci bəndində göstərilir ki, Azərbaycan demokratik, hüquqi, dünyəvi və unitar respublikadır. Bu maddənin ali qanunumuza daxil edilməsi heç də təsadüfi deyil. Qanunun aliliyinin təmin olunması, eləcə də nüfuzlu beynəlxalq təşkilatlar tərəfindən müəyyən olunmuş öhdəliklərin yerinə yetirilməsi üçün bu təşkilatların üzvü olan Azərbaycanda hüquq institutlarının yaradılması və fəaliyyəti mühüm əhəmiyyət daşıyır. Bu institutlardan biri də Azərbaycanın Vəkillər Kollegiyasıdır.

Qeyd olunmuşdur ki, Azərbaycanın tərkibində muxtar dövlət olan Naxçıvan Muxtar Respublikasının da hüquqları Konstitusiyamızda aydın təsbit olunmuş, eyni zamanda Naxçıvan Muxtar Respublikasının da özünün Konstitusiyası qəbul edilmişdir. Bu gün muxtar respublikamız Azərbaycan Respublikasının nüfuzlu beynəlxalq təşkilatlar qarşısında qəbul etdiyi bütün öhdəliklərin yerinə yetirilməsində iştirak edir. Muxtar respublikanın hüquq institutları da Azərbaycan Respublikasının hüquq institutlarının vahid sistemində bu sahədəki öhdəliklərin yerinə yetirilməsində iştirak edirlər. Belə institutlardan biri də Naxçıvan Muxtar Respublikasının Vəkillər Kollegiyasıdır.

Ali Məclisin sədri demişdir: Bu gün muxtar respublikada vətəndaşların müstəqil hüquqi yardım almaq sahəsində Vəkillər Kollegiyasının özünəməxsus rolu vardır. Vəkillər Kollegiyasının üzvləri bundan sonra da hər bir şəxsin hüquq və azadlıqlarının, qanunla qorunan mənafelərinin müdafiə edilməsi, onlara yüksək keyfiyyətli hüquqi yardımın göstərilməsi, vəkillik peşəsinin nüfuzunun yüksəldilməsi istiqamətində səylə çalışmalıdırlar.

Ali Məclisin sədri yaradılan yüksək şəraitin müqabilində Vəkillər Kollegiyasının qarşıya qoyulmuş vəzifələri layiqincə yerinə yetirəcəyinə, bu hüquq institutunun fəaliyyətinin getdikcə daha da genişlənəcəyinə əmin olduğunu bildirmiş, qarşıya qoyulmuş vəzifələrin yerinə yetirilməsində kollegiyanın üzvlərinə uğurlar arzulamışdır.

İki mərtəbədən ibarət olan binanın birinci mərtəbəsində növbətçi otağı, Vəkillər Kollegiyasının Naxçıvan şəhər Hüquq Məsləhətxanası üçün 9 iş otağı istifadəyə verilmişdir. Həmçinin, birinci mərtəbədə Naxçıvan şəhər birinci dövlət notariat kontoru üçün də 6 iş otağı ayrılmışdır. Bütün otaqlar mebel dəstləri və lazımi iş avadanlıqları ilə təmin olunmuşdur.

Binanın ikinci mərtəbəsində Vəkillər Kollegiyasının aparatı yerləşəcəkdir. Burada kompyuter və mühasib otaqları, arxiv, dəftərxana, kitabxana və 50 yerlik iclas zalı istifadəyə verilmişdir.

######