AZƏRTAC-ın müxbiri xəbər verir ki, Azərbaycan Prezidenti İlham Əliyev oktyabrın 24-də Yevlaxın “Karvan” futbol klubunun stadionunda Qarabağ müharibəsi əlillərinin və şəhid ailələri üzvlərinin bir qrupu ilə görüşmüş, onlara Gəncədə istehsal olunmuş “Oka” markalı avtomobillərin açarlarını təqdim etmişdir.

Əmək və əhalinin sosial müdafiəsi naziri Füzuli Ələkbərov dövlətimizin başçısına məlumat verdi ki, buraya 16 rayondan Qarabağ müharibəsi əlilləri və şəhid ailələrinin üzvləri gəlmişdir. Onlara 404 ədəd “Oka” markalı avtomobil təqdim olunacaqdır.

Prezident İlham Əliyev Tərtər, Zərdab, Bərdə, Mingəçevir, Göyçay,

Ağcabədi, Ağdam, Goranboy və Şəmkirdən gəlmiş əlillərə və şəhid ailələrinin üzvlərinə avtomobillərin açarlarını təqdim etdi.

Bərdə rayonundan olan Qarabağ müharibəsi əlili dövlətimizin başçısına dərin minnətdarlığını bildirərək dedi: Cənab Prezident, Sizin dörd illik fəaliyyətiniz dövründə həyata keçirdiyiniz tədbirlər ölkəmizin hər yerində olduğu kimi, bizim rayonumuzda da çox böyük rəğbətlə qarşılanır. Uğrunda canımızdan keçməyə hazır olduğumuz Vətənimizin tərəqqisi naminə Sizin imzaladığınız dövlət proqramlarında nəzərdə tutulan tədbirlər bizim rayonda da çox böyük vüsətlə həyata keçirilir. Rayonda 150 Qarabağ müharibəsi əlili var. 36 ailəlik mənzil inşa olunmuş, 24 əlil üçün isə yaşayış binası tikilməkdədir. 3 nəfər əlilə ayrıca mənzil verilmiş və bir nəfər üçün isə fərdi yaşayış evi tikilir.

Bu gün biz, Qarabağ müharibəsi əlilləri üçün çox xoş bir gündür. Hər bir insan nə vaxtsa ölkənin birinci şəxsi ilə görüşməyi, onunla söhbət etməyi, təmasda olmağı arzulayır. Allah-təala bizə bu günü nəsib etdi, xoş duyğuları yaşatdı, Sizinlə görüşdük, əllərinizi sıxdıq. Bizə gələcək xatirələrimizi zənginləşdirən ən xoş duyğular yaşatdınız. Çox sağ olun.

Tərtər rayonundan olan şəhid ailəsinin üzvü də ürək sözlərini söylədi: Cənab Prezident, çox sağ olun. Bu gün Siz bu qədər insanı sevindirdiniz. İndi onların uşaqları evlərində atalarının yolunu gözləyir. Allah Sizi sevindirsin, qorusun. Bizim rayonumuzda da böyük abadlıq işləri gedir. Tərtər nağıllar aləminə oxşayır. Bunların

hamısı Sizin sayənizdədir. Gözəl binalar tikilir, əlillərə yaxşı şərait yaradılır. Qazımız, işığımız, suyumuz daim var, gözəl yaşayırıq. Allah balalarınızla birlikdə Sizi qorusun. Bizə göstərdiyiniz diqqət və qayğıya görə dərin minnətdarlığımızı bildiririk.

Prezident İLHAM ƏLİYEV təşəkkür edərək dedi: Sizin hamınızı təbrik edirəm. Siz müxtəlif rayonlardan gəlmisiniz. Çünki burada çoxsaylı maşın paylanılır, 400-dən çox maşın paylanılacaqdır. Xahiş edirəm, mənim təbriklərimi bütün ailə üzvlərinizə çatdırasınız. Eyni zamanda, mənim salamlarımı yaşadığınız rayonun bütün sakinlərinə çatdırasınız. Mən sizin yaşadığınız rayonlarda olmuşam. Bilirsiniz ki, regionlara tez-tez gedirəm, vəziyyətlə tanış oluram. Görəndə ki, Azərbaycan xalqı daha da yaxşı yaşayır, sevinirəm. Siz bu yaxşı həyata layiqsiniz. Siz Vətən uğrunda döyüşmüsünüz, vuruşmusunuz, öz sağlamlığınızı itirmisiniz. Ona görə əgər dövlət sizə bir balaca kömək göstərirsə, əgər həyatınızı, heç olmasa, müəyyən dərəcədə yüngülləşdirirsə, mən bunu borc kimi hesab edirəm. Azərbaycan dövləti, Azərbaycan hökuməti bu məsələlərə çox böyük diqqətlə yanaşır. Əlbəttə, mən indi Azərbaycanı başqa ölkələrlə müqayisə etmək istəmirəm. Amma yəqin, siz də bilirsiniz ki, bu cür tədbirlər, böyük sayda - yüzlərlə, minlərlə maşının əlillərə hədiyyə edilməsi başqa ölkələrdə yoxdur. Bu, Azərbaycanda var. Ona görə ki, biz istəyirik Vətən uğrunda xidmətlər göstərmiş insanlar dövlət tərəfindən mükafatlandırılsınlar. Siz buna layiqsiniz və əminəm ki, bu gün sizin ailələrinizdə bir bayram günü olacaqdır. Əminəm ki, bu maşınlar sizə yaxşı xidmət edəcəkdir. Amma onu da xahiş edirəm ki, bu maşınları ehtiyatla sürün. Mən bu yaxınlarda Nazirlər Kabinetinin toplantısında bu barədə öz sözlərimi dedim. Bəzi hallarda, xüsusilə Bakı şəhərində, avtomobilləri ehtiyatsız sürür, qaydaları pozurlar. Siz öz davranışınızla bütün sürücülərə yaxşı nümunə göstərəcəksiniz.

Sizi bir daha ürəkdən salamlayıram, təbrik edirəm. Arzum budur ki, Azərbaycan xalqı yaxşı yaşasın, bütün bölgələr inkişaf etsin. Sizin yaşadığınız bölgələrdə də inkişaf var, bunu görürsünüz. Mən istəyirəm ki, daha da sürətlə getsin. Yaxşı binalar, məktəblər, xəstəxanalar, zavodlar, fabriklər tikilsin, evlə təminat yaxşılaşsın, qaz təchizatı yaxşılaşsın. Bilirəm, yaxşılaşır və belə də olmalıdır. Mən istəyirəm ki, xalqımız yaxşı dolansın, iş yerləri olsun, kasıb adam olmasın. Biz bunu etmək üçün çalışırıq və çalışacağıq. Sizi bir daha salamlayıram və bir də xahiş edirəm ki, yaşadığınız rayonlarda bütün bacı-qardaşlarımıza mənim salamlarımı çatdırasınız.

Əlbəttə, əlillərin pensiyasını artırırıq və artıracağıq. Bilirsiniz ki, şəhid ailələrinə böyük məbləğdə pensiya verilir. 4-5 nəfərdən ibarət ailə dövlətdən 400-500 manat müavinət alır. İndi ünvanlı sosial yardım proqramına başlamışıq. Təxminən 300 min insan dövlətdən yardım alır. Orta hesabla hər ailə 80 manat alır. Sizin pensiyalarınız da qaldırılacaqdır. Bunu etmək üçün gərək iqtisadiyyatımız inkişaf etsin. İndi bu inkişaf var, əmək haqqı, pensiyalar artırılır və bu məsələyə yenə də baxılacaqdır. Sağ olun.

X X X

Qarabağ müharibəsi əlilləri və şəhid ailələrinin üzvləri dövlətimizin başçısına bir daha dərin təşəkkürlərini bildirdilər.

Sonra Prezident İlham Əliyev sükan arxasına keçərək, avtomobili sürdü və sınaqdan keçirdi.

Dövlətimizin başçısı mükafatlandırılan əlillər və şəhid ailəsi üzvləri ilə xatirə şəkli çəkdirdi.