Bakı, 22 iyul, AZƏRTAC

İyulun 22-də Ədliyyə Nazirliyi Penitensiar Xidmətinin Baş idarəsində 2022-ci ilin birinci yarımilindəki fəaliyyətin yekunlarına dair videokonfrans formatında əməliyyat müşavirəsi keçirilib.

Penitensiar Xidmətin ictimaiyyətlə əlaqələr şöbəsindən AZƏRTAC-a bildiriblər ki, müşavirədə Xidmətin Baş idarəsinin, eləcə də tabe qurumların rəhbər heyəti və Ədliyyə Nazirliyinin məsul əməkdaşları iştirak ediblər.

Ədliyyə nazirinin müavini - Penitensiar Xidmətin rəisi ədliyyə general-leytenantı Ceyhun Həsənov müşavirəni açaraq hesabat dövründə penitensiar sahədə əldə olunmuş nailiyyətlər, həyata keçirilmiş mühüm yeniliklər və qarşıda duran vəzifələr barədə ətraflı məlumat verib.

Nazir müavini çıxışı zamanı Prezident, Müzəffər Ali Baş Komandan İlham Əliyevin uğurlu siyasəti nəticəsində ölkəmizdə iqtisadiyyatın davamlı və dayanıqlı inkişafının təmin edildiyini, işğaldan azad olunmuş ərazilərdə nəhəng quruculuq işlərinin aparıldığını, yeni strukturların yaradıldığını, müasir innovasiyaların tətbiq olunduğunu bildirib. Qeyd edilib ki, Prezident İlham Əliyevin düşünülmüş, uzaqgörən daxili və xarici siyasətinin nəticəsində böyük uğurlar əldə edilib, əhalinin sosial rifahının yaxşılaşdırılması üçün mühüm addımlar atılıb, şəhid ailələri və müharibə iştirakçıları dövlət qayğısı ilə əhatə olunub. Xalqımızın xoşbəxt gələcəyinə hesablanan bir çox layihələrin müəllifi Birinci vitse-prezident Mehriban Əliyevanın humanizm, mərhəmət və nəciblik kimi ali keyfiyyətlərdən irəli gələn əzmkar və geniş fəaliyyətinin təməlində xalqa xidmət amalının dayandığı, Vətənin tərəqqisinə xidmət etdiyi, xalqın mədəniyyətinin, təhsilinin və səhiyyəsinin inkişafına töhfələr verdiyi vurğulanıb.

Xüsusilə qeyd edilib ki, qadın və yetkinlik yaşına çatmayan məhkumlar üçün yeni istifadəyə verilmiş penitensiar müəssisəyə şəxsən başçəkməsi və orada yaradılmış şəraitlə tanış olması Prezidentin cəmiyyətimizin bütün sosial təbəqələrinə diqqət və qayğısının daha bir nümunəsidir. Dövlətimizin başçısının humanist siyasətinin davamı olan, 213 məhkuma şamil edilmiş 2022-ci il 27 may tarixli Əfv Sərəncamı vaxtında və qüsursuz icra edilib, azadlıqdan məhrum etmə cəzasına məhkum edilmiş 168 nəfər cəzanın çəkilməmiş hissəsindən azad olunub, azadlıqdan məhrum etmə cəzasına məhkum edilmiş 36 nəfərin cəzasının çəkilməmiş hissəsi yarıyadək azaldılıb.

Bildirilib ki, nizam-intizamın gücləndirilməsi, karantin rejiminin tələblərinə ciddi riayət olunması nəticəsində koronavirus infeksiyasının penitensiar müəssisələrdə və əməkdaşlar arasında geniş yayılmasına imkan verilməyib, bütün qurumlarda profilaktiki tədbirlər davam etdirilib.

Sonra Penitensiar Xidmətin rəis müavini, ədliyyə general-mayoru Oqtay Məmmədov Xidmətin 2022-ci ilin ilk altı ayı ərzindəki fəaliyyətin yekunlarına dair hesabat məruzəsi ilə çıxış edib.

Diqqətə çatdırılıb ki, ötən dövrdə Penitensiar Xidmət tərəfindən dövlətimizin başçısının müvafiq fərman və sərəncamları, nazirliyin kollegiya qərarları, nazirlik üzrə əmr və göstərişlər rəhbər tutularaq fəaliyyət istiqamətləri üzrə penitensiar sistemin inkişafına, kadr potensialının gücləndirilməsinə, həbs edilmiş şəxslərin, məhkumların saxlanma şəraitinin yaxşılaşdırılmasına, onların hüquqlarının etibarlı qorunmasına yönəlmiş ardıcıl və məqsədyönlü tədbirlər həyata keçirilib.

Azərbaycan Respublikası Prezidentinin 2017-ci il 10 fevral tarixli Sərəncamının, eləcə də Azərbaycan Respublikası Prezidentinin 2018-ci il 18 dekabr tarixli Sərəncamı ilə təsdiq olunmuş “Azərbaycan ədliyyəsinin inkişafına dair 2019-2023-cü illər üçün Dövlət Proqramı”nın icrası davam etdirilib, aidiyyəti tədbirlərin həyata keçirilməsi məqsədilə işlər görülüb. Penitensiar müəssisələrdə təmir və abadlıq işləri davam etdirilib, həbs edilmiş şəxslərin və məhkumların saxlanma şəraitinin yaxşılaşdırılması istiqamətində müvafiq tədbirlər reallaşdırılıb.

