Naxçıvan, 26 iyul, AZƏRTAC

Naxçıvan Muxtar Respublikası Dövlət Miqrasiya Xidmətinin fəaliyyət istiqamətlərində prioritet yer tutan qanunsuz miqrasiyaya qarşı səmərəli və effektiv mübarizə tədbirləri ötən aylarda da ciddi nəzarətdə saxlanılıb. Belə ki, həyata keçirilən tədbirlər zamanı bu ilin yanvar-iyun aylarında muxtar respublika ərazisində qeydiyyatsız olan, qanunsuz yaşayan, qanunsuz əmək fəaliyyəti ilə məşğul olan, həmçinin müvəqqəti yaşamaq üçün icazə vəsiqəsini itirən 287 əcnəbi aşkarlanıb.

AZƏRTAC-ın Naxçıvan bürosu xəbər verir ki, altıncı çağırış Naxçıvan Muxtar Respublikası Ali Məclisinin yeddinci sessiyasında verilmiş tapşırıqların icrası, cari ilin birinci yarısında görülmüş işlər və qarşıda duran vəzifələrlə bağlı Dövlət Miqrasiya Xidmətində keçirilən kollegiya iclasında xidmətin rəisi, III dərəcəli dövlət miqrasiya xidməti müşaviri Şahin Nəbiyev bu faktları səsləndirib.

Bildirilib ki, bu gün ictimai-siyasi sabitliyin və təhlükəsizliyin bərqərar olduğu Naxçıvan Muxtar Respublikasında insan və vətəndaş hüquq və azadlıqlarının ən yüksək səviyyədə təmin edilməsi, eyni zamanda bu istiqamətdə həyata keçirilən sistemli tədbirlər, şübhəsiz ki, əcnəbilərin muxtar respublikaya olan marağının və müxtəlif məqsədlərlə səfər etmə niyyətinin daha da artmasına səbəb olub.

Qeyd olunub ki, cari ilin birinci yarısında əcnəbiyə yaşayış sahəsi verən 1 şəxs barəsində cərimə inzibati tənbeh növü tətbiq edilib, əcnəbilərdən 285-i barəsində Azərbaycan Respublikası İnzibati Xətalar Məcəlləsinin müvafiq maddələrinə uyğun olaraq ölkə hüdudlarından kənara inzibati qaydada çıxarılmamaqla, 1-i barəsində isə ölkə hüdudlarından kənara inzibati qaydada çıxarılmaqla cərimə inzibati tənbeh növü tətbiq edilib. Bununla yanaşı, miqrasiya sahəsində qanunvericiliyin tələblərini pozmuş 1 əcnəbi öz ərizəsi əsasında könüllü olaraq xidmətin Qanunsuz Miqrantların Saxlanılması Mərkəzində saxlanılıb. Əcnəbi mərkəzdə saxlanıldığı müddətdə Miqrasiya Məcəlləsində və mərkəzin daxili intizam qaydalarında nəzərdə tutulmuş bütün prosessual hərəkətlər yerinə yetirilib və qanunla nəzərdə tutulmuş hüquqları təmin edilib.

Vurğulanıb ki, hesabat dövrü ərzində əcnəbilərin olduğu yer üzrə qeydiyyatı, müvəqqəti olma müddətinin uzadılması, müvəqqəti və daimi yaşama icazələrinin verilməsi, iş icazələrinin verilməsi, vətəndaşlıq məsələləri və xidmətin səlahiyyətlərinə aid olan digər məsələlərlə bağlı xidmətə, ümumilikdə, 2678 müraciət daxil olub. Həmin müraciətlərdən 1774-ü əcnəbilərin və vətəndaşlığı olmayan şəxslərin Azərbaycan Respublikasında olduğu yer üzrə qeydiyyatı ilə bağlıdır. Ötən ilin müvafiq dövrü ilə müqayisədə olduğu yer üzrə qeydiyyatla bağlı daxil olan müraciətlər 1,3 dəfə və ya 36 faiz daha çoxdur.

“Bu gün Dövlət Miqrasiya Xidmətinin elektron xidmətləri bütün sahələr üzrə tam gücü ilə fəaliyyət göstərir. Bunun nəticəsidir ki, birinci yarımil ərzində e-mail ünvanı və elektron hökumət portalına, ümumilikdə 396 müraciət daxil olub”, - deyən xidmət rəisi bildirib ki, bu müraciətlərin 368-i əcnəbilərin və vətəndaşlığı olmayan şəxslərin Azərbaycan Respublikasında olduğu yer üzrə qeydiyyatı, 13-ü müvəqqəti yaşama icazəsinin verilməsi ilə bağlı, 15-i isə sorğu xarakterlidir. Müraciətlərin hər biri xidmət tərəfindən tam, operativ, eyni zamanda qanuna müvafiq qaydada cavablandırılıb. Həmçinin hesabat dövründə xidmətə əcnəbilərə Azərbaycan Respublikasında müvəqqəti yaşamaq üçün icazənin verilməsi ilə bağlı 409, daimi yaşamaq üçün icazənin verilməsi ilə bağlı 8, müvəqqəti yaşama icazəsinin yenidən rəsmiləşdirilməsi ilə bağlı 3, Azərbaycan Respublikası vətəndaşlığına mənsubiyyətin müəyyənləşdirilməsi ilə əlaqədar isə 291 müraciət daxil olub. Daxil olan müraciətlərin icrası qanunvericiliyin tələbləri rəhbər tutmaqla həyata keçirilib.

Diqqətə çatdırılıb ki, bu gün sahibkarlığın inkişafı üçün hərtərəfli şəraitin yaradılması, əlverişli biznes mühitinin formalaşdırılması, habelə maddi rifahın artmasını şərtləndirən iqtisadi fəallığın stimullaşdırılması əməkçi miqrantların muxtar respublikaya marağını daha da artırmaqdadır. 2022-ci ilin birinci yarımili ərzində əcnəbilərin Naxçıvan Muxtar Respublikasında haqqı ödənilən əmək fəaliyyəti ilə məşğul olmaları üçün iş icazəsinin verilməsi ilə bağlı xidmətə 100 müraciət daxil olub. Dövlət Miqrasiya Xidmətinin fəaliyyətində diqqətdə saxlanılan prioritet vəzifələrdən biri də mühüm əhəmiyyətə malik olan Dövlət Proqramlarının və Xidmətin 2022-ci il üçün təsdiq edilmiş iş planının vaxtında, dəqiq və uğurlu icrasıdır. Naxçıvan Muxtar Respublikası Ali Məclisi Sədrinin müvafiq sərəncamları ilə təsdiq edilən “2018-2022-ci illərdə Naxçıvan Muxtar Respublikasında turizmin inkişafına dair Dövlət Proqramı” və “2021-2025-ci illərdə Naxçıvan Muxtar Respublikasında əhalinin məşğulluğunun artırılması üzrə Dövlət Proqramı”na əsasən, sərhəd-keçid prosedurlarının sadələşdirilməsi və sürətləndirilməsi, habelə sərhəd-buraxılış məntəqələrində sürətli keçidin təmin edilməsi, eyni zamanda əcnəbilərin muxtar respublikada əmək fəaliyyəti ilə məşğul olması, qanunvericiliyin tələblərinə ciddi riayət edilməsi istiqamətində zəruri tədbirlər görülüb.

Xidmət rəisi bildirib ki, muxtar respublika ərazisində müvəqqəti olan və yaşayan, həmçinin mövcud vəziyyətlə əlaqədar öz ölkələrinə qayıda bilməyən əcnəbilərin olma və yaşamalarının leqallaşdırılması ilə bağlı da zəruri tədbirlər görülüb və onların ölkədə olmaları qanuniləşdirilib. Bu səbəbdən birinci yarımil ərzində müvəqqəti olma müddətinin uzadılması ilə bağlı 78 müraciət daxil olub və icrası təmin edilib.

Sonra məruzə ətrafında çıxışlar dinlənilib.