Bakı, 8 aprel (AZƏRTAC). Aprelin 8-də Nəsimi Rayon İcra Hakimiyyətində ulu öndər Heydər Əliyev irsinin öyrənilməsi ilə əlaqədar rayon məktəblərinin XI sinif şagirdlərinə tədris olunan məktəbdənkənar dərslərin vəziyyətinə və rayon əhalisinin tibbi müayinədən keçirilməsinin gedişinə həsr olunmuş geniş şura iclası keçirilmişdir.

İcra hakimiyyətindən AZƏRTAC-a bildirmişlər ki, icra hakimiyyətinin başçısı Nəsib Məhəməliyev gündəlikdə duran məsələlər barədə məlumat vermişdir.

İclasda çıxış edən rayon icra hakimiyyəti başçısının müavini Gülarə Verdiyevaya bildirmişdir ki, respublikada olduğu kimi, Nəsimi rayonunda da son illər səhiyyə müəssisələri əsaslı təmir edilərək müasir avadanlıqla təchiz edilmiş, rayon ərazisində yerləşən Azərbaycan Tibb Universitetinin nəzdində terapevtik və cərrahiyyə korpusları inşa edilərək istifadəyə verilmişdir.

G.Verdiyeva Azərbaycan vətəndaşlarının sağlamlığına diqqətin daha da artırılması üçün Azərbaycan Respublikasının Prezidenti İlham Əliyevin tapşırığına uyğun olaraq fevralın 17-dən mayın 1-dək əhalinin tibbi müayinədən keçirilməsindən bəhs etmişdir.

Bildirilmişdir ki, müvafiq tapşırığın icrası ilə əlaqədar rayon əhalisinin tibbi müayinədən yüksək mütəşəkkillik və keyfiyyətlə keçirilməsi üçün aidiyyəti qurumların nümayəndələrindən ibarət müvafiq komissiya yaradılmış, tədbirlər planına müvafiq olaraq ötən müddət ərzində bir sıra işlər görülmüş, əhali arasında təşkilati izahat işlərinin aparılması uğurla həyata keçirilmişdir.

Komissiya üzvlərinin apardıqları qənaətbəxş iş nəticəsində rayonda nəzərdə tutulan 137850 nəfərdən 67843 nəfəri artıq tibbi müayinədən keçirilmişdir.

Tədbirdə çıxış edən 3, 5 və 20 nömrəli şəhər poliklinikalarının baş həkimləri tibbi müayinənin gedişindən və əhalinin bu prosesdən razı qalmasından danışmışlar.

Qeyd edilmişdir ki, həmçinin yaradılan səyyar həkim briqadaları vasitəsilə evindən çıxa bilməyən xəstələr də evlərdə müayinə və müalicə olunmuşlar.

Şura iclasında ulu öndər Heydər Əliyev irsinin öyrənilməsi ilə əlaqədar rayon məktəblərinin XI sinif şagirdlərinə məktəbdənkənar dərslərin tədrisi vəziyyəti müzakirə olunmuşdur.

Bildirilmişdir ki, hər xalqın və millətin tarixində elə nadir şəxsiyyətlər olur ki, onların fəaliyyəti, öz xalqı qarşısında xidmətləri zaman məfhumunu aşaraq əbədiyyətə qovuşur. Öz xalqının tarixində silinməz izlər qoymuş belə şəxsiyyətlərin vəfatından sonra da onların ideyaları gələcək nəsillərin yolunu işıqlandırır, milyonlarla insanın həyat yolunun müəyyən edilməsində müstəsna rol oynayır. Məhz bu səbəbdən belə şəxsiyyətlərin mənəvi irsinin qorunub saxlanması və öyrənilməsi olduqca mühüm əhəmiyyət kəsb edir. Azərbaycan xalqının ümummilli lideri, müstəqil Azərbaycan dövlətinin memarı və qurucusu Heydər Əliyev məhz belə nəhəng şəxsiyyətlərdəndir. Azərbaycan tarixinin nadir simalarından olan Heydər Əliyev demokratik, hüquqi, dünyəvi Azərbaycan dövlətini qurmaqla kifayətlənməmiş, dahiyanə bir uzaqgörənliklə onun gələcək inkişaf strategiyasını da müəyyən etmişdir.

Ulu Öndərin zəngin irsinin öyrənilməsi onun ideyalarının davamçıları, müasir Azərbaycan gəncliyi üçün böyük dövlətçilik, vətənpərvərlik, öz xalqına, vətəninə sadiqlik məktəbi heç vaxt aktuallığını və qiymətini itirməyəcək örnəkdir.

Müasir Azərbaycan tarixinin daha səmərəli öyrənilməsi məqsədi ilə XI sinif şagirdlərinə iki akademik saat məktəbdənkənar dərslərin keçirilməsi nəzərdə tutulmuşdur. Natiq qeyd etmişdir ki, indiyədək Nəsimi rayonunda 29 məktəbdən 1752 şagird dərsləri dinlənilmişdir.

Tədbirdə çıxış edən Yeni Azərbaycan Partiyası Nəsimi rayon təşkilatının sədri, Milli Məclisin deputatı Məlahət İbrahimqızı şura iclasında müzakirə olunan məsələlərin əhəmiyyətini qeyd etmişdir.