Cəzadan şərti olaraq vaxtından əvvəl azad olunma, cəzaçəkmə müəssisəsinin növünün dəyişdirilməsi sahəsində fəaliyyətin təkmilləşdirilməsi, sənədləşmənin aparılmasında mövcud olmuş nöqsanların aradan qaldırılması üzrə tədbirlər davam etdirilib. Virtual qaydada keçirilən iclaslarda xüsusi komissiya tərəfindən məhkəməyə göndərilmiş müraciətlərdən 85 faizdən çoxu təmin edilib.

Keçirilən kompleks əməliyyat-rejim tədbirləri nəticəsində həbs edilmiş şəxslər və məhkumlar tərəfindən törədilməsi ehtimal olunan 435 cinayət hadisəsinin qarşısı alınıb.

Hesabat dövründə 20 fakt üzrə narkotik və psixotrop maddələrin və altı fakt üzrə mobil telefonların gizli yolla penitensiar müəssisələrə keçirilməsinin qarşısı alınıb və qanunvericilikdə nəzərdə tutulmuş tədbirlər görülüb.

Cinayətkarlıqla mübarizədə digər hüquq-mühafizə orqanları ilə qarşılıqlı əlaqələr səmərəli təşkil olunub. Daxili İşlər Nazirliyinin, Baş Prokurorluğun və Dövlət Təhlükəsizliyi Xidmətinin müvafiq qurumları ilə birgə keçirilmiş əməliyyat tədbirləri nəticəsində beş il əvvəl Quba rayonunun ərazisində 2 nəfərin, 10 il əvvəl isə Bakı şəhəri Yasamal rayonunun ərazisində bir vətəndaşın qətlə yetirilməsi cinayətinin üstü açılıb. Bundan başqa, birgə tədbirlər nəticəsində barəsində axtarış elan edilmiş 5 nəfər saxlanılaraq istintaqa təqdim edilib, 19 kiloqramdan çox müxtəlif növ narkotik vasitələr aşkarlanaraq götürülüb. Həyata keçirilən əməliyyat tədbirləri nəticəsində həbs edilmiş şəxslər və məhkumlar tərəfindən könüllü olaraq təqdim olunmuş bir ədəd tapança, 1 ədəd tüfəng, bir ədəd qumbara və 78 ədəd güllə ərazi polis orqanlarına təhvil verilib.

Ədliyyə orqanlarına işə qəbul üzrə Müsabiqə Komissiyasının şəffaf və səmərəli fəaliyyəti, vakant vəzifələrin vaxtında komplektləşdirilməsi nəticəsində Penitensiar Xidmətə 30 nəfər orta rəis heyətinə, 74 nəfər kiçik rəis heyətinə, 17 nəfər isə mülki işə qəbul edilib. Bu ilin birinci yarısında 91 əməkdaşın ədliyyə orqanlarında qulluq keçməsinə xitam verilib. O cümlədən, 2022-ci ilin ilk altı ayı ərzində 23 nəfər Vətən müharibəsi iştirakçısı Penitensiar Xidmətdə qulluğa qəbul olunmuşdur.

Avropa Penitensiar Qaydalarının, digər beynəlxalq sənədlərin və İşgəncələrin qarşısının alınması üzrə Avropa Komitəsinin (CPT) məhkumların və həbs edilmiş şəxslərin saxlanma şəraiti, xüsusilə onların yaşayış sahəsi ilə bağlı tövsiyələri nəzərə alınmaqla ölkənin müxtəlif regionlarında yeni tipli qarışıq rejimli penitensiar müəssisə kompleksləri inşası davam etdirilir. Bakı şəhəri Zabrat qəsəbəsində yeni konsepsiyada və müasir tipdə inşa edilmiş qadın cəzaçəkmə və yetkinlik yaşına çatmayan məhkumlar üçün tərbiyə müəssisəsi istismara verilib, 2022-ci il martın 30-da 4 saylı cəzaçəkmə və Tərbiyə müəssisələrində saxlanılan məhkumların həmin müəssisəyə köçürülməsi təmin edilib.

Hesabat dövründə vətəndaşların və məhkumların müraciətlərinə baxılmasına xüsusi önəm verilib. Ümumilikdə müvafiq dövr ərzində qəbullar və müraciətlərə baxılması ilə bağlı vətəndaş məmnunluğuna nail olunub, müraciətlərdə qaldırılmış məsələlərə həssaslıqla yanaşılıb və müvafiq tədbirlər görülüb. Məhkumların hüquqlarının təmin olunması, onlara müvafiq hüquqi yardımın göstərilməsi məqsədilə məhkum qadınlar üçün 4 saylı cəzaçəkmə müəssisəsində vətəndaş cəmiyyəti nümayəndələrinin, psixoloqların iştirakı ilə qəbullar təşkil olunub, məhkumları narahat edən məsələlərə aydınlıq gətirilib, məsləhətlər verilib. Vəkillər Kollegiyası ilə əldə olunmuş razılaşmaya əsasən təcrübəli vəkillər tərəfindən qadın məhkumların fərdi qaydada təmənnasız hər ay qəbulu keçirilib. Artıq bu praktika digər cəzaçəkmə müəssisələrində də geniş tətbiq olunur.

Müşavirədə Ədliyyə Nazirliyinin məsul əməkdaşlarının və cəzaçəkmə müəssisələrinin rəhbərlərinin çıxışları dinlənilib.