Qax, 11 mart (AZƏRTAC). Martın 11-də Ailə, Qadın və Uşaq Problemləri üzrə Dövlət Komitəsinin (AQUPDK) və “Gender Bərabərliyi və Qadın Təşəbbüsləri” İctimai Birliyinin birgə təşkilatçılığı ilə Qax rayonunda “Məişət zorakılığı barəsində məlumatlandırma kampaniyası” layihəsi çərçivəsində qadınlar üçün təlimlər başlamışdır.

Avropa Komissiyası və ACİ-YF İnsan Hüquqları və İdarəçilik Proqramı (Macarıstan) tərəfindən dəstəklənən bu layihənin icrasına respublikamızda 2012-ci ildə başlanılmışdır.

AZƏRTAC xəbər verir ki, layihə çərçivəsində rayonun Ləkit, Almalı və İlisu kəndlərində təşkil olunan təlimlərdə mövzu ilə bağlı müzakirələr, hüquqi və psixoloji məsləhətləşmələr aparılır.

Keçirilən tədbirlərdə “Məişət zorakılığının qarşısının alınması haqqında” Azərbaycan Respublikasının Qanunu və bu sənəddən irəli gələn vəzifələr, həmçinin məişət zorakılığının qurbanı olan şəxslərin sosial və hüquqi müdafiəsi, məişət zorakılığının qarşısının alınması istiqamətində görülən işlər və digər məsələlər barədə ətraflı məlumat verilir. Hər bir kənd üzrə 20 nəfərədək qadının iştirak etdiyi təlimlər bir neçə gün davam edəcəkdir.