Bakı, 19 fevral, AZƏRTAC

“Azneft” İstehsalat Birliyinin (İB) N.Nərimanov adına neft və qazçıxarma idarəsinin (NQÇİ) istismar etdiyi 444 nömrəli estakadayanı meydançada qazpaylama sistemi yenidən qurulub.

SOCAR-ın mətbuat xidmətindən AZƏRTAC-a bildirilib ki, idarənin istismar etdiyi yataqlarda hasilat quyularının səmərəliliyinin artırılması, eləcə də burada yerləşən texnoloji avadanlıqların təhlükəsizliyinin təmin edilməsi istiqamətində mühüm tədbirlər həyata keçirilir. NQÇİ-nin 444 nömrəli estakadayanı meydançasındakı qazpaylama məntəqəsinin yenidənqurma işləri çərçivəsində 2-ci buraxılış kompleksi “Neftqaztikinti” Tresti tərəfindən tikilərək istismara verilib. Bu, NQÇİ-nin estakadayanı meydançalarında fəaliyyət göstərən neft quyularının qazlift üsulu ilə təhlükəsiz istismarına zəmin yaradır.

Texnoloji sxemə əsasən, layihə üzrə 2 ədəd avtomatik qazpaylayıcı qurğu quraşdırılıb. Meydança üçün ayrılan qaz əvvəlcə separator blokunda separasiya olunur, sonra isə 5 ədəd “Bail-1” tipli elektrik qaz qızdırıcı qurğularından keçərək avtomatik qazpaylayıcı qurğuya daxil olur. Burada hər quyunun tələbatına uyğun olaraq qazın sərfiyyatı tənzimlənir və estakadayanı meydançaya çəkilmiş ikidüyməli borular vasitəsilə müvafiq quyulara ötürülür. Avtomatik qazpaylayıcı qurğu vasitəsilə 16 quyunun fasiləsiz olaraq qaz-lift üsulu ilə işləməsi təmin olunacaq.

Yeni qazpaylama sistemi istifadəyə verilməklə uzun müddətdən bəri istismarda olan 2 ədəd qazpaylama məntəqəsinin bir məntəqədə birləşdirilməsinə nail olunub. Həmin məntəqə müasir tələblərə və beynəlxalq standartlara cavab verən şərtlər əsasında tikilib.