SİYASƏT
Naxçıvan Muxtar Respublikasında dövlət gənclər siyasəti uğurla həyata keçirilir
Naxçıvan, 26 may (AZƏRTAC). Mayın 26-da Naxçıvan şəhərindəki “Gənclik” Mərkəzində Naxçıvan Muxtar Respublikası (MR) gənclərinin VII konfransı keçirilmişdir.
Naxçıvan MR Gənclər və İdman Nazirliyindən AZƏRTAC-a verilən məlumata görə, konfransı giriş sözü ilə açan Naxçıvan MR gənclər və idman naziri Azad Cabbarov gündəliyi elan etmişdir. Qeyd olunmuşdur ki, tədbirdə muxtar respublikada gənclər siyasəti ilə bağlı həyata keçirilən işlərə dair hesabat məruzəsinin dinlənilməsi və Azərbaycan Gənclərinin VII Forumuna nümayəndələrin seçilməsi nəzərdə tutulmuşdur.
Muxtar respublikanın şəhər və rayonlarını təmsil edən 406 nümayəndənin iştirakı ilə keçirilən konfransda Naxçıvan MR gənclər və idman naziri Azad Cabbarov muxtar respublikada gənclər siyasəti ilə bağlı həyata keçirilən işlərə dair hesabat məruzəsi ilə çıxış etmişdir. Bildirilmişdir ki, dövlət gənclər siyasəti, ümumilikdə respublikamızda olduğu kimi, onun ayrılmaz tərkib hissəsi olan Naxçıvan MR-də də uğurla həyata keçirilir. Son illər gənclərin muxtar respublikanın ictimai-siyasi, iqtisadi-mədəni həyatında fəal iştirakı, sosial problemlərinin həlli və gənclər siyasətinin bütün istiqamətləri üzrə müvafiq dövlət proqramlarının səmərəli icrası öz müsbət nəticələrini vermişdir. Bütövlükdə, dövlət gənclər siyasətinin həyata keçirilməsi istiqamətində atılan mühüm addımlar sırasında gənc istedadlara dövlət qayğısının artırılması, elm, təhsil, iqtisadiyyat, mədəniyyət, dövlət idarəçiliyi və digər sahələrdə gənclərin irəli çəkilməsi və xidmətlərinin qiymətləndirilməsi önəmli yerlərdən birini tutur.
Vurğulanmışdır ki, bu gün muxtar respublikada gənclərin sosial müdafiəsinin və məşğulluğunun təmin edilməsi, yaradıcılıq axtarışlarının stimullaşdırılması, milli ruhda böyüməsi, hərbi-vətənpərvərlik tərbiyəsinin gücləndirilməsi, sağlam həyat tərzinin təbliği də diqqət mərkəzindədir. Bu baxımdan Naxçıvan MR Ali Məclisi Sədrinin “Naxçıvan Muxtar Respublikasında gənc istedadlara dövlət qayğısının artırılması haqqında” 2012-ci il 31 yanvar tarixli Fərmanı muxtar respublikada gənclərə göstərilən yüksək diqqət və qayğının daha bir ifadəsidir. Həmçinin Ali Məclis Sədrinin fərmanları ilə gənc istedadların “Qızıl kitabı”nın təsis edilməsi, Naxçıvan MR Ali Məclisinin Sədri yanında Gənclər Fondunun yaradılması regionda gənclərin cəmiyyətin aparıcı qüvvəsinə çevrilməsi istiqamətində atılan mühüm addımlardır. Hazırda muxtar respublika əhalisinin 134 min nəfərdən çoxunu, yəni 31 faizini 14-29 yaşda gənclər təşkil edir.
Nazir gənclərə göstərdiyi diqqət və qayğıya görə Naxçıvan Muxtar Respublikası Ali Məclisinin Sədrinə konfrans iştirakçıları adından minnətdarlıq ifadə etmişdir.
Naxçıvan MR Ali Məclisinin Sədri yanında Gənclər Fondunun icraçı direktoru Məmməd Babayev muxtar respublikada gənclərlə bağlı layihələrin, müxtəlif səpkili tədbirlərin ardıcıl şəkildə həyata keçirildiyini bildirmişdir. Belə ki, 2014-cü ilin ötən dövrü ərzində Gənclər Fondu tərəfindən “Naxçıvanı tanıyıram”, “Naxçıvanı kəşf et”, “Naxçıvan: doğma diyar”, “İdeal ailənin formulu: ənənəvi dəyərlər və müasirlik”, “Unipsixoloji forum” və “Gənclərin aktivliyinə dəstək” layihələri reallaşdırılmışdır.
Konfransda çıxış edən NDU Tələbə Gənclər Təşkilatının sədri Arzu Abdullayev, Naxçıvan MR Təhsil Nazirliyinin aparıcı məsləhətçisi Ayşən Əsgərova, NDU-nun tələbəsi Çilənay Qurbanlı, Heydər Əliyev adına Hərbi Liseyin şəxsi heyətlə iş üzrə bölmə komandirinin müavini, baş leytenant Cabir Bəxtiyarov gənclərə göstərilən diqqət və qayğıdan söhbət açaraq bildirmişlər ki, dövlətin gənclərin fəaliyyəti üçün yaratdığı geniş imkanlar nəticəsində bu təbəqə cəmiyyətin avanqard qüvvəsinə çevrilmişdir.
Sonda Azərbaycan gənclərinin VII forumuna nümayəndələr seçilmişdir.