PAKİSTANDA RADİKAL TƏŞKİLATLARIN 1500-DƏN ÇOX ÜZVÜ HƏBS OLUNMUŞDUR
İSLAMABAD. Pakistan Prezidentinin ekstremizmə qarşı elan etdiyi müharibə çərçivəsində ölkədə müxtəlif radikal təşkilatların 1500-dən çox fəal üzvü həbsə olunmuşdur. Onların yarısı ölkənin mərkəzindəki Pəncab əyalətində, 450-si Sinddə, 300-ü Şimal-qərbi sərhəd əyalətində, 50-si isə Bəlucistanda həbs edilmişdir. Ölkədə “Ləşkəri-Tayba”, “Caişi-Məhəmməd”, “Sipahi-səhabə” kimi ən radikal təşkilatların 300-dək nümayəndəliyi bağlanmışdır.
İTAR-TASS-ın verdiyi xəbərə görə, Pakistanın hakimiyyət dairələri ekstremistlər arasında həbslərə hələ Prezident Müşərrəfin şənbə günü televiziya ilə çıxışındarn əvvəl başlamışlar. Çünki fəaliyyətlərinin qadağan ediləcəyini qabaqcadan bilən bəzi təşkilatlar “hökumətin tədbirlərinə müvafiq surətdə cavab verməyə” hazır olduqlarını bəyan etməyə başlamışdılar. Hüquq-mühafizə orqanlarının qətiyyətli hərəkətləri ekstremistlərin müqavimət göstərməsinə imkan verməmişdir. Son günlər onların ictimai asayişi mühafizə orqanlarına müqavimət göstərməsi barədə xəbərlər alınmamışdır.
Bölmənin digər xəbərləri
