Qəbələ, 18 oktyabr, Şahnəzər Bəşirov, AZƏRTAC

Qəbələ sakinləri, rayona gələn yerli və xarici turistlər hazırda burada iki fəslin vəhdətini yaşayırlar. İki gündür ki, rayonun cənub hissəsində payız, şimalında isə qış fəslidir.

AZƏRTAC xəbər verir ki, Qəbələ şəhərinin şimalındakı kanat yolu ilə dağlara qalxan zaman hər kəs bu gözəl təbiət mənzərəsini seyr edə bilir.

Rayona ilk qarın yağması “Tufandağ” Qış-Yay Turizm Kompleksində istirahət edənlər üçün əsl sürpriz olub. Qarın yağması ilə Qəbələdə qış turizminə erkən start verilib. Rayonun dağlıq əraziləri ağ örpəyə bürünüb. Hazırda yerli və xarici turistlərin kanat yolu ilə dağlarda gəzintisi təşkil edilir, “Tufandağ” otelində istirahəti təmin olunur.

Səudiyyə Ərəbistanından olan turist Məhəmməd İsmayıl bildirib ki, Qəbələdə havanın qəflətən dəyişməsi və qarın yağması onun üçün gözlənilməz olub: “Burada oktyabr ayında qar yağmasını təsəvvür etməzdim. Bizim ölkəmizdə nadir hallarda qar yağır və tez də əriyir. Qəbələdə isə tam başqa ab-havadı. Burada əsl qış fəslidir. Qarı görüb çox sevindim. Qəbələyə dünən gəlmişəm və buradakı müasir otelləri, bizə yaradılan şəraiti, göstərilən xidməti çox bəyənirəm”.

“Tufandağ” otelində dincələn əcnəbi turistlər Qəbələyə yağan ilk qarın yaratdığı gözəl mənzərəni videokameranın yaddaşına köçürür, xatirə şəkilləri çəkdirir, qartopu oynayır, xizəklə sürüşür, qarlı havada dağlarda meşə gəzintisinə çıxırlar. Turistlər rayon mərkəzindən 4 kilometr şimalda və dəniz səviyyəsindən 1680 metr hündürlükdə olan kanatla dörd istiqamətdə dağ gəzintisinə çıxmaq və qarın yaratdığı əsrarəngiz mənzərəni seyr etmək fürsətini əldən buraxmaq istəmirlər. Son iki gündə Qəbələyə gələn turistlərin sayının xeyli artması da bunu təsdiqləyir.

Səudiyyə Ərəbistanından gələn digər turist Hacı Əli Amar burada dincəlməyin ona xüsusi zövq verdiyini deyib. O, Azərbaycana ilk dəfə səfər etdiyini, Bakıdan sonra istirahət üçün Qəbələyə gəldiyinə görə çox sevindiyini bildirib.

Birləşmiş Ərəb Əmirliklərindən gələn Məhəmməd Yasif Qəbələnin təbiətinin çox gözəl olduğunu, burada qış fəslində istirahət üçün hər cür şəraitin yaradıldığını, qar yağandan sonra arzuladığı gözəl qış mənzərəsini məhz burada gördüyünü deyib: “Otel və istirahət mərkəzlərindəki infrastruktur və qonaqlara göstərilən xidmətin səviyyəsi ürəyimcədir. Qarlı havada meşə gəzintisinə çıxmaqdan və təbiət qoynunda şəkil çəkdirməkdən zövq alıram. Dostlarımla buraya yenə gələcəyəm”.

Kanatla dağlardan aşağı, yəni Qəbələ şəhərinə doğru qayıtdıqca qış fəsli yenidən payıza, qar isə yağışa çevrilir. Sinoptiklər isə Qəbələdə qarlı havanın hələ bir neçə gün davam edəcəyini proqnozlaşdırır